«ئۇيغۇر مەجبۇرىي ئەمگىكىنىڭ ئالدىنى ئېلىش قانۇنى» نىڭ ئىشقا كىرىشتۈرۈلۈشى، خىتاي-ئامېرىكا سودا تەمىنلەش زەنجىرىگە كۈچلۈك تەسىر كۆرسىتىدىكەن

خەۋەر مەنبەسى: ئەركىن ئاسىيا

13-ئىيۇن كۈنى ئامېرىكا تاموژنا ۋە چېگرا قوغداش ئىدارىسى (CBP) ئامېرىكادىكى ئىمپورت شىركەتلەرگە ئۇقتۇرۇش خېتى ئەۋەتىپ، «ئۇيغۇر مەجبۇرىي ئەمگىكىنىڭ ئالدىنى ئېلىش قانۇنى» نىڭ بۇ يىل 21-ئىيۇندىن باشلاپ ئىجرا قىلىنىدىغانلىقىنى، بۇنىڭدا ئۇيغۇر ئېلىدا ئىشلەپچىقىرىلغان ھەرقانداق مەھسۇلاتنىڭ مەجبۇرىي ئەمگەك بىلەن ئىشلەپچىقىرىلمىغانلىقىنى ئىسپاتلاش تەلەپ قىلىدىغانلىقىنى ئۇقتۇرغان.

ئامېرىكانىڭ كالىفورنىيە شتاتىدىكى ئەڭ چوڭ ئىمپورت-ئېكسپورت شىركەتلىرى جايلاشقان لوس-ئانجېلېس پورتىدىكى كالىفورنىيە يەرشارى ئىمپورت-ئېكسپورت شىركىتىنىڭ ئالاقە خادىمى، ئىسمىنى ئاشكارىلىماسلىق شەرتى بىلەن غەيرى رەسمىي يوسۇندا زىيارىتىمزنى قوبۇل قىلدى. ئۇ تەمىنلىگەن ئۇچۇرغا قارىغاندا، بۇ شىركەتمۇ 13-ئىيۇن ئامېرىكا تاموژنا ۋە چېگرا قوغداش ئىدارىسى چۈشۈرگەن «ئۇيغۇر مەجبۇرىي ئەمگىكىنىڭ ئالدىنى ئېلىش قانۇنى» نى ئىجرا قىلىش قوللانمىسى ھەققىدىكى ئوقتۇرۇشنى تاپشۇرۇپ ئالغان. ئۇلار خىتايدىن مال ئىمپورت قىلغۇچى شىركەتلەرگە قەرەللىك تۈردە مەكتۇپ يوللاپ، مەجبۇرىي ئەمگەك مەھسۇلاتلىرى توغرىلىق ئۇچۇر ۋە كۆرسەتمە بېرىدىكەن. ئەگەر مال ئىمپورت قىلغۇچى شىركەتلەر «ئۇيغۇر مەجبۇرىي ئەمگىكىنىڭ ئالدىنى ئېلىش قانۇنى» غا خىلاپلىق قىلسا، ماللارنىڭ تۇتۇپ قىلىنىدىغانلىقى، مۇسادىرە قىلىنىدىغانلىقى ياكى جەرىمانە قويۇلىدىغانلىقى توغرىلىق ئاگاھلاندۇرۇش بېرىلگەن.

تەپسىلاتى...

د ئۇ ق نىڭ 5 -ئىيۇل ئۈرۈمچى قىرغىنچىلىقىنىڭ 13-يىللىقىنى پۈتۈن دۇنيا مىقياسىدا كەڭ كۆلەمدە خاتىرىلەش ھەققىدىكى چاقىرىقى !

