ئەنگىلىيە ھۆكۈمىتى پارلامېنتنىڭ «شىنجاڭدىكى ۋەھشىلىكلەرنى ئىرقىي قىرغىنچىلىق» دەپ ئېتىراپ قىلىش تەكلىپىنى رەت قىلغان

خەۋەر مەنبەسى: ئەركىن ئاسىيا

ئەنگىلىيەنىڭ بورىس جونسون ھۆكۈمىتى ئەنگىلىيە پارلامېنتىنىڭ «شىنجاڭدىكى ۋەھشىلىكلەرگە قارىتا ئەنگىلىيەنىڭ تەدبىر قوللىنىش مەسئۇلىيىتى» گە دائىر تەلەپلىرىگە جاۋاپ بېرىپ، خىتاينىڭ ئۇيغۇرلارغا تۇتقان مۇئامىلىسىنى «ئىرقىي قىرغىنچىلىق» دەپ ئېتىراپ قىلىشنى رەت قىلغان. بىراق ھۆكۈمەت پارلامېنتنىڭ ئەندىشىلىرىنى ب د ت پەن، مائارىپ، مەدەنىيەت تەشكىلاتى ۋە خەلقئارا ئەمگەك تەشكىلاتىدا ئوتتۇرىغا قويۇش، ئەنگىلىيەدىكى ئۇيغۇر جامائەتچىلىكى بىلەن ئالاقە ئورنىتىش تەكلىپلىرىنى قوبۇل قىلغان. ئەنگىلىيە ھۆكۈمىتىنىڭ قارىشىچە، خىتاي ئۇيغۇر ئېلىدىكى ئېغىر كىشىلىك ھوقۇق دەپسەندىچىلىكى ئۈچۈن جاۋابكارلىققا تارتىلىشى، لېكىن «ئىرقىي قىرغىنچىلىق» جىنايىتىنى سوتنىڭ بېكىتىشى كېرەك ئىكەن.

ئەنگىلىيە پارلامېنتى بۇ يىل 4-ئايدا خىتاينىڭ ئۇيغۇرلارغا تۇتقان مۇئامىلىسىنى «ئىرقىي قىرغىنچىلىق» دەپ بېكىتىپ، ھۆكۈمەتنىڭمۇ بۇ ۋەھشىلىكنى «ئىرقىي قىرغىنچىلىق» دەپ قوبۇل قىلىشنى، ئۇنىڭغا قارىتا بەزى كونكىرېت تەدبىرلەرنى ئېلىشىنى تەلەپ قىلغان ئىدى. ئەنگلىيە ئاۋام پالاتاسى تاشقىي ئىشلار كومىتېتىنىڭ ئاشكارلىشىچە، ئەنگىلىيە ھۆكۈمىتى 14-نويابىر پارلامېنتنىڭ تاشقىي ئىشلار كومىتېتىغا دوكلات سۇنۇپ، ئۆزلىرىنىڭ بۇ مەسىلىدىكى سىياسىتىنى شەرھىيلىگەن.

تەپسىلاتى...

«شىنجاڭدىكى لاگېرلارنى ئىزدەش» ناملىق سىن كۆرۈنۈشىدىكى لاگېرلار كۈچلۈك غۇلغۇلا قوزغىدى

خەۋەر مەنبەسى: ئەركىن ئاسىيا

ئۆتكەن يىلى «باز فىد» (BuzzFeedNews)‏ خەۋەر تورى «خىتاي مۇسۇلمانلارنى تۈرمىگە سولاش ئۈچۈن ناھايىتى چوڭ مەخپىي يېڭى ئۇل ئەسلىھەلەرنى قۇردى» ناملىق بەش بۆلۈملۈك بىر تەكشۈرۈش دوكلاتى ئېلان قىلغانىدى. بۇ تەكشۈرۈش دوكلاتىدا ئۇلار خىتاينىڭ خەرىتە سۇپىسى بولغان بەيدۇ خەرىتىسىدىن كۆرۈنمەيدىغان قىلىپ قويۇلغان ئورۇنلارنىڭ لاگېرلار ئىكەنلىكىنى ئېنىقلىغانىدى. بۇ تەكشۈرۈش ماقالىسىنىڭ جۇغراپىيەلىك ئانالىزچىسى ئالىسون كېللىر ئۆزىنىڭ تىۋىتتېر ھېسابىدا «خىتاينىڭ قاتتىق نازارەت ۋە كونترول قىلىشى سەۋەبىدىن ژۇرنالىستلار ئۇيغۇر رايونىغا ئائىت ئۇچۇرلارغا ئېرىشىش قىيىن ئىدى. شۇڭا بىز سۈنئىي ھەمراھ تەسۋىرى سۈرىتىدىن پايدىلاندۇق» دەپ يازغان.

