ئامېرىكا دۆلەت مەجلىسىدە ئۇيغۇرلارنىڭ پاناھلىق ئىشلىرىنى ئاسانلاشتۇرۇش، ئۇلارنى بىخەتەر دۆلەتلەرگە يەرلەشتۈرۈش ھەققىدە ئىسپات ئاڭلاندى

خەۋەر مەنبەسى: ئەركىن ئاسىيا

(سولدىن ئوڭغا) ئامېرىكا كېڭەش پالاتا ئەزاسى جېف مېركىلىي(Jeff Merkley) ۋە ئاۋام پالاتا ئەزاسى جەيمىس ماكگوۋرن(James McGovern) ئامېرىكا دۆلەت مەجلىسىدە ئېچىلغان «زىيانكەشلىكتىن قوغداش-خوڭكوڭلۇقلار ۋە ئۇيغۇرلارغا ئىنسانپەرۋەرلىك يولىنى ئېچىش» تېمىسىدىكى ئىسپات ئاڭلاش يىغىنىدا. 2021-يىلى 19-ئۆكتەبىر، ۋاشىنگتون.

ئامېرىكا دۆلەت مەجلىسىدە «زىيانكەشلىكتىن قوغداش-خوڭكوڭلۇقلار ۋە ئۇيغۇرلارغا ئىنسانپەرۋەرلىك يولىنى ئېچىش» تېمىسىدىكى ئىسپات ئاڭلاش يىغىنى ئېچىلدى.

خىتاي ھۆكۈمىتىنىڭ ئۇيغۇرلارغا دۆلەت ئىچى ۋە سىرتىدا ئوخشاشلا زىيانكەشلىك قىلىشقا ئۇرۇنۇۋاتقانلىقى، دۆلەت ھالقىغان بېسىم پەيدا قىلىپ ئۇلارنى دۇنيانىڭ قەيىرىدە بولۇشىدىن قەتئىيەنەزەر قامال قىلىشقا ئۇرۇنۇۋاتقانلىقى ئامېرىكا قاتارلىق غەرب ئەللىرى ھەل قىلىشقا تېگىشلىك جىددىي مەسىلە بولۇپ ئوتتۇرىغا چىقماقتا.

ئامېرىكا دۆلەت مەجلىسىدە 19-ئۆكتەبىر كۈنى ئېچىلغان «زىيانكەشلىكتىن قوغداش-خوڭكوڭلۇقلار ۋە ئۇيغۇرلارغا ئىنسانپەرۋەرلىك يولىنى ئېچىش» تېمىسىدىكى ئىسپات ئاڭلاش يىغىندا دۆلەت مەجلىس ئەزالىرى ۋە گۇۋاھلىق بەرگۈچىلەر بىردەك خىتاي ھۆكۈمىتىنىڭ باستۇرۇش، ئۆچ ئېلىش، تۇتقۇن قىلىشتەك خەۋپىگە دۇچ كېلىۋاتقان خوڭكوڭلۇقلار ۋە ئۇيغۇرلارنى قۇتقۇزۇش ھازىرقى ۋاقتىنىڭ ئەڭ مۇھىم تەقەززاسى، دېيىشتى.

تەپسىلاتى...

ئافېنادىكى ئولىمپىك ئاخبارات يىغىنىنىڭ خىتابى: «تەنھەرىكەتچىلەر بىر قېتىملىق مۇسابىقىدىن قېلىشى مۇمكىن، ئەممە پۈتۈن ئۇيغۇر ئائىلىلىرى يوقالدى»

خەۋەر مەنبەسى: ئەركىن ئاسىيا

د ئۇ ق بىلەن بىر قانچە تىبەت تەشكىلاتى گىرېتسىيە پايتەختى ئافېنادا ئۆتكۈزگەن بېجىڭ قىشلىق ئولىمپىكىنى بايقۇت قىلىش يىغىنىدا د ئۇ ق نىڭ پروگرامما دىرېكتورى زۇمرەتئاي ئەركىن سۆزلىمەكتە. 2021-يىلى 19-ئۆكتەبىر.