ئەزىز قېرىنداشلار، 5 – ئىيۇل ئۈرۈمچى قىرغىنچىلىقىنىڭ 13- يىللىقى يېتىپ كېلىش ئالدىدا تۇرماقتا، سىلەرگە مەلۇم بولغىنىدەك، 2009 – يىلى يۈزبەرگەن 5 – ئىيۇل ئۈرۈمچى قىرغىنچىلىقى، شەرقىي تۈركىستاننىڭ يېقىنقى زامان تارىخىدىكى ئەڭ زور قانلىق ھادىسىلەرنىڭ بىرىدىن ئىبارەت.
شۇ كۈنى باشلانغان ئىرقىي قىرغىنچىلىقتىن بۇيان، ئۆز خەلقىنىڭ مىللىي ۋە ئىنسانىي ھەق – ھوقۇقلىرىنى تەلەپ قىلغۇچى مىڭلىغان بىگۇناھ ئۇيغۇر مۇستەبىت خىتاي ھاكىمىيىتى ۋە بۇ ھاكىمىيەتنىڭ چوماقچىلىرى ھېسابلانغان فاشىست خىتاي كۆچمەنلىرى تەرىپىدىن ۋەھشىيلەرچە ئۆلتۈرۈلدى، مىليونلىغان بىگۇناھ ئۇيغۇر تۇتقۇن قىلىنىپ قاراڭغۇ زىندانلارغا ۋە جازا لاگېرلىرىغا ۋە مەجبۇرى ئەمگەك مەيدانلىرىغا مەھكۇم قىلىندى.
بولۇپمۇ كېيىنكى يىللاردىن بۇيان مۇستەبىت خىتاي ھاكىمىيىتىنىڭ ئۇيغۇرلارنىڭ مىللىي كىملىكىنى پۈتۈنلەي يوقىتىش مەقسىتىدە ئېلىپ بېرىۋاتقان ئىرقىي قىرغىنچىلىق جىنايى قىلمىشلىرى يۇقىرى پەللىگە چىقتى، پۈتۈن شەرقىي تۈركىستان زېمىنى ھەقىقىي بىر ئۈستى ئوچۇق ناتسىستلارنىڭ لاگېرىغا ئايلاندى، مىليونلىغان بىگۇناھ قېرىنداشلىرىمىز خىتاينىڭ زىندانلىرىدا ۋە جازالاش لاگېرلىرىدا جان تالاشماقتا، زىندانلاردىن ۋە ناتسېس لاگېرىغا ھەر كۈنى دېگۈدەك شېھىت خەۋەرلىرى كەلمەكتە، قانغا بويالغان شەرقىي تۈركىستان زېمىنىدا بۈگۈن خەلقىمىزنىڭ ئاھۇ – زارى ۋە دات -پەريادلىرى يۈرەكنى لەرزىگە سالماقتا.
تېخى يېقىندىلا ئاشكارىلانغان«شىنجاڭ ساقچى ھۆججەتلىرى» ۋەتەن ئىچىدىكى خەلقىمىزنىڭ نەقەدەر زور يوقۇلۇش خەۋپىگە دۇچ كېلىۋاتقانلىقىنى خەلقئارا جامائەتچىلىك ئالدىدا يەنە بىر قېتىم تولۇق دەلىللەپ بەردى.

5 – ئىيۇل شېھىتلىرىنى، جۈملىدىن شەرقىي تۈركىستان خەلقىنىڭ ئەركىنلىكى ۋە ھۆرلۈكىنى قولغا كەلتۈرۈش يولىدا قىممەتلىك ھاياتلىرىنى تەقدىم قىلغان باتۇر ئوغۇل – قىزلىرىمىزنى يات ئېتىش ، ئۇلارغا ئېھتىرام بىلدۈرۈش ۋە خىتاي ھاكىمىيىتىنىڭ خەلقىمىزگە قارىتا رەھىمسىزلەرچە يۈرگۈزۈۋاتقان ئىرقىي قىرغىنچىلىقىنى دۇنيا جامائەتچىلىكى ئالدىدا پاش قىلىش بولسا بىز چەتئەللەردە ياشاۋاتقان بارلىق شەرقىي تۈركىستانلىقلارنىڭ ۋىجدانى، ئىنسانىي ۋە مىللىي بۇرچىمىزدىن ئىبارەت.
ئۈرۈمچى قىرغىنچىلىقىنىڭ 13 – يىللىقىنى پۈتۈن دۇنيا مىقياسىدا كەڭ كۆلەمدە خاتىرىلەش ۋە بۇ ئارقىلىق كوممۇنىست خىتاي ھاكىمىيىتىنىڭ ئۇيغۇر خەلقى ئۈستىدىن يۈرگۈزۈۋاتقان ئىنسان قېلىپىدىن چىققان ئىرقىي قىرغىنچىلىقىنى، بېسىم ۋە زۇلۇم سىياسىتىنى، شۇنداقلا مىللىي مەۋجۇتلۇقى تارىختىن بۇيان كۆرۈلۈپ باقمىغان دەرىجىدە جىددىي يوقۇلۇش تەھدىتىگە دۇچ كېلىۋاتقان خەلقىمىزنىڭ يۈرەك ساداسىنى دۇنيا جامائەتچىلىكىگە تېخىمۇ ئۈنۈملۈك ۋە جانلىق شەكىلدە ئاڭلىتىش بولسا قۇرۇلتىيىمىزنىڭ نۆۋەتتىكى ئەڭ ئاساسلىق ۋەزىپىسى ۋە كۈنتەرتىپىدىن ئىبارەت، ئۈرۈمچى قىرغىنچىلىقىنىڭ 13 – يىللىقىنى خاتىرىلەش پائالىيىتىنى پۈتۈن دۇنيا مىقياسىدا مۇستەبىت كوممۇنىست خىتاي ھاكىمىيىتىگە قارشى زور كۆلەملىك نارازىلىق ھەرىكىتىگە ئايلاندۇرۇشىمىز لازىم.
شۇنىڭ ئۈچۈن، دۇنيا ئۇيغۇر قۇرۇلتىيى رەھبەرلىك ھەيئىتى ، 5 – ئىيۇل ئۈرۈمچى قىرغىنچىلىقنىڭ 13 – يىللىقىنى خاتىرىلەش ھەققىدە تۆۋەندىكىدەك قارارلارنى ئالدى :
بىرىنچى : يېقىندا ئاشكارىلانغان ۋە خەلقئارادا ئىنتايىن زور تەسىر قوزغىغان «شىنجاڭ ساقچى ھۆججەتلىرى» بۇ قېتىمقى ئۈرۈمچى قىرغىنچىلىقىنىڭ 13 – يىللىقىنى خاتىرىلەش پائالىيىتىنىڭ ئاساسلىق شوئارى ۋە يېتەكچى ئىدىيەسى قىلىنىدۇ، بۇ سەۋەبتىن «شىنجاڭ ساقچى ھۆججەتلىرى» دە ئورۇن ئالغان ئېچىنىشلىق كۆرۈنۈشلەر دۇنيا ئۇيغۇر قۇرۇلتىيى تەرىپىدىن مەخسۇس سۈرەتلىك چۈشەندۈرۈش قىلىپ ئىشلەندى، ھەرقايسى ئەللەردە ئېلىپ بېرىلىدىغان نارازىلىق ۋە خاتىرىلەش پائالىيەتلىرىدە بۇ كۆرۈنۈشلەرنى بىر تۇتاش ھالدا قوللۇنۇشى ئۈچۈن قۇرۇلتىيىمىز تەشكىلاتلىرىمىزنى ۋە سىياسىي پائالىيەتچىلىرىمىزنى بۇ ئۆلچەملىك كۆرۈنۈشلەر بىلەن تەمىنلەيدۇ.
ئىككىنچى : ئۈرۈمچى قىرغىنچىلىقىنىڭ 13 -يىللىقى مۇناسىۋىتى بىلەن «شىنجاڭ ساقچى ھۆججەتلىرى» ئاساسىدا ب د ت كىشىلىك ھوقۇق كومىتېتىغا ، ياۋروپا ئىتتىپاقى ۋە ياۋروپا پارلامېنتىغا ۋە ئامېرىكا باشچىلىقىدىكى غەرب ئەللىرىنىڭ ھۆكۈمەت ۋە پارلامېنتلىرىغا، شۇنداقلا ھەرقايسى خەلقئارالىق كىشىلىك ھوقۇق تەشكىلاتلىرىغا دۇنيا ئۇيغۇر قۇرۇلتىيى نامىدىن خىتاينىڭ ئۇيغۇرلارغا قارىتا يۈرگۈزۈۋاتقان ئىرقىي قىرغىنچىلىقى، زۇلۇم ۋە بېسىم سىياسىتى پاش قىلىنغان مەزمۇندا نارازىلىق مەكتۇپى يوللىنىدۇ، ھەرقايسى ئەللەردە پائالىيەت ئېلىپ بېرىۋاتقان تەشكىلاتلىرىمىز ۋە سىياسىي پائالىيەتچىلىرىمىزنىڭ قۇرۇلتىيىمىز تەرىپىدىن بۇ ھەقتە ھازىرلانغان بايانات ۋە نارازىلىق مەكتۇپىنى بىرتۇتاش ھالدا قوللىنىشىنى ئۈمىد قىلىمىز.