تەپسىلاتى...

لاگېر شاھىتلىرىنىڭ گېرمانىيەدە ئېلىپ بېرىۋاتقان گۇۋاھلىق بېرىش پائالىيىتى زور تەسىر قوزغىغان

خەۋەر مەنبەسى: ئەركىن ئاسىيا

ھازىر فرانسىيەدە ياشاۋاتقان لاگېر شاھىتى گۈلباھار ھېيتۋاجى بىلەن گوللاندىيەدىكى لاگېر شاھىتى قەلبىنۇر سىدىقنىڭ 11-ئاينىڭ 6-كۈنى گېرمانىيەنىڭ ميۇنخېن شەھىرىدە باشلانغان گۇۋاھلىق بېرىش پائالىيىتى داۋاملاشماقتا.

گېرمانىيەدىكى «ياۋروپا شەرقىي تۈركىستان بىرلىكى» نىڭ مەسئۇلى ئەسقەر جان ئەپەندىنىڭ بىلدۈرۈشىچە، خەلقئارا كەچۈرۈم تەشكىلاتى بىلەن ئاز سانلىق مىللەتلەرنى قوغداش تەشكىلاتى بىرلىتە ئۇيۇشتۇرغان بۇ پائالىيەت گېرمانىيە تاراتقۇلىرى، سىياسىيونلىرى ۋە ئاۋام خەلقنىڭ دىققىتىنى ئۇيغۇرلار مەسىلىسىگە قارىتىشنى مەقسەت قىلغان ئىكەن. يەنى بۇ پائالىيەت گېرمانىيە خەلقىنىڭ دىققەت-ئېتىبارىنى خىتاينىڭ ئۇيغۇرلارغا قارىتا ئېلىپ بېرىۋاتقان ئىرقىي قىرغىنچىلىقىغا تارتىش، شۇنداقلا بۇنى توختىتىش ئۈچۈن ھەرىكەتكە ئۆتۈشكە چاقىرىش ئىكەن.

تەپسىلاتى...

دولقۇن ئەيسا دۇنيا ئۇيغۇر قۇرۇلتىيىنىڭ يەنە بىر نۆۋەتلىك رەئىسى بولۇپ سايلاندى

خەۋەر مەنبەسى: ئەركىن ئاسىيا

چېخىيە پايتەختى پراگادا ئېچىلغان دۇنيا ئۇيغۇر قۇرۇلتىيىنىڭ 7-نۆۋەتلىك ۋەكىللەر قۇرۇلتىيىدا دولقۇن ئەيسا ئەپەندى يەنە بىر نۆۋەتلىك رەئىس بولۇپ سايلاندى.

14-نويابىر، يەنى د ئۇ ق نىڭ 7-نۆۋەتلىك ئومۇمىي قۇرۇلتىيىنىڭ ئەڭ ئاخىرىقى كۈنىدە ئومۇمىي سايلام ئېلىپ بېرىلدى. ۋەكىللەرنىڭ دېموكراتىك ئۇسۇلدا بېلەت تاشلىشى نەتىجىسىدە، دولقۇن ئەيسا ئەپەندى 198 ئاۋاز بىلەن د ئۇ ق نىڭ يەنە بىر نۆۋەتلىك رەئىسلىكىگە سايلاندى. سايلام نەتىجىسى ئېلان قىلىنغاندا، يىغىن زالىنى گۈلدۈراس ئالقىش سادالىرى قاپلىدى.