19-ئۆكتەبىر كۈنى، دۇنيا ئۇيغۇر قۇرۇلتىيى بىلەن بىر قانچە تىبەت تەشكىلاتى گىرېتسىيە پايتەختى ئافېنادا ئاخبارات يىغىنى ئۆتكۈزۈپ، خەلقئارا ئولىمپىك كومىتېتىنى تەنقىد قىلغان شۇنداقلا سانائەتلەشكەن 7 دۆلەت ھۆكۈمەتلىرىنى ۋە ھەر قايسى ئەل تەنھەرىكەتچىلىرىنى بېجىڭ قىشلىق ئولىمپىكىنى بايقۇت قىلىشقا چاقىرغان. ئافېنادىكى بىر مېھمانخانىدا ئۆتكۈزۈلگەن ئاخبارات يىغىنى خەلقئارا ئولىمپىك كومىتېتى 18-ئۆكتەبىر ئافېنانىڭ ئولىمپىك تېغىدا مەشئەل يېقىش مۇراسىمى ئۆتكۈزۈپ، 19-ئۆكتەبىر كۈنى مەشئەلنى خىتاينىڭ بېيجىڭ قىشلىق ئولىمپىك ھەيئىتىگە ئ‍ۆتكۈزۈپ بەرگەن بىر ۋاقىتتا چاقىرىلغان.

خەلقئارا ئولىمپىك كومىتېتى كىشىلىك ھوقۇق تەشكىلاتلىرى ۋە بەزى غەرب سىياسىيونلىرىنىڭ ئۇيغۇرلارغا «ئىرقىي قىرغىنچىلىق» قىلغان بىر دۆلەتنىڭ ئولىمپىكقا ساھىبىانلىق قىلىشىنى بىكار قىلىش ياكى كېچىكتۈرۈش چاقىرىقلىرىنى رەت قىلىپ، ئولىمپىك مەشئىلىنى خىتايغا ئۆتكۈزۈپ بەرگەن.

خىتاينىڭ باستۇرۇشىدا ياشاۋاتقان ۋە خىتايدىكى دېموكراتىيەنى قوغداشتا زىيانكەشلىككە ئۇچرىغانلارغا بىر مىنۇتلۇق سۈكۈتتە تۇرۇش بىلەن باشلانغان ئافېنادىكى ئاخبارات يىغىنىدا، يىغىن رىياسەتچىسى، خەلقئارا تىبەت تورى تەشكىلاتىنىڭ ئىجرائىيە دىرېكتورى مەندى مىكوۋېن خەلقئارا ئولىمپىك كومىتېتىنى «ئىككى يۈزلىمىچىلىك» ئەيىبلىگەن.

تەپسىلاتى...

بېرلىندا ئۇيغۇرلارغا ئائىت بىر يۈرۈش پائالىيەتلەر ئېلىپ بېرىلدى

خەۋەر مەنبەسى: ئەركىن ئاسىيا

بېرلىندا «ئۇيغۇر ئاۋازى» رەسىم كۆرگەزمىسى، «مېنىڭ ھەدەم نەدە؟» ناملىق فىلىمنىڭ قويۇلۇش مۇراسىمى ۋە «ئۇيغۇر سىياسىي ئاكتىپلىرىنى تەربىيەلەش» كۇرسى ئۆتكۈزۈلدى.

14-ئۆكتەبىر گېرمانىيە پايتەختى بېرلىندىكى ئامېرىكا باش ئەلچىخانىسىدا «ئۇيغۇر ئاۋازى» ناملىق رەسىم كۆرگەزمىسى پائالىيىتى ئۆتكۈزۈلدى. بۇ پائالىيەتنى ئامېرىكا باش ئەلچىخانىسى ماددىي جەھەتتىن قوللىغان، د ئۇ ق ئورۇنلاشتۇرغانىدى. كۆرگەزمىگە ئامېرىكا ئەلچىخانا خادىملىرى، بىرقىسىم دۆلەتلەرنىڭ دىپلوماتلىرى، ئامېرىكا ۋە ياۋروپا ئەللىرىدىن كەلگەن كىشىلىك ھوقۇق پالىيەتچىلىرى، د ئۇ ق خادىملىرى ۋە باشقا ئۇيغۇر كىشىلىك ھوقۇق ئاكتىپلىرى بولۇپ 100 گە يېقىن كىشى قاتناشتى.