ئۈچىنچى : ھەرقايسى ئەللەردە پائالىيەت ئېلىپ بېرىۋاتقان تەشكىلاتلىرىمىز ۋە سىياسىي پائالىيەتچىلىرىمىزنىڭ قۇرۇلتىيىمىز تەرىپىدىن بىر تۇتاش ھالدا ھازىرلانغان نارازىلىق مەكتۇپى ئاساسىدا ئۈرۈمچى قىرغىنچىلىقىنىڭ 13 – يىللىقى مۇناسىۋىتى بىلەن ئۆزلىرى تۇرۇشلۇق دۆلەتلەرنىڭ ھۆكۈمەت ۋە پارلامېنتىغا ، شۇنداقلا ئۆزلىرى تۇرۇشلۇق دۆلەتلەردە پائالىيەت ئېلىپ بېرىۋاتقان ھەرقايسى كىشىلىك ھوقۇق تەشكىلاتلىرى ۋە ئاممىۋىي تەشكىلاتلارغا مۇستەبىت خىتاي ھاكىمىيىتىنىڭ خەلقىمىز ئۈستىدىن يۈرگۈزۈۋاتقان ئىرقىي قىرغىنچىلىقلار پاش قىلىنغان نارازىلىق مەكتۇپى يوللىشىنى ئىلتىماس قىلىمىز.

تۆتىنچى : ئۈرۈمچى قىرغىنچىلىقىنىڭ 13 – يىللىقى مۇناسىۋىتى بىلەن، ھەرقايسى تەشكىلات ۋە جامائەتلىرىمىزنىڭ ئۆزلىرى تۇرۇۋاتقان دۆلەتلەردىكى تۈرك – ئىسلام تەشكىلاتلىرىنى، كىشىلىك ھوقۇق تەشكىلاتلىرىنى ۋە باشقا ئاممىۋىي گۇرۇپپىلارنى سەپەرۋەرلىككە كەلتۈرۈپ، ئۇلارنىڭ ھەمكارلىقى ۋە قاتنىشىشىدا بىر تۇتاش ھالدا خىتايغا قارشى كەڭ كۆلەملىك بىرلەشمە نارازىلىق نامايىش ئۇيۇشتۇرۇشنى تەلەپ قىلىمىز؛