رەئىس سايلىمىدىن كېيىن، مۇئاۋىن رەئىسلەر سايلاپ چىقىلدى. تۈركىيە ھاجەتەپە ئۇنىۋېرسىتېتىنىڭ ئوقۇتقۇچىسى، ئىستراتېگىيە مۇتەخەسسىسى دوكتور ئەركىن ئەكرەم، ئامېرىكادىكى ئۇيغۇر كىشىلىك ھوقۇق قۇرۇلۇشىنىڭ تەتقىقاتچىسى زۇبەيرە شەمسىدىن خانىم ۋە گېرمانىيەدىن پەرھات مۇھەممىدى قاتارلىق ئۈچ كىشى د ئۇ ق نىڭ يېڭى نۆۋەتلىك مۇئاۋىن رەئىسلىكىگە سايلاندى. ئۇيغۇر كىشىلىك ھوقۇق قۇرۇلۇشىنىڭ دىرېكتورى ئۆمەر قانات ئەپەندى د ئۇ ق ئىجرائىيە كومىتېتىنىڭ رەئىسلىكىگە سايلاندى.

تەپسىلاتى...

د ئۇ ق 7-نۆۋەتلىك ئومۇمىي قۇرۇلتىيىنىڭ ئىككىچى كۈنىدە 4 يىللىق خىزمەتلەردىن دوكلات بېرىلگەن

خەۋەر مەنبەسى: ئەركىن ئاسىيا

چېخىيە پايتەختى پراگادا ئېچىلىۋاتقان دۇنيا ئۇيغۇر قۇرۇلتىيىنىڭ 7-نۆۋەتلىك ۋەكىللەر قۇرۇلتىيى بۈگۈن، يەنى 11-ئاينىڭ 13-كۈنى پۈتۈن ۋەكىللەرگە د ئۇ ق نىڭ 2017-يىلىدىن بۇيانقى 4 يىللىق خىزمەتلىرىدىن دوكلات بەرگەن.

قۇرۇلتاي كۈنتەرتىپى بويىچە، بۈگۈنكى يىغىنغا د ئۇ ق نىڭ مۇئاۋىن رەئىسى دوكتور ئەركىن ئەكرەم رىياسەتچىلىك قىلغان. ئالدى بىلەن د ئۇ ق نىڭ قۇرۇلۇشى ۋە تەرەققىياتىدا مۇھىم رول ئوينىغان ئەركىن ئالپتېكىن، ئەسقەر جان، فەرۇق سادىقوف قاتارلىق پېشقەدەملەرنىڭ كۆرسەتكەن خىزمەتلىرىگە مىنەتدارلىق بىلدۈرۈلۈپ، تەقدىرنامە بېرىلگەن. ئاندىن د ئۇ ق رەئىسى دولقۇن ئەيسا 2017-يىلىدىن بۇيانقى قۇرۇلتاينىڭ 4 يىللىق خىزمەتلىرىدىن ئومۇمىي دوكلات بەرگەن.

قۇرۇلتاينىڭ كۈنتەرتىپى بويىچە د ئۇ ق رەئىسى دولقۇن ئەيسانىڭ ئومۇمىي دوكلاتىدىن كېيىن، د ئۇ ق نىڭ ئىجرائىيە رەئىسى ئۆمەر قانات ئەپەندى د ئۇ ق ئىجرائىيە كومىتېتى تەركىبىدىكى ھەرقايسىي كومىتېتلارنىڭ 4 يىللىق خىزمەتلىرىدىن دوكلات بەرگەن. د ئۇ ق نىڭ مۇئاۋىن رەئىسى پەرھات مۇھەممىدى د ئۇ ق تەركىبىدىكى تەشكىلاتلارنىڭ خىزمەتلىرىدىن دوكلات بەرگەن. د ئۇ ق فوندىنىڭ مالىيەگە مەسئۇل خادىمى ئابدۇجېلىل ئەمەت ئەپەندى د ئۇ ق نىڭ 4 يىللىق كىرىم-چىقىم ئەھۋالىدىن دوكلات بەرگەن. د ئۇ ق نىڭ باش تەپتىشى ئابلىكىم ئىدرىس ئەپەندى د ئۇ ق نىڭ 4 يىللىق تەپتىش خىزمەتلەىرىدىن دوكلات بەرگەن.

تەپسىلاتى...