14-ئۆكتەبىر چۈشتىن كېيىن بۇ پائالىيەتكە ئۇلاپلا، ئامېرىكا باش ئەلچىخانىسىدا يەنە «مېنىڭ ھەدەم نەدە؟» ناملىق ھۆججەتلىك فىلىمنىڭ قويۇلۇش مۇراسىمى ئۆتكۈزۈلدى. مۇراسىم مۇقەددىمىسىدە ئامېرىكانىڭ بېرلىندىكى ۋاقىتلىق باش ئەلچىسى كلارىك پىرس، د ئۇ ق رەئىسى دولقۇن ئەيسا ۋە ئۇيغۇر ھەرىكىتى تەشكىلاتىنىڭ رەئىسى رۇشەن ئابباس خانىملار ئېچىلىش نۇتۇقلىرى سۆزلىدى. ئۇيغۇرلارنىڭ نۆۋەتتىكى ۋەزىيىتى ئەتراپلىق يورۇتۇپ بېرىلگەن 75 مىنۇتلۇق بۇ فىلىم كىشىلەرنى قاتتىق تەسىرلەندۈردى.

تەپسىلاتى...

د ئۇ ق رەئىسى چېخىيە پايتەختى پراگا شەھرىدە پائالىيەت ئېلىپ بارماقتا

خەۋەر مەنبەسى: ئەركىن ئاسىيا

د ئۇ ق رەئىسى چېخىيە پايتەختى پراگا شەھىرىدە پائالىيەت ئېلىپ بارماقتا. 2021-يىلى 12-ئۆكتەبىر.

«ئۇيغۇر ئىرقىي قىرغىنچىلىقى» نى ئېتىراپ قىلغان چېخىيە ھۆكۈمىتى د ئۇ ق خادىملىرىنى «مۇنبەر 2000» يىغىنىغا تەكلىپ قىلغان.

12-ئۆكتەبىر كۈنى چېخىيە پايتەختى پراگا شەھرىدىن ئىگىلىگەن مەلۇماتلىرىمىزغا قارىغاندا، «ئۇيغۇر ئىرقىي قىرغىنچىلىقى» نى ئېتىراپ قىلغان چېخىيە پارلامېنتى 11-ئۆكتەبىر پايتەخت پراگا شەھرىدە باشلانغان «مۇنبەر 2000» يىغىنىغا دولقۇن ئەيسا باشلىق د ئۇ ق خادىملىرىنىمۇ تەكلىپ قىلغان.

د ئۇ ق رەئىسى دولقۇن ئەيسا ئەپەندىنىڭ بىلدۈرىشىچە، «مۇنبەر 2000» نى چېخىيە جۇمھۇرىيىتىنىڭ تۇنجى رەئىسى، مەشھۇر كىشىلىك ھوقۇق رەھبىرى ۋاسلاۋ خاۋېل قۇرغان بولۇپ، دۇنيا مىقياسىدا كىشىلىك ھوقۇقنى ئىلگىرى سۈرۈش مەقسىتىدە ھەر يىلى ئۆتكۈزۈلۈپ كېلىۋاتقان بۇ يىغىن 25 يىلدىن بۇيان داۋام قىلىپ كەلمەكتە ئىكەن.

تەپسىلاتى...

ھىدايەتۇللا ئوغۇزخان: «دۇنيا جامائىتىنى شەرقىي تۈركىستان خەلقىنىڭ مەۋجۇتلۇق كۈرىشىنى قوللاشقا چاقىرىمىز»

خەۋەر مەنبەسى: ئەركىن ئاسىيا

9-ئۆكتەبىر بوسنىيەنىڭ پايتەختى سارايېۋو شەھىرىدە ئېچىلغان 13-نۆۋەتلىك دۇنيا شەرقىي تۈركىستانلىقلار قېرىنداشلىق ئۇچرىشىشى ۋە 4-نۆۋەتلىك شەرقىي تۈركىستان مىللىي بىرلىك شۇراسى يىغىنىدا دۇنيا جامائىتى ئۇيغۇر خەلقىنىڭ مىللىي مەۋجۇتلۇق كۈرىشىنى قوللاشقا ۋە ئۇيغۇر ئىرقىي قىرغىنچىلىقىنىڭ ئالدىنى ئېلىشقا چاقىرىلدى.