بەشىنچى : ئۈرۈمچى قىرغىنچىلىقى يۈزبەرگەن 5 – ئىيۇل كۈنىدىن 7 – ئىيۇل كۈنىگىچە، دۇنيانىڭ ھەرقايسى ئەللىرىدە ياشاۋاتقان ئۇيغۇرلار ئەگەر ئۆزى تۇرۇشلۇق دۆلەتلەرنىڭ قانۇنى يول قويسا، ئۆيىنىڭ بالكونلىرىغا ۋە ماشىنىلىرىغا بىردەك ھالدا شەرقىي تۈركىستاننىڭ ئاي – يۇلتۇزلۇق كۆك بايرىقىنى قاداشقا تىرىشىشى ۋە بۇ ئارقىلىق ئۆزلىرىنىڭ خىتايغا بولغان نارازىلىقلىرىنى بىلدۈرۈشى لازىم.

ئالتىنچى : پۈتۈن شەرقىي تۈركىستان تەشكىلاتلىرى ۋە سىياسىي پائالىيەتچىلىرىمىز، 5 -ئىيۇل كۈنىدىن ئېتىبارەن 3 كۈنگىچە ئۆزلىرى باشقۇرۇۋاتقان ئىنتېرنېت سەھىپىلىرىنى، ئىجتىمائىي تاراتقۇلىرىنى قارايتىشىنى ۋە رەڭسىز شەكىلدە داۋاملاشتۇرۇشىنى تەلەپ قىلىمىز.

يەتتىنچى : دۇنيانىڭ ھەرقايسى جايلىرىدا ياشاۋاتقان ئۇيغۇر قېرىنداشلىرىمىزدىن ئۈرۈمچى قىرغىنچىلىقى يۈزبەرگەن 7 – ئاينىڭ 5 – كۈنىدىن باشلاپ بىر ھەپتىگىچە توي – تۆكۈن ئۆتكۈزمەسلىك، ئولتۇرۇش ۋە تۈرلۈك شەكىلدىكى كۆڭۈل ئېچىش پائالىيەتلىرىنى ئېلىپ بارماسلىق ئارقىلىق، ئۆزلىرىنىڭ 5 – ئىيۇل شېھىتلىرىگە بولغان تەزىيەسى ۋە ھۆرمىتىنى ئىزھار قىلىشنى ئىلتىماس قىلىمىز.

سەككىزىنچى : د ئۇ ق دىنىي ئىشلار كومىتېتىنىڭ بىر تۇتاش تەشكىللىشى ئاستىدا، 5 – ئىيۇل كۈنى دۇنيانىڭ ھەرقايسى ئەللىرىدە بىر تۇتاش ھالدا 5 – ئىيۇل شېھىتلىرىنى ياد ئېتىش ، ئۇلارنىڭ روھى ئۈچۈن نەزىر -چىراغ ۋە دۇۋا – تەكبىر پائالىيەتلىرىنى ئۇيۇشتۇرۇش لازىم، بولۇپمۇ نامايىش قىلىش ئىمكانىيىتى بولمىغان دۆلەتلەردىكى تەشكىلاتلىرىمىز ۋە سىياسىي پائالىيەتچىلىرىمىز بۇ پائالىيەتكە ئالاھىدە ئەھمىيەت بېرىشى، ھازىردىن ئېتىبارەن تەييارلىق خىزمەتلىرىنى جىددىي باشلىشى لازىم.

توققۇزىنچى: د ئۇ ق مەركىزى ئورگىنى ۋە د ئۇ ق تەركىبىدىكى تەشكىلاتلار ئۆزلىرى بىلەن يېقىن مۇناسىۋەتتە بولغان چەتئەللىك ئاخباراتچىلار ۋە مۇخبىرلارنى سەپەرۋەرلىككە كەلتۈرۈپ، 5- ئىيۇل ئۈرۈمچى قىرغىنچىلىقىنىڭ 13 -يىللىقى مۇناسىۋىتى بىلەن ئاساسلىق چەتئەل مەتبۇئاتلىرىدا مەخسۇس خەۋەر – ماقالىلەر ۋە ئوبزورلارنى ئېلان قىلىنىشىنى قولغا كەلتۈرۈشى ۋە ھازىردىن باشلاپ ئۇلارنى تۈرلۈك ماتېرىيال مەنبەلىرى بىلەن تەمىنلەشكە كاپالەتلىك قىلىش لازىم.

ئەزىز قېرىنداشلار، ۋەتەن ئىچىدىكى خەلقىمىز شۇنچە زور بېسىم ، تەھدىت ۋە قىرغىنچىلىقلارغا پىسەنت قىلماي، پۈتۈن مىللىتىمىزنىڭ ئەركىنلىكى ۋە ھۆرلۈكى ئۈچۈن ئەزىز جانلىرىنى قۇربان قىلىۋاتىدۇ، دەھشەتلىك قاراڭغۇ زىندانلارغا ۋە ناتسېس لاگېرىغا مەھكۇم بولۇۋاتىدۇ، شۇڭا بىز ئەركىن دۆلەتتە ياشاۋاتقان بارلىق ئۇيغۇرلار ۋەتەن ئىچىدىكى خەلقىمىز بىلەن بىر تەن، بىر ۋۇجۇد بولۇپ، ئۇلارنىڭ قايغۇسىغا ئورتاق بولۇشىمىز لازىم !