د ئۇ ق نىڭ 7-نۆۋەتلىك ئومۇمىي ۋەكىللەر قۇرۇلتىيى ئىككى جۇمھۇرىيەتنىڭ خاتىرە كۈنىدە باشلاندى

خەۋەر مەنبەسى: ئەركىن ئاسىيا

11-ئاينىڭ 12-كۈنى 1933-يىلى قۇرۇلغان شەرقىي تۈركىستان ئىسلام جۇمھۇرىيىتى ۋە 1944-يىلى قۇرۇلغان بىلەن شەرقىي تۈركىستان جۇمھۇرىيىتىنىڭ خاتىرە كۈنى بولۇپ، د ئۇ ق نىڭ 7-نۆۋەتلىك ئومۇمىي ۋەكىللەر قۇرۇلتىيى دەل مۇشۇ خاتىرە كۈندە چېخىيە پايتەختى پىراگادا ئىستىقلال مارشى بىلەن باشلاندى. يىغىنغا د ئۇ ق ئىجرائىيە كومىتېتىنىڭ رەئىسى ئۆمەر قانات ئەپەندى رىياسەتچىلىك قىلدى. د ئۇ ق رەئىسى دولقۇن ئەيسا ئەپەندى باشلىنىش نۇتۇقى سۆزلىدى. د ئۇ ق نىڭ قۇرغۇچى ئەزاسى ۋە سابىق رەئىسى ئەركىن ئالىپتېكىن ئەپەندى دولقۇن ئەيسادىن كېيىن تەكلىپكە بىنائەن سۆزگە چىقىپ، د ئۇ ق نىڭ تارىخى ۋە نۆۋەتتىكى شەرقىي تۈركىستان مەسىلىسى توغرىسىدا توختىلىپ ئۆتتى.

بۇ قېتىمقى قۇرۇلتايغا 150 ۋەكىلنىڭ بىۋاستە قاتنىشىدىغانلىقى، قالغان ۋەكىللەرنىڭ تور ئارقىلىق ئىشتىراك قىلىدىغانلىقى بەلگىلەنگەن بولسىمۇ، 25 دۆلەتتىن 200 دىن ئارتۇق ۋەكىل پىراگاغا يېتىپ كېلىپ، يىغىنغا قاتناشقان ئىدى. يىغىندا چېخىيە كېڭەش پالاتاسى تاشقىي ئىشلار كومىتېتىنىڭ رەئىسى پاۋېل فىشىر، ئامېرىكا خەلقئارا دىنىي ئىشلار كومىتېتىنىڭ مۇئاۋىن رەئىسى نۇرى تۈركەل، باۋارىيە پارلامېنتىنىڭ ئەزاسى ماركوس، ياۋروپا پارلامېنتىنىڭ ئەزاسى ماركىتا گىرىگورىۋا، فرانسىيە پارلامېنتىنىڭ ئەزاسى فرىدېرك دوما، كانادا پارلامېنتىنىڭ ئەزاسى سامىر زۇبەيرى، تۈركىيە پارلامېنتىنىڭ ئەزاسى ئۈمىد ياردىم قاتارلىق خانىملار ۋە ئەپەندىلەر نۇتۇقلار سۆزلەپ، خىتاينىڭ ئىرقىي قىرغىنچىلىق سىياسەتلىرىنى ھەرخىل نۇقتىلاردىن قاتتىق تەنقىدلەپ ئۆتتى ھەمدە شەرقىي تۈركىستان مەسىلىسىگە بولغان ھېسداشلىقلىرىنى ئىپادە قىلىشتى. زال ئىچىدە گۈلدىراس ئالقىش سادالىرى ئۈزۈلمىدى.

تەپسىلاتى...

12-نويابىر «شەرقىي تۈركىستان جۇمھۇرىيەت كۈنى» دە دۇنيادىكى مەشھۇر قۇرۇلۇشلار ئۇيغۇرلار ئۈچۈن كۆك رەڭدە يورۇتۇلدى

خەۋەر مەنبەسى: ئەركىن ئاسىيا

يېقىنقى بىر قانچە يىلدىن بۇيان فىرانسىيەدە ئۇيغۇرلارنى قوللاش ئۈچۈن ئېلىپ بېرىلغان ھەرىكەتلەر ئىزچىل داۋام قىلىپ كەلمەكتە ئىدى.