بۇ يىغىننى باش شتابى تۈركىيەدىكى «شەرقىي تۈركىستان مائارىپ ۋە ھەمكارلىق جەمئىيىتى» ئۇيۇشتۇرغان بولۇپ، يىغىن 11-ئۆكتەبىرگىچە 3 كۈن داۋام قىلىدۇ.

يىغىنغا دۇنيانىڭ ھەر قايسى جايلىرىدىن كەلگەن 40 تىن ئارتۇق تەشكىلات رەھبەرلىرى، دىنىي ئالىملار، زىيالىيلار، تەتقىقاتچىلار ۋە پائالىيەتچىلەر بولۇپ 120 ئەتراپىدا كىشى قاتناشتى.

تەپسىلاتى...

ئامېرىكا شىركىتىنىڭ خىتايدىكى زاۋۇتلىرىدا ئۇيغۇر مەجبۇرىي ئەمگەكچىلىرى بارلىقىنىڭ ئاشكارىلىنىشى زور ئىنكاس قوزغىدى

خەۋەر مەنبەسى: ئەركىن ئاسىيا

رويتېرس ئاگېنتلىقى 7-ئۆكتەبىر ئېلان قىلغان مەخسۇس خەۋەردىن مەلۇم بولۇشىچە، ئامېرىكادىكى تېزگىنەك ياساپ ساتىدىغان «ئۇنىۋېرسال ئىلىكتورون مەھسۇلاتلىرى» (Universal Electronics) شىركىتى يۈزلىگەن ئۇيغۇر ئىشچىسىنى خىتاينىڭ جەنۇبىدىكى گۇاڭشىنىڭ چىنجوۋ شەھىرىگە جايلاشقان زاۋۇتىدا ئىشلەشكە يۆتكەش ھەققىدە ئۇيغۇر ئېلى دائىرىلىرى بىلەن كېلىشىم تۈزگەن. مەزكۇر شىركەتنىڭ ئۆزى بۇنى رويتېرس ئاگېنتلىقىغا دەلىللىگەن بولۇپ، بۇ ئامېرىكا شىركىتىنىڭ مەجبۇرىي ئەمگەككە چېتىلغانلىقى ھەققىدە تۇنجى دەلىللەنگەن ۋەقە ئىكەن.

مەلۇم بولۇشىچە، بۇ تېزگىنەك شېركىتى سونىي، سامسۇڭ ۋە مىكروسوفت، LG قاتارلىق خەلقئارالىق تېلېۋىزور ۋە تېخنىكا شىركەتلىرىنى تېزگىنەك بىلەن تەمىنلەيدىغان شىركەت بولۇپ، ئۇلار ئاز دېگەندە 400 نەپەر ئۇيغۇر ئىشچىنى ياللىغان ۋە بۇ ئىشچىلارنىڭ ھەممىسى خوتەندىن كەلگەن ئىكەن.

چىنجۇۋ ۋە ئۇيغۇر رايونىدىكى يەرلىك ئەمەلدارلارنىڭ سۆزلىرى ھەمدە ھۆكۈمەت ئۇقتۇرۇشى ۋە يەرلىك تاراتقۇلارنىڭ خەۋىرىدىن ئاشكارىلىنىشىچە، بۇ ئۇيغۇر ئىشچىلار خوتەن شەھىرىدىن چېنجۇۋدىكى زاۋۇتقا ساقچىلارنىڭ باشقۇرۇشىدا ئايروپىلان ئارقىلىق يۆتكەلگەن ۋە يۆتكەش ھەققىنى ئۇيغۇر رايونلۇق ھۆكۈمەت دائىرىلىرى تۆلىگەن. 2020-يىلى 2-ئايدا چىنجوۋ ساقچىسىنىڭ ئىجتىمائىي ئالاقە ھېساباتىغا يوللانغان ئۇقتۇرۇش ۋە رەسىملەردىن مەلۇم بولۇشىچە، بۇ ئىشچىلار ئايروپىلان ئارقىلىق چېنجۇۋغا كەلگەندىن كېيىن، ئاپتوبوسلارغا ئولتۇرغۇزۇلۇپ ساقچى ماشىنىلىرىنىڭ قورشاۋىدا زاۇۋتقا ئاپىرىلغان ئىكەن.