مىللىي غۇرۇرىڭىزنى ، ۋىجدانىڭىزنى، ۋەتەنپەرۋەرلىكىڭىزنى ۋە ئىمانىڭىزنى سىنايدىغان پەيت كەلدى، شېھىتلىرىمىزنىڭ ھەققى – ھۆرمىتى ئۈچۈن، ھېچقانداق باھانە -سەۋەب كۆرسەتمەي، د ئۇ ق نىڭ تەشكىللىشىدە دۇنيا مىقياسىدا ئېلىپ بېرىلىدىغان 5 -ئىيۇل ئۈرۈمچى قىرغىنچىلىقىنىڭ 13 – يىللىقىنى خاتىرىلەش پائالىيەتلىرىگە ئاكتىپلىق بىلەن قاتنىشىشقا غەيرەت قىلىڭ !

دۇنيا ئۇيغۇر قۇرۇلتىيى
20.06.2022

تەپسىلاتى...

د ئۇ ق ئوقۇغۇچىلار نامايىشىنىڭ 34 يىللىقى مۇناسىۋىتى بىلەن بايانات ئېلان قىلدى

خەۋەر مەنبەسى: ئەركىن ئاسىيا

بۇندىن 34 يىل بۇرۇن ئۈرۈمچىدە مەيدانغا كەلگەن ئالىي مەكتەپ ئوقۇغۇچىلىرىنىڭ نامايىشىنى خىتاي ھۆكۈمىتى «15-ئىيۇن جېدەل چىقىرىش ۋەقەسى» دەپ ئاتىغانىدى. بۈگۈن «شىنجاڭ ئۇنىۋېرسىتېتى» ئوقۇغۇچىلىرىنىڭ 1988-يىلى ئۈرۈمچىدە «مىللىي كەمسىتىشكە قارشى تۇرۇش» شوئارى ئاستىدا ئېلىپ بارغان نامايىشىغا دەل 34 يىل بولدى. بۇ نامايىش ئەينى ۋاقىتتا ئۈرۈمچى كوچىلىرىنى لەرزىگە سېلىپ، ھۆكۈمەت دائىرىلىرىنى قاتتىق چۆچۈتكەن ۋە تەسىرى پۈتۈن ئۇيغۇر دىيارىغا تاالغان بىر نامايىش بولغانىدى. بۇ مۇناسىۋەت بىلەن د ئۇ ق ئىنگلىز ۋە ئۇيغۇر تىللىرىدا بايانات ئېلان قىلىپ، خىتاينىڭ ئۇيغۇرلارغا ئېلىپ بېرىۋاتقان كەمسىتىش، بېسىم ۋە ئادالەتسىزلىك سىياسىتىنىڭ 34 يىل بۇرۇنمۇ مەۋجۇت ئىكەنلىكىنى، بۈگۈنكى كۈندە كەلگەندە خىتاينىڭ بۇ سىياسىتىنى «ئىرقىي قىرغىنچىلىق» قا ئايلاندۇرغانلىقىنى تەكىتلىگەن. باياناتنىڭ ئاخىرىدا د ئۇ ق ئەينى چاغدىكى مىللىي ھەرىكەتكە باشلامچىلىق قىلغان ۋە قاتناشقان پىداكارلارغا چەكسىز ھۆرمىتىنى بىلدۈرىدىغانلىقى بىلدۈرۈلگەن.

تەپسىلاتى...

47 دۆلەت ب د ت دا ئۇيغۇرلار ۋە جازا لاگېرلىرى مەسىلىسىنى تەكرار ئوتتۇرىغا قويغان

خەۋەر مەنبەسى: ئەركىن ئاسىيا

گېرمانىيە ئاخبارات ۋاستىلىرىدىكى خەۋەرلەردىن مەلۇم بولۇشىچە، 14-ئىيۇن جەنۋەدە ئۆتكۈزۈلگەن ب د ت كىشىلىك ھوقۇق كېڭىشىنىڭ 50-نۆۋەتلىك يىغىنىدا 47 دۆلەت بىرلەشمە بايانات ئېلان قىلىپ، خىتاينىڭ جازا لاگېرلىرى مەسىلىسىنى يەنە بىر قېتىم ئوتتۇرىغا قويغان. باياناتتا 1 مىليوندىن ئارتۇق ئۇيغۇرنىڭ جازا لاگېرلىرىغا قامىلىپ، «قايتا تەربىيە ئېلىش» قا مەجبۇرلىنىۋاتقانلىقى، ئۇيغۇرلارنىڭ مەدەنىيەت ۋە دىنىي ئىتىقادىنىڭ چەكلىمىلەرگە ئۇچراۋاتقانلىقى، پەرزەنتلەرنىڭ ئاتا-ئانىسىدىن مەجبۇرىي ئايرىۋېتىلگەنلىكى ۋە تەن جازاسىغا دۇچار بولۇۋاتقانلىقى، تۇتقۇنلارنىڭ «يولۋاس ئورۇندۇق» قا ئولتۇرغۇزۇلۇپ قىينىلىۋاتقانلىقى، ئاشكارا بولغان مەخپىي ھۆججەتلەرنىڭ بۇنىڭغا ئائىت دەلىل-ئىسپاتلارنى يېتەرلىك دەرىجىدە كۆرسىتىپ بەرگەنلىكى قاتارلىق مەسىلىلەر تىلغا ئېلىنغان.