پارىژ شەھەر باشلىقى ئان ھېدالگو 2-ئۆكتەبىر ئۆزىنڭ تىۋېتتېر سۇپىسىدا ئۇيغۇرلارنى قوللايدىغانلىقنى بىلدۈرۈپ مۇنداق دەپ يازغان: «نۇرغۇن كىشىلەر بۇ شەنبە كۈنى ئۇيغۇرلارنى قوللاپ يۈرۈش قىلىدۇ، پارىژ شەھىرى زىيانكەشلىككە ئۇچرىغان ئۇيغۇرلار بىلەن بىر سەپتە تۇرىدۇ. پات يېقىندا پارىژدا بىر ئۇيغۇر ئۆيى ئېچىلىدۇ. پارىژ شەھەرلىك ھۆكۈمەت 12-نويابىر كۈنى ئۇيغۇر بايرىقىنىڭ رەڭگىدە يورۇتۇلىدۇ.»

12-نويابىر كۈنى، يەنى پۈتۈن دۇنيادىكى ئۇيغۇرلار ھەرخىل شەكىلدە جۇمھۇرىيەت بايرىمىنى قۇتلاۋاتقان بۈ كۈندە پارىژ شەھەرلىك ھۆكۈمەت بىناسى ھەقىقەتەنمۇ كۆك رەڭدە يورۇتۇلغان ۋە ھۆكۈمەت بىناسىنىڭ تېمىدىكى چوڭ ئىكرانغا «ئۇيغۇرلارغا ئەركىنلىك» دېگەن خەتلەر يېزىلغان.

ياۋروپا ئۇيغۇر ئىنستىتۇتىنىڭ مەسئۇلى، فىرانسىيەدىكى ئۇيغۇرلارنى قوللاش پائالىيەتلىرىنى تەشكىللىگۈچىلەرنىڭ بىرى دىلنۇر رەيھان خانىمنىڭ بىلدۈرۈشىچە، پارىژ شەھەرلىك ھۆكۈمەت دىلنۇر رەيھان خانىم، ياۋروپا پارلامېنتىنىڭ ئەزاسى، فىرانسىيەلىك رافائىل گىلۇكىسمەن ۋە ياردەمچىسى پىيەخ بۈسسىيەخ قاتارلىقلارنىڭ تەشەببۇسى بىلەن پارىژ شەھەرلىك ھۆكۈمەت بىناسىنى شەرقىي تۈركىستان بايرىقىنىڭ رەڭگى بولغان كۆك رەڭدە بوياشنى قارار قىلغان.

تەپسىلاتى...

د ئۇ ق 7-نۆۋەتلىك ئومۇمىي ۋەكىللەر قۇرۇلتىيىنىڭ ئېچىلىش مۇراسىمى پراگادا داغدۇغۇلۇق ئۆتكۈزۈلدى

خەۋەر مەنبەسى: ئەركىن ئاسىيا

11-نويابىر كۈنى د ئۇ ق نىڭ 7-نۆۋەتلىك ئومۇمىي ۋەكىللەر قۇرۇلتىيىغا قاتنىشىش ئۈچۈن دۇنيانىڭ ھەرقايسىي ئەللىرىدىكى 25 دۆلەتتىن كەلگەن ئۇيغۇر ۋەكىللەر ۋە چەت ئەللىك شەرەپ مېھمانلىرى چېخىيە پايتەختى پىراگا شەھىرىدىكى گراندىئور مېھمانخانىسىغا جەم بولدى. چۈشتىن كېيىن سائەت 18:00 دىن باشلاپ مېھمانخانىنىڭ چوڭ زالىدا «ئۇيغۇر ئاۋازى رەسىم كۆرگەزمىسى»، «ئۇيغۇر ئاۋازى كىتاب يەرمەنكىسى» پائالىيىتى ئۇيۇشتۇرۇلۇش بىلەن بىرگە، 7-قۇرۇلتاينىڭ ئېچىلىش مۇراسىمى ئۆتكۈزۈلدى.