تەپسىلاتى...

بوسنىيەنىڭ سارايېۋا شەھىرىدە ئۇيغۇرلارغا ئائىت فوتو سۈرەت كۆرگەزمىسى ئېچىلدى

خەۋەر مەنبەسى: ئەركىن ئاسىيا

8-ئۆكتەبىر جۈمە كۈنى مەركىزى ئىستانبۇلغا جايلاشقان شەرقىي تۈركىستان مائارىپ ۋە ھەمكارلىق جەمئىيىتى تەرىپىدىن بوسنىيەنىڭ سارايېۋا شەھىرىدە شەرقىي تۈركىستان رەسىم كۆرگەزمىسى ئېچىلدى.

شەرقىي تۈركىستان مائارىپ ۋە ھەمكارلىق جەمئىيىتى تەرىپىدىن ھەر يىلى بىر قېتىم ئۆتكۈزۈلۈپ كېلىۋاتقان «دۇنيا شەرقىي تۈركىستانلىقلار قېرىنداشلىق ئۇچرىشىش يىغىنى» نىڭ 13 – قېتىملىقى بۇ ئاي، بوسنىيەنىڭ سارايېۋا شەھىرىدە ئۆتكۈزۈلىدىغان بولۇپ، مەزكۇر فوتو سۈرەت كۆرگەزمىسى يىغىننىڭ باشلىنىش مۇقەددىمىسى سۈپىتىدە ئېچىلغان. بۇ كۆرگەزمە سارايېۋانىڭ شەھەر مەركىزىدىكى چوڭ مەيداندا ئېچىلغان بولۇپ، كۆرگەزمىنى كۆپلىگەن بوسنىيەلىكلەر زىيارەت قىلدى. زىيارەت جەريانىدا يەنە ئۇيغۇرلارنىڭ ھازىرقى ئەھۋالى ئاڭلىتىلغان تەشۋىقات ۋاراقلىرى ۋە دوكلاتلار كوچىدىن ئۆتۈۋاتقان خەلق ئاممىسىغا تارقىتىلدى.

كۆرگەزمىگە ئۇيغۇرلارنىڭ مەدەنىيىتى، تارىخى تونۇشتۇرۇلغان سۈرەتلەردىن سىرت يەنە خىتاينىڭ جازا لاگېرلىرى ۋە لاگېرلارغا قامالغان ئۇيغۇرلار، چېقىۋېتىلگەن مەسچىتلەر، كىچىك بالىلارنىڭ خىتاي يەسلىلىرىدە خىتايلاشتۇرۇلۇۋاتقان كۆرۈنۈشلىرى، ئاياللارنىڭ مەجبۇرىي ئەمگەككە سېلىنىۋاتقانلىقى ئەكس ئەتتۈرۈلگەن سۈرەتلەر قويۇلغان.

تەپسىلاتى...

«13-نۆۋەتلىك دۇنيا شەرقىي تۈركىستانلىقلار قېرىنداشلىق ئۇچرىشىشى» بوسنىيەدە ئۆتكۈزۈلىدىكەن

خەۋەر مەنبەسى: ئەركىن ئاسىيا

مەركىزى ئىستانبۇلدىكى شەرقىي تۈركىستان مائارىپ ۋە ھەمكارلىق جەمئىيىتىنىڭ ئۇيۇشتۇرۇشى بىلەن ھەر يىلى بىر قېتىم ئۆتكۈزۈلۈپ كېلىۋاتقان «دۇنيا شەرقىي تۈركىستانلىقلار قېرىنداشلىق ئۇچرىشىشى» نىڭ 13-نۆۋەتلىكى 10-ئاينىڭ 8-كۈنىدىن 10-كۈنىگىچە بوسنىيەنىڭ سارايېۋا شەھىرىدە ئۆتكۈزۈلۈش ئالدىدا تۇرماقتا.