تەپسىلاتى...

ياۋروپا پارلامېنتى خىتاينىڭ ئۇيغۇر رايونىدىكى جىنايەتلىرىنى «ئېغىر ئىرقىي قىرغىنچىلىق خەۋپى» دەپ ئېتىراپ قىلغان

خەۋەر مەنبەسى: ئەركىن ئاسىيا

ياۋروپا پارلامېنتى 9-ئىيۇن كۈنى مۇتلەق كۆپ ئاۋاز بىلەن قارار ماقۇللاپ، خىتاينىڭ ئۇيغۇر رايونىدا ئېلىپ بېرىۋاتقان قەبىھ جىنايەتلىرىنى «ئىنسانىيەتكە قارشى جىنايەت» ۋە «ئېغىر ئىرقىي قىرغىنچىلىق خەۋپى» شەكىللەندۈرگەن جىنايەت دەپ ئېتىراپ قىلغان. مەزكۇر قارار ياۋروپا ئىتتىپاقى ۋە ئۇنىڭغا ئەزا دۆلەتلەرنى «بىرلەشكەن دۆلەتلەر تەشكىلاتىنىڭ ئىرقىي قىرغىنچىلىقنىڭ ئالدىنى ئېلىش ۋە ئۇنى جازالاش ئەھدىنامىسى» غا ئاساسەن زۆرۈر تەدبىر قوللىنىپ، بۇ جىنايى زوراۋانلىقنى ئاياغلاشتۇرۇشقا چاقىرغان.

تەپسىلاتى...

ياۋروپا پارلامېنتى مەجبۇرىي ئەمگەك مەھسۇلاتلىرىنى ياۋروپاغا ئىمپورت قىلىشنى چەكلەش قارارى ماقۇللىغان

خەۋەر مەنبەسى: ئەركىن ئاسىيا

ياۋروپا پارلامېنتى 9-ئىيۇن كۈنى يۇقىرى ئاۋاز بىلەن قارار ماقۇللاپ، خىتاينىڭ ئۇيغۇر رايونىدا يۈرگۈزۈپ كەلگەن قەبىھ جىنايەتلىرىنى «ئىنسانىيەتكە قارشى جىنايەت» ۋە «ئېغىر ئىرقىي قىرغىنچىلىق خەۋپى» شەكىللەندۈرگەن جىنايەت دەپ ئېتىراپ قىلىش بىلەن بىرگە، ئۇيغۇر رايونىدىكى مەجبۇرىي ئەمگەككە چېتىشلىق مەھسۇلاتلارنى ياۋروپا بازىرىغا ئىمپورت قىلىشنى چەكلەيدىغان مۇھىم بىر قارارنى ماقۇللىغان.

دۇنيا ئۇيغۇر قۇرۇلتىيىنىڭ تور بېتىدە ئېلان قىلىنغان ئاخباراتتا بىلدۈرۈلۈشىچە، ياۋروپا ئىتتىپاقى ماقۇللىغان بۇ قارار خىتاينىڭ مەجبۇرىي ئەمگەك مەھسۇلاتلىرىنى چەكلەشنىڭ ئۈنۈملۈك قورالى ھېسابلىنىدىكەن. بۇ قارار ياۋروپا كومىسسىيونىغا مەجبۇرىي ئەمگەكنى چەكلەش توغرۇلۇق كۈچلۈك تەكلىپلەرنى بەرگەن. ياۋروپا كومىسسىيونى بۇ يىل 9-ئايدا مەجبۇرىي ئەمگەك مەھسۇلاتلىرىنى ياۋروپا بازىرىغا ئىمپورت قىلىشنى چەكلەيدىغان تەدبىرلەرنى ئوتتۇرىغا قويىدىكەن.

تەپسىلاتى...