د ئۇ ق نىڭ 7-نۆۋەتلىك ئومۇمىي ۋەكىللەر قۇرۇلتىيىنىڭ ئېچىلىش مۇراسىمىغا د ئۇ ق پروگرامما يېتەكچىسى زۇمرەتئاي رىياسەتچىلىك قىلدى. مۇراسىمدا د ئۇ ق رەئىسى دولقۇن ئەيسا، چېخىيە پارلامېنتى كېڭەش پالاتاسىنىڭ مۇئاۋىن رەئىسى جىرى ئوبېرفالتسىر، گېرمانىيە پارلامېنت ئەزاسى روزىن مىللار، تۈركىيەلىك ئادۋوكات ئىلياس دوغان، چېخىيەدىكى «مۇنبەر 2000» نىڭ ئىجرائىيە مۇدىرى ياكوب كىلېپال، تۈركىيە پارلامېنت ئەزاسى مېتىن كېسەر قاتارلىقلار نۇتۇق سۆزلەپ، 7-قۇرۇلتايغا ئۇتۇقلار تىلىدى ۋە شەرقىي تۈركىستان خەلقىنىڭ خىتاي ئاسارىتىدىن، جازا لاگېرلىرىدىن تېزراق قۇتۇلۇپ، ئەركىنلىك، ھۆرلۈكتىن ئىبارەت ئەقەللىي ھەقلىرىگە بىر قەدەم بولسىمۇ بالدۇرراق ئېرىشىشىگە تىلەكداشلىق بىلدۈردى. يەنە بىر قىسىم شەرەپ مېھمانلىرىمۇ مۇراسىمدا سۆز ئېلىپ، خىتاي ھاكىمىيىتىنىڭ ئۇيغۇرلار ئۈستىدىن يۈرگۈزىۋاتقان «ئىرقىي قىرغىنچىلىق» ۋە «ئىنسانىيەتكە قارشى جىنايەت» لىرىنى قاتتىق ئەيىبلىدى.

تەپسىلاتى...

«ئائىلىڭىز بەدەل تۆلەيدۇ!» : خىتاينىڭ چەت ئەللەردىكى ئۇيغۇرلارغا سوزۇلغان قارا قولى ھەققىدە دوكلات ئېلان قىلىندى

خەۋەر مەنبەسى: ئەركىن ئاسىيا

10-نويابىر ئۇيغۇر كىشىلىك ھوقۇق قۇرۇلۇشى ۋە «ئوكسۇس» (Oxus ئامۇ دەرياسىنىڭ قەدىمكى يۇنان تىلىدىكى ئاتىلىشى) نامىدىكى ئوتتۇرا ئاسىيا ئىشلىرى جەمئىيىتى بىرلىكتە «ئائىلىڭىز بەدەل تۆلەيدۇ: خىتاينىڭ ئەركىن دېموكراتىك دۆلەتلەردىكى ئۇيغۇرلارنىڭ شەخسىي ئۇچۇرلىرىنى تەقىپ قىلىشى ۋە ئۇلارغا قورقۇنچ سېلىشى» سەرلەۋھەلىك 65 بەتلىك بىر دوكلات ئىلان قىلدى.

ئۇيغۇر كىشىلىك ھوقۇق قۇرۇلۇشىنىڭ تور بېتىدە بېرىلگەن مەلۇماتلارغا قارىغاندا، مەزكۇر دوكلات ئۇيغۇر كىشىلىك ھوقۇق قۇرۇلۇشى بىلەن «ئوكسۇس» ئوتتۇرا ئاسىيا جەمئىيىتى بىرلىكتە «خىتاينىڭ ئۇيغۇرلارغا قارىتىلغان دۆلەت ھالقىغان باستۇرۇشى» ھەققىدە توپلىغان ئىلگىرىكى سانلىق مەلۇماتلىرىغا ئاساسەن كېڭەيتىلگەن ئىكەن. بۇ يېڭى تەتقىقاتقا 19 يىل ئىچىدە 22 دۆلەتتىكى خىتاينىڭ «1-دەرىجىلىك دۆلەت ھالقىغان باستۇرۇشى» نىڭ زىيانكەشلىكىگە ئۇچرىغان 5530 مىسال قوشۇلغان. «1-دەرىجىلىك دۆلەت ھالقىغان باستۇرۇش» شەخسلەر ۋە ئائىلە ئەزالىرىغا خىتاي دائىرىلىرى تەرىپىدىن كەلگەن ئاگاھلاندۇرۇش ۋە تەھدىدلەرنى، خىتاي دائىرىلىرى ياكى ئىنتېرپول قاتارلىق خەلقئارالىق تەشكىلاتلار ئارقىلىق چىقىرىلغان تۇتۇش بۇيرۇقى قاتارلىقلارنى ئۆز ئىچىگە ئالىدىكەن. دوكلاتتا قورقۇتۇش ۋە پاراكەندىچىلىك سېلىش ۋەقەلىرىنىڭ كۆپىنچىسىنڭ خەۋەر قىلىنمايدىغانلىقى ۋە بۇ خىل پاراكەندىچىلىككە ئۇچرىغان ئۇيغۇرلارنىڭ سانىنىڭ تەكشۈرۈپ ئېنىقلانغاندىنمۇ كۆپ بولۇشى مۇمكىنلىكى تەكىتلەنگەن.