يىغىنغا ئامېرىكا، كانادا، گېرمانىيە، فرانسىيە، شىۋېتسىيە، نورۋېگىيە، فىنلاندىيە، گوللاندىيە، رۇسىيە، ئاۋسترالىيە، قازاقىستان، سەئۇدى ئەرەبىستان ۋە تۈركىيە قاتارلىق دۆلەتلەردىن تەكلىپ قىلىنغان ئۇيغۇر تەشكىلاتلىرىنىڭ مەسئۇللىرى، تەتقىقاتچىلار، دىنى ئۆلىمالار ۋە زىيالىيلار بولۇپ، جەمئىي 120 كىشى قاتنىشىدىكەن. مەزكۇر يىغىننى ئۇيۇشتۇرغان شەرقىي تۈركىستان تەشكىلاتلار بىرلىكىنىڭ رەئىسى ھىدايەتتۇللاھ ئوغۇزخان ئەپەندىنىڭ بىلدۈرۈشىچە، بۇ قېتىمقى يىغىننىڭ بۇرۇنقى 12 قېتىملىق يىغىنغا ئوخشىمايدىغان تەرىپى، بۇ قېتىمقى يىغىندا ئۇيغۇرلارنىڭ ئەركىنلىكى ئۈچۈن ئېلىپ بېرىلىدىغان ئىشلارنىڭ كونكىرېت پىلانى تۈزۈپ چىقىلىدىكەن.

مەزكۇر ئۇچرىشىشقا يەنە «4-نۆۋەتلىك شەرقىي تۈركىستان مىللىي بىرلىك شۇراسى» دەپ ئىسىم بېرىلگەنلىكى مەلۇم. مەزكۇر يىغىندا نۇقتىلىق ھالدا خىتاي شەرقىي تۈركىستاندا ئىرقىي قىرغىنچىلىق ئېلىپ بېرىۋاتقان، شەرقىي تۈركىستان مەسىلىسى خەلقئارالاشقان بۈگۈنكى كۈندە، ئۇيغۇرلارنىڭ ئەركىنلىككە ئېرىشىشى ئۈچۈن ئېلىپ بېرىلىدىغان ئىشلار توغرىسىدامۇھاكىمە ۋە مۇزاكىرىلەر ئېلىپ بېرىلىدىكەن.

تەپسىلاتى...

فېيسبۇك شىركىتى خىتاينىڭ فېيسبۇك سۇپىسىدا ئۇيغۇرلارنى تەقىپ قىلىدىغانلىقىنى بىلىپ تۇرۇپ ئاشكارىلىمىغان

خەۋەر مەنبەسى: ئەركىن ئاسىيا

ئامېرىكا ئ‍ىجتىمائىي تاراتقۇ سۇپىسى فېيسبۇكنىڭ بىر سابىق ئىجرائىيە ئەمەلدارى، خىتاي ۋە ئ‍ىرانغا ئوخشاش دۆلەتلەرنىڭ فېيسبۇك سۇپىسىدا جاسۇسلۇق ھەركىتى بىلەن شۇغۇللىنىدىغانلىقى، بولۇپمۇ خىتاينىڭ بۇ سۇپىدىن پايدىلىنىپ دۇنيانىڭ ھەر قايسىي جايلىرىدىكى ئۇيغۇرلارنى تەقىپ قىلىدىغانلىقى، بىراق فېيسبۇكنىڭ بۇنى بىلىپ تۇرۇپ ئېيتمىغانلىقىنى ئاشكارلىدى.

فرانسېس خاۋگېن ئىلگىرى فېيسبۇكنىڭ ئ‍ىستىخبارات تەھدىت گۇرۇپىسىنىڭ خىزمىتىگە يېتەكچىلىك قىلغان بولۇپ، ئۇ خىتاينىڭ فېيسبۇك سۇپىسىنى ئ‍ۆزىنىڭ يامان غەرىزى ئۈچۈن پايدىلىنىۋاتقانلىقىنى فېيسبۇك شىركىتىنىڭ بىلىپ تۇرۇپ يول قويغانلىقىنى ئامېرىكا كېڭەش پالاتاسىنىڭ 5-ئۆكتەبىر ئۆتكۈزۈلگەن بىر قېتىملىق گۇۋاھلىق يىغىنىدا ئاشكارلىغان.

فرانسېس خاۋگېن بۇ ئىشلارنى فەيسبۇكنىڭ ئىنستىگرام ئەپى ئاسان زىيانكەشلىككە ئۇچراش ئېھتىماللىقى بولغان ئۆسمۈرلەردە تەشۋىش ۋە ئ‍ۆزىنى ئۆلتۈرىۋېلىش خىيالىنى كۈچەيتىۋېتىش، فېيسبۇك بۇنى بىلىپ تۇرۇپمۇ، بۇنىڭغا قارشى ھېچقانداق تەدبىر ئالماسلىق بىلەن ئەيىبلىنىۋاتقان بىر ۋاقىتتا پاش قىلغان.

تەپسىلاتى...

فىرانسىيەدە خىتايغا قارشى زور كۆلەملىك نامايىش ئۆتكۈزۈلدى

خەۋەر مەنبەسى: ئەركىن ئاسىيا

2-ئۆكتەبىر فىرانسىيە پايتەختى پارىژدا ئۆتكۈزۈلگەن خىتايغا قارشى زور كۆلەملىك نامايىشتىن بىر كۆرۈنۈش. 2021-يىلى 2-ئۆكتەبىر. پارىژ، فىرانسىيە.

2-ئۆكتەبىر فىرانسىيە پايتەختى پارىژدا خىتاينىڭ ئۇيغۇرلار ئۈستىدىن يۈرگۈزۈۋاتقان قىرغىنچىلىق سىياسىتىگە قارشى تۇرۇش، جۈملىدىن فىرانسىيە قاتارلىق ئەللەرنى ئۇيغۇر قىرغىنچىلىقىنى ئېتىراپ قىلىش ۋە بۇنى توختىتىش ئۈچۈن ھەرىكەتكە ئۆتۈشكە چاقىرىش قاتارلىق مەقسەتلەر بىلەن زور كۆلەملىك نامايىش ئۆتكۈزۈلدى.

نارازىلىق نامايىشنى 1-ئۆكتەبىر خىتاينىڭ دۆلەت بايرىمى مۇناسىۋىتى بىلەن ياۋروپا ئۇيغۇر ئىنستىتۇتى تەشكىللىگەن بولۇپ، بۇ قېتىمقى نامايىشقا ئۇيغۇرلارنى قوللىغۇچى ياۋروپا ۋە فىرانسىيە پارلامېنت ئەزالىرى، كۆپ ساندىكى يەرلىك فىرانسۇزلار، گوللاندىيە ۋە بېلگىيە قاتارلىق دۆلەتلەردىكى ئۇيغۇر تەشكىلاتلىرى تەرىپىدىن تەشكىللىنىپ ئېلىپ كېلىنگەن ئۇيغۇر جامائىتى ۋە سىياسىي پائالىيەتچىلەر قاتنىشىپ پارىژ كوچىلىرىنى زىلزىلىگە سالدى.

ياۋروپا ئۇيغۇر ئىنستىتۇتىنىڭ رەئىسى دىلنۇر خانىم بۇ قېتىمقى چوڭ نامايىشنى تەشكىللىگەن ۋە ئالاھىدە ئورۇنلاشتۇرغان شەخستۇر. ئۇ، رادىيومىز زىيارىتىنى قوبۇل قىلىپ، ئۇيغۇر مەسىلىسىگە كۆڭۈل بۆلۈۋاتقان فىرانسىيە ۋە ياۋروپا پارلامېنتى ئەزالىرىنىڭ بۇ نامايىشقا كۈچ چىقارغانلىقى ۋە يېقىندىن ياردەمدە بولغانلىقىنى بىلدۈردى.

تەپسىلاتى...