«قەتئىي مەخپىي» ھۆججەتلەردىكى ئۇيغۇرلارغا دائىر باستۇرۇش كۆرسەتمىلىرى (2)

خەۋەر مەنبەسى: ئەركىن ئاسىيا

يېقىندا ئاشكارا بولۇپ كەتكەن «شىنجاڭ ساقچى ھۆججەتلىرى» نامىدىكى توپلامدا خىتاي ھۆكۈمرانلار گۇرۇھىنىڭ ئىچكى قىسمىدىكى مەخپىي سۆھبەتلەرنىڭ تېكىستكە ئايلاندۇرۇلغان نۇسخىلىرى بار بولۇپ، بۇنىڭدا ئۇيغۇر دىيارىدىكى قىرغىنچىلىق ۋە باستۇرۇشنى قانداق شەكىلدە داۋام قىلدۇرۇش ۋە تاماملاشقا دائىر بىر قاتار كۆرسەتمىلەر كۆزگە چېلىقىدۇ. «قەتئىي مەخپىي» دەپ تامغا ئۇرۇلغان بۇ ھۆججەتلەردىكى كۆرسەتمىلەر خىتاي ھۆكۈمىتىنىڭ نۆۋەتتىكى قىرغىنچىلىقىنىڭ تولىمۇ ئەستايىدىللىق بىلەن پىلانلانغانلىقىنى، شۇنىڭدەك پۈتكۈل ئۇيغۇر مىللىتىنىڭ «دۈشمەن» قاتارىدا مۇئامىلە قىلىنىۋاتقانلىقىنى كۆرسىتىدۇ.

تەپسىلاتى...

ياۋروپا پارلامېنتى خىتاينىڭ ئۇيغۇرلارغا قىلىۋاتقان زۇلۇمىنى «ئىنسانىيەتكە قارشى جىنايەت ۋە ئېغىر ئىرقىي قىرغىنچىلىق خەۋپى» دەپ قوبۇل قىلدى

خەۋەر مەنبەسى: ئەركىن ئاسىيا

9-ئىيۇن كۈنى، ياۋروپا پارلامېنتى خىتاي ھۆكۈمىتىنىڭ ئۇيغۇرلارغا قارىتىۋاتقان زۇلۇمىنى «ئىنسانىيەتكە قارشى جىنايەت ۋە ئېغىر ئىرقىي قىرغىنچىلىق خەۋپى» دەپ بېكىتكەن. مەزكۇر قارار ياۋروپا پارلامېنتىدا ناھايىتى زور كۆپچىلىك ئاۋازنىڭ قوللىشى بىلەن ماقۇللۇقتىن ئۆتكەن بولۇپ، ئۇيغۇرلار ئۈچۈن تارىخىي ۋەقەلەرنىڭ بىرى بولۇپ ھېسابلىنىدىكەن.

دۇنيا ئۇيغۇر قۇرۇلتىيى بۇ ھەقتىكى باياناتىدا ياۋروپا پارلامېنتىنىڭ قارارىنى ھازىرغىچە ياۋروپا پارلامېنتىدا ئۇيغۇرلار مەسىلىسىدە قوبۇل قىلىنغان ئەڭ كەسكىن ۋە ئەڭ كۈچلۈك قارارلارنىڭ بىرى، دەپ باھالىغان. دۇنيا ئۇيغۇر قۇرۇلتىيى بايانىدا مۇنداق دېگەن:

«دۇنيا ئۇيغۇر قۇرۇلتىيى (WUC) بۈگۈنكى ياۋروپا پارلامېنتىدا خىتاي ھۆكۈمىتىنىڭ شەرقىي تۈركىستاندىكى ئۇيغۇر خەلقىگە قارىتىۋاتقان سىستېمىلىق زۇلۇمىنىڭ ئىنسانىيەتكە قارشى تۇرۇش جىنايىتى ۋە ئېغىر ئىرقىي قىرغىنچىلىق خەۋپى ئىكەنلىكىنى ئېتىراپ قىلىدىغان قارارنىڭ مۇتلەق كۆپ ئاۋاز بىلەن ماقۇللانغانلىقىنى قارشى ئالىدۇ. ياۋروپا ئىتتىپاقى ۋە ئۇنىڭغا ئەزا دۆلەتلەر ب د ت ئىرقىي قىرغىنچىلىق ئەھدىنامىسىگە ئاساسەن بارلىق زۆرۈر تەدبىرلەرنى قوللىنىپ، ۋەھشىيلىكنى تۈگىتىشكە چاقىرىلغان بۇ قارار ئۇيغۇر خەلقىگە ئادالەت ئېلىپ كېلىشكە چاقىرىلغان تارىخى مۇراجىئەتنامە بولۇپ ھېسابلىنىدۇ».

مەلۇم بولۇشىچە، خىتاينىڭ ئۇيغۇرلارغا قىلىۋاتقان زۇلۇمى «ئىنسانىيەتكە قارشى جىنايەت ۋە ئېغىر ئىرقىي قىرغىنچىلىق خەۋپى» دەپ قوبۇل قىلىنغان بۇ قاراردا ياۋروپا ئىتتىپاقى ۋە ئۇنىڭغا ئەزا دۆلەتلەر ب د ت نىڭ «ئىرقىي قىرغىنچىلىق ئەھدىنامىسى» دىكى مەجبۇرىيەتلىرىنى ئادا قىلىش، ھەم شۇنداقلا خىتاينىڭ بۇ جىنايەتتە رول ئوينىغان چېن چۈەنگو ۋە جاۋ كېجى قاتارلىق ئەمەلدارلىرىنى جازالاش قاتارلىق ماددىلار ئورۇن ئالغان.

دۇنيا ئۇيغۇر قۇرۇلتىيى رەئىسى دولقۇن ئەيسا باياناتىدا يېقىندا ئاشكارىلانغان «شىنجاڭ ساقچى ھۆججەتلىرى» نىڭ ياۋروپا پارلامېنتىنىڭ ئۇيغۇر ئېلىدىكى ۋەزىيەتنىڭ تەخىرسىزلىكى ۋە ئۈنۈملۈك ھەرىكەتنىڭ زۆرۈرلۈكىنى ھېس قىلىشى ئۈچۈن ئىنتايىن مۇھىم ئويغىنىش چاقىرىقى بولغانلىقىنى مۇئەييەنلەشتۈرگەن ۋە: «ياۋروپا ئىتتىپاقى ۋە ئۇنىڭغا ئەزا دۆلەتلەر ئەمدى قاراردىكى بۇ چاقىرىقلارغا ئەمەل قىلىشى ۋە پۈتۈن كۈچى بىلەن ھۆكۈمەتلەر ۋە تەشكىلاتلار بىلەن ھەمكارلىشىپ، ئۇيغۇرلارغا قارىتىلىۋاتقان ئىرقىي قىرغىنچىلىقنى ئاخىرلاشتۇرۇشى كېرەك» دېگەن.

دۇنيا ئۇيغۇر قۇرۇلتىيى مەزكۇر باياناتىدا قارارنىڭ قوبۇل قىلىنىشىدا كۈچ چىقارغان بارلىق پارلامېنت ئەزالىرىغا رەھمەت ئېيتىپ، ئۇلارنىڭ ئۇيغۇرلارنىڭ كىشىلىك ھوقۇقى ۋە ئەركىنلىكىنى قوغداش ئىرادىسىگە ئاپىرىن ئوقۇغان.

تەپسىلاتى...

دولقۇن ئەيسا: «ياۋروپا پارلامېنتىدىكى ‹ئۇيغۇر دوستلۇق گۇرۇپپىسى› قايتا تەشكىللىنىپ، خىزمەت باشلىدى»

خەۋەر مەنبەسى: ئەركىن ئاسىيا

دۇنيا ئۇيغۇر قۇرۇلتىيى ئۇيغۇر ئىرقىي قىرغىنچىلىقى ھەققىدىكى قارار لايىھەسىنى ياۋروپا پارلامېنتىدا ماقۇللۇقتىن ئۆتكۈزۈش ئۈچۈن، «ئۇيغۇر دوستلۇق گۇرۇپپىسى» نى قايتىدىن ھەرىكەتكە كەلتۈرگەن، شۇنداقلا بۇندىن كېيىن ئېلىپ بېرىلىدىغان پائالىيەتلەر ھەققىدە تەپسىلىي پىلان تۈزگەن. ئىككى كۈندىن بۇيان ياۋروپا ئىتتىپاقىنىڭ ستراسبۇرگدىكى پارلامېنت بىناسىدا پائالىيەت ئېلىپ بېرىۋاتقان د ئۇ ق رەئىسى دولقۇن ئەيسا ئەپەندى زىيارىتىمىزنى قوبۇل قىلىپ، بۇ ھەقتە بىزنى مەلۇمات بىلەن تەمىنلىدى.

تەپسىلاتى...

د ئۇ ق ھەيئىتى شۋېتسارىيە ھۆكۈمەت خادىملىرى ۋە پارلامېنت ئەزالىرى بىلەن ئۇچراشقان

خەۋەر مەنبەسى: ئەركىن ئاسىيا

دۇنيا ئۇيغۇر قۇرۇلتىيىنىڭ بىر ھەيئەتلەر ئۆمىكى شۋېتسارىيەنىڭ پايتەختى بېرن شەھىرىگە بېرىپ 6-ئاينىڭ 2- كۈنى بىر كۈنلۈك زىيارەت ئېلىپ بارغان. د ئۇ ق رەئىسى دولقۇن ئەيسا باشچىلىقىدىكى ئۆمەك شۋېتسارىيە ھۆكۈمەت خادىملىرى، تاشقى ئىشلار مىنىستىرلىقى خادىملىرى ۋە پارلامېنت ئەزالىرى بىلەن ئۇچراشقان.

دولقۇن ئەيسا ئەپەندى بىر كۈن داۋاملاشقان بۇ قېتىمقى شۋېتسارىيە زىيارىتىنىڭ مەقسىتى ۋە ئېلىپ بارغان ئۇچرىشىشلار توغرىسىدا مەلۇمات بەردى. ئۇ، «ئۇيغۇر ئىرقىي قىرغىنچىلىقى» توغرىسىدا ئۇيغۇر كوللېگىيەسى چىقارغان قارارنى چۈشەندۈرۈش ۋە باشقا ياۋروپا دۆلەتلىرىگە ئوخشاش شۋېتسارىيە ھۆكۈمىتى ۋە پارلامېنتىنىڭ «ئۇيغۇر ئىرقىي قىرغىنچىلىقى» نى ئېتىراپ قىلىشىنى تەلەپ قىلىش مەقسىتى بىلەن بۇ زىيارەتنى ئېلىپ بارغانلىقىنى بايان قىلدى.( ئاۋاز)

تەپسىلاتى...