تەپسىلاتى...

ئەنگىلىيەدىكى مۇسۇلمانلار ئۇيغۇرلارنى قوللاپ 5000 كىشىلىك نامايىش ئۆتكۈزگەن

خەۋەر مەنبەسى: ئەركىن ئاسىيا

11‏-ئاينىڭ 13‏-كۈنى ئەنگىلىيەدىكى نوپۇزلۇق مۇسۇلمان تەشكىلاتلىرىنىڭ 50 دىن ئارتۇق بىرلەشمىسى لوندوندا 5000 كىشىلىك نامايىش تەشكىللەپ، خىتاينىڭ يىللاردىن بۇيان ئۇيغۇرلارغا يۈرگۈزۈپ كېلىۋاتقان «ئىرقىي قىرغىنچىلىقى» نى ئەيىبلىگەن. ئۇلار بۇ نامايىش ئارقىلىق دۇنيانىڭ دىققىتىنى ئۇيغۇر مەسىلىسىگە قارىتىشنى مەقسەت قىلغان.

نامايىشچىلار لوندوندىكى خىتاي ئەلچىخانىسى بىلەن مانچېستېردىكى خىتاي كونسۇلخانىسىنىڭ ئالدىغا يىغىلىپ، خىتاي دائىرىلىرىنىڭ ئۇيغۇر خەلقىگە ئېلىپ بېرىۋاتقان ئىرقىي قىرغىنچىلىقىنى توختىتىشنى تەلەپ قىلغان.

بۇ قېتىملىق نامايشقا قاتناشقان مۇسۇلمان تەشكىلاتلىرىنىڭ ئاساسلىقى ھەرقايسىي رايونلۇق مەسچىتلەر، مۇسۇلمان تەشكىلاتلىرى، ئوقۇغۇچىلار جەمئىيىتى، ئىلمىي ئورگانلار، تەشۋىقات گۇرۇپپىلىرى ۋە ئاخبارات سۇپىلىرىدىن تەركىب تاپقانلىقى مەلۇم.

ئىگىلىمىزچە بۇ قېتىملىق زور نامايىشقا ئەنگىلىيەدىكى ئەل-ئەنسار مەسچىتى، ئەل-مەرىفاھ فوندى جەمئىيىتى، بىراكىنېل ئىسلام مەدەنىيەت مەركىزى، ئەنگىلىيە مۇسۇلمانلىرىنىڭ مىراس مەركىزى، شەرقىي لوندۇن مەسچىتى ۋە لوندۇن مۇسۇلمانلار مەركىزى، گىرلىڭتون مۇسۇلمانلار پاراۋانلىق جەمئىيىتى، يىشىل يول مەسچىتى، گىرىنىۋىچ ئىسلام مەركىزى، ياۋروپا ئىسلام كېڭىشى، ئىسلام تورى، ئىسلامىي تەربىيە ئاكادېمىيەسى، ئەنگىلىيە مۇسۇلمانلار كېڭىىشى، نوربۇرىي مۇسۇلمانلار تېنىچلىق مەركىزى، لىيچېستىر مەسچىتى كوردۇبد فوندى ئىسلام مەركىزى، غەربىي لوندۇن ئىسلام مەدەنىيەت مەركىزى، ۋېتتون ئىسلام مەركىزى، ۋېيكومبو ئىسلام جەمئىيىتى، ياسىن ياشلار ساياھەت گۇرپىسى قاتارلىق نوپۇزلۇق مۇسۇلمان تەشكىلاتلىرىنىڭ رەھبەرلىرى ۋە ئۇلارنىڭ قوللىغۇچىلىلىرى قاتناشقان.

تەپسىلاتى...