تۈركىيە تاشقى ئىشلار مىنىستىرلىقى خىتاينى دەرھال جازا لاگېرلىرىنى تاقاشقا چاقىردى

خەۋەر مەنبەسى: ئەركىن ئاسىيا

تۈركىيە تاشقى ئىشلار مىنىستىرلىقى 9-فېۋرال كۈنى بايانات ئېلان قىلىپ، خىتاي ھۆكۈمىتىنىڭ بىر مىليوندىن كۆپ ئۇيغۇر ۋە قازاق قاتارلىق تۈركىي خەلقلەر سولانغان جازا لاگېرلىرىنى دەرھال تاقىشى كېرەكلىكىنى بىلدۈردى ۋە 21-ئەسىردە جازا لاگېرلىرىنىڭ قايتىدىن ئوتتۇرىغا چىقىشى، شۇنداقلا خىتاينىڭ ئۇيغۇر تۈركلىرىگە ئېلىپ بېرىۋاتقان سىستېمىلىق ئاسسىمىلياتسىيە سىياسىتىنىڭ «ئىنسانىيەت ئۈچۈن نومۇس» ئىكەنلىكىنى بىلدۈردى.

تاشقى ئىشلار مىنىستىرلىقى باياناتچىسى خامى ئاكسوي ئەپەندى باياناتىدا: «خىتاينىڭ 2017-يىلى 10-ئايدا بارلىق دىنلارنى ۋە دىنىي ئېتىقادلارنى خىتايلاشتۇرۇش سىياسىتىنى يولغا قويغانلىقىنى جاكارلىشى بىلەن بۇنىڭ ئۇيغۇر تۈركلىرىنىڭ ۋە باشقا مۇسۇلمان مىللەتلەرنىڭ مىللىي، دىنىي ۋە كۈلتۈر كىملىكلىرىنى يوق قىلىشنى مەقسەت قىلغان يېڭى بىر قەدەم ئىكەنلىكى ئاشكارىلاندى» دېگەن.

تۈركىيە تاشقى ئىشلار مىنىستىرلىقى باياناتچىسى خامى ئاكسوي ئەپەندى باياناتىدا: «بىر مىليوندىن ئارتۇق ئۇيغۇر تۈركى تۇتقۇن قىلىنىپ جازا لاگېرلىرىغا ۋە تۈرمىلەرگە تاشلانغان بولۇپ، ئۇلارنىڭ تەن جازاسىغا ئۇچراۋاتقانلىقى ۋە كاللىسىنىڭ سىياسىي جەھەتتىن يۇيۇلۇۋاتقانلىقى ھازىر بىر مەخپىيەتلىك ئەمەس. بىز خىتاي ھۆكۈمىتىنى ئۇيغۇر تۈركلىرىنىڭ ئەقەللىي ھەق-ھوقۇقلىرىغا ھۆرمەت قىلىشقا ۋە جازا لاگېرلىرىنى دەرھال تاقىۋېتىشكە چاقىرىمىز» دېدى.

تۈركىيە تاشقى ئىشلار مىنىستىرلىقى باياناتچىسى خامى ئاكسوي سۆزىدە يەنە، ئۇيغۇر تۈركلىرىنىڭ خىتاي ھاكىمىيىتى ئاستىدا ئۇزۇن يىللاردىن بۇيان ئېغىر سىياسىي بېسىمغا، شۇنداقلا سىستېمىلىق ئاسسىمىلياتسىيەگە ئۇچراپ كېلىۋاتقانلىقىنى ئالاھىدە تەكىتلەپ ئۆتتى.

تەپسىلاتى...

گۈلخۇمار: «ئىككى يىلدىن ئېشىپتۇ، ھەرۋاق تاماقتا ئاپامنىڭ يوقلۇقى بىلىنىدۇ»

خەۋەر مەنبەسى: ئەركىن ئاسىيا

جازا لاگېرلارغا قامىلىۋاتقان مىليونلىغان ئۇيغۇرلار ئارىسىدا، چەتئەللەردىن يۇرتىغا قايتىپ بارغان ئۇيغۇرلارنىڭمۇ خېلى كۆپ نىسبەتنى ئىگىلەيدىغانلىقى مەلۇم. فىرانسىيەدە يولدىشى ئىككى قىزى بىلەن ياشاۋاتقان گۈلباھار خانىم 2016-يىلى 11-ئايدا پېنسىيە مائاشىغا مۇناسىۋەتلىك ئىشلارنى بېجىرىش ئۈچۈن، قارىمايغا قايتقىنىچە قايتىپ كەلمىگەن. گۈلباھار خانىمنىڭ قولىدىكى خىتاي پاسپورتى مۇسادىرە قىلىنىپ، ئۇ لاگېرغا قامالغان. ئۇنىڭ چوڭ قىزى گۈلخۇمار ئانىسىنى قۇتقۇزۇش ئۈچۈن ھازىر فىرانسۇز تىلىدىكى ئاخبارات ۋاسىتىلىرىگە باياناتلار بېرىپ، فىرانسىيە ھۆكۈمىتىدىن جىددىي ياردەم تەلەپ قىلىش ئارقىلىق ئۇيغۇرلار ئۇچراۋاتقان لاگېرلار مەسىلىسىنى فىرانسۇز تىللىق دۆلەتلەر ۋە باشقىلارغا تونۇتۇشتا بەلگىلىك رول ئوينىماقتا.

14 يېشىدا، تولۇقسىز ئوتتۇرىدا ئوقۇۋاتقان چېغىدا فىرانسىيەگە كۆچۈپ كەلگەن گۈلخۇمار خاتىۋاجى، ھازىر پارىژدىكى مەلۇم بىر چوڭ سودا شىركىتىدە بازار ئېچىش خىزمىتى بىلەن شۇغۇللانماقتا، گۈلخۇمار بۇلتۇر ‏6 ‏-ئايدىن باشلاپ، فىرانسىيەدىكى «فىرانسىيە 24»، «ئېكسپرېس»، «لې موندې»، «ئارتې تېلېۋىزىيەسى» قاتارلىق ئاساسلىق ئاخبارات ۋاسىتىلىرى ۋە تېلېۋىزىيە قاناللىرىنىڭ زىيارىتىنى قوبۇل قىلىپ، راۋان فىرانسۇز تىلىدا ئۇيغۇرلار ئۇچراۋاتقان مەسىلىسىنى ئۆز ئانىسى ئۇچرىغان زۇلۇملارنى مىسال قىلىپ تۇرۇپ ئاڭلاتماقتا.

تەپسىلاتى...

گۆتتىنگېن ئۇنىۋېرسىتېتىنىڭ دوكتور ئاسپىرانتى تاھىرجان قاھىرى لايپزىگ شەھىرىدە ئۇيغۇرلار ھەققىدە دوكلات بەردى

خەۋەر مەنبەسى: ئەركىن ئاسىيا

خىتاي دائىرىلىرى تەرىپىدىن ناھەق جازا لاگېرىغا بەند قىلىنغان مەشھۇر ئۇيغۇر ئالىملىرىدىن مۇتەللىپ سىدىق قاھىرىنىڭ گېرمانىيەدە دوكتورلۇق ئىلمىي ئۇنۋانى ئۈچۈن ئوقۇۋاتقان ئوغلى تاھىرجان قاھىرى 6-فېۋرال كۈنى لايپزىگ شەھىرىدە ئۇيغۇرلار توغرىلىق دوكلات بەردى.

تاھىرجان قاھىرى دادىسىنىڭ لاگېرغا قامالغانلىقىدىن خەۋەر تاپقان كۈندىن باشلاپ، دادىسى ھەققىدە گۇۋاھلىق بېرىش ۋە ئۇيغۇرلار نۆۋەتتە دۇچ كېلىۋاتقان زۇلۇملارنى ئاڭلىتىشنى بىر كۈنمۇ توختىتىپ قويمىغان ئىدى. ئۆتكەن يىلىنىڭ ئاخىرىدىن باشلاپ ۋاتسئاپ قاتارلىق ئىجتىمائىي ئاخبارات ۋاسىتىلىرى ئارقىلىق دادىسىنىڭ ئەمگەكلىرىنى تونۇشتۇرۇۋاتقان تاھىرجان رادىئو ۋە گېزىتلەردە بايانات ئېلان قىلىش ئارقىلىق كەڭ جامائەتچىلىكنىڭ ھېسداشلىقى ۋە قوللىشىنى قولغا كەلتۈرۈپ، دادىسىنى ئۆز ئىچىگە ئالغان ئۇيغۇر سەرخىللىرىنى قۇتقۇزۇشقا چاقىرماقتا.
ئۇنىڭ بۈگۈنكى پائالىيەت سەھنىسى-گېرمانىيەنىڭ ئەڭ چوڭ ئېتنولوگىيە مۇزېيلىرىدىن بىرى بولغان لايپزىگ گراسسى ئېتنولوگىيە مۇزېيىنىڭ يىغىن زالىدۇر.

تەپسىلاتى...

تىجارەتچى مەمەتجان ئېلى رۇستەم قارىھاجىنىڭ جىنازا نامىزىدا تەكبىر ئىشارىتى قىلغانلىقى ئۈچۈن تۇتۇلغان

خەۋەر مەنبەسى: ئەركىن ئاسىيا

خىتاي ئۇيغۇر رايونىدا يىغىۋېلىش لاگېرىغا سولىۋېلىنغانلارنىڭ كىچىك خاتالىق سادىر قىلغانلار ئىكەنلىكىنى تىلغا ئالغان بولسىمۇ، كونكرېت قانداق بىر خاتالىقنىڭ «دىنىي ئەسەبىيلىك» بىلەن گۇمانلىنىشقا سەۋەب بولۇۋاتقانلىقى ھەققىدە ئېغىز ئاچمىغان ئىدى. مۇخبىرىمىزنىڭ ئاتۇشقا قارىتا ئېلىپ بارغان تېلېفون زىيارەتلىرى داۋامىدا قىرغىزىستاندا تىجارەت قىلىۋاتقان 40 ياشلار چامىسىدىكى مەمەتجان ئېلىنىڭ ئاتۇشتا بۇنىڭدىن 15 يىللار ئىلگىرى ئالەمدىن ئۆتكەن مەشھۇر دىنىي زات رۇستەم قارىھاجىنىڭ ئۆلۈم مۇراسىمىدا شاھادەت بارمىقىنى كۆتۈرۈپ تەكبىر ئىشارىتى قىلغانلىقى ئۈچۈن لاگېرغا سولانغانلىقى ئاشكارىلاندى.

ئاتۇشقا قارىتا ئېلىپ بارغان تېلېفون زىيارەتلىرىمىز داۋامىدا ئاتۇشنىڭ سۈنتاغ كەنتىدىن لاگېرغا سولانغانلار ئارىسىدا ئىلگىرى قىرغىزىستاندا تىجارەت قىلىۋاتقان ئاكا-ئۇكا تىجارەتچىلەردىن مەمەتجان ئەلى بىلەن ئۆمەر ئەلىنىڭمۇ بارلىقى ئاشكارىلاندى. 2017‏-يىلى 3‏-ئايدا ئاتۇشقا تېلېفون قىلغان ۋاقتىمىزدا ئاتۇشتىكى دائىرىلەرنىڭ ئاھالىلەرگە بېسىم ئىشلىتىپ ئوتتۇرا ئاسىيادا تىجارەت قىلىۋاتقان ئائىلە ئەزالىرىنى قايتۇرۇپ كېلىشكە قىستىغانلىقى ئاشكارىلانغان ئىدى. سۈنتاغ كەنتىدىكى مەزكۇر ئاكا-ئۇكا تىجارەتچىلەرنىڭ دائىرىلەرنىڭ قىستىشى بويىچە ۋە ياكى ئۆزلىكىدىن قايتىپ كەلگەنلىكى ھازىرچە مەلۇم ئەمەس. ئىلگىرىلەپ ئېلىپ بارغان ئېنىقلاشلىرىمىز داۋامىدا مەزكۇر ئاكا-ئۇكا ئائىلىسىدىن جەمئىي بەش كىشىنىڭ لاگېردا ئىكەنلىكى، بۇلارنىڭ ئىچىدە خىتاي ئۆلكىلىرىدىن تېخى يېقىندا ئوقۇش پۈتتۈرۈپ كەلگەن سانىيە ئەلىنىڭمۇ بارلىقى ئاشكارىلاندى. مەلۇم بولۇشىچە، بۇ ئاكا-ئۇكىلاردىن مەمەتجان ئەلى بۇنىڭدىن 15 يىللار ئىلگىرى ئالەمدىن ئۆتكەن ئاتۇشتىكى ئاتاقلىق دىنىي زات رۇستەم قارىھاجىنىڭ جىنازا نامىزىدا شاھادەت بارمىقىنى چىقىرىپ، تەكبىر ئىشارىتى قىلغانلىقى ئۈچۈن تۇتۇلغان. 

تەپسىلاتى...

تۈركىيەدىن يۇرتىغا قايتقان مۇزىكانت ئوقۇغۇچى مەمەتيۈسۈپ راخماننىڭ ئاتۇشتا لاگېردا ئىكەنلىكى دەلىللەندى

خەۋەر مەنبەسى: ئەركىن ئاسىيا

يېقىندا ئىجتىمائىي تاراتقۇلاردا تۈركىيەنىڭ بۈلەنت ئەجەۋىت ئۇنىۋېرسىتېتىدا ئېلېكتر ئىنژېنېرلىقى كەسپىدە ئوقۇۋاتقان مەمەتيۈسۈپ راخماننىڭ 2017-يىلى 1-يانۋار كۈنى ئىستانبۇلدىن ئۈرۈمچىگە قاراپ ئۇچقاندىن كېيىنلا ئىز-دېرىكى يوقالغانلىقى خەۋەر قىلىنغان. فەيسبوكتىكى ئۇچۇردا ئۇنىڭ بىر مۇزىكا ھەۋەسكارى ئىكەنلىكى ۋە بىر مەھەل ئاتاقلىق سەنئەتچى ئابدۇرېھىم ھېيتقا شاگىرت بولغانلىقى ئەسكەرتىلگەن ئىدى. مۇخبىرىمىزنىڭ تېلېفون زىيارەتلىرى داۋامىدا مەمەتيۈسۈپ راخماننىڭ ئاتۇشنىڭ ئازاق يېزا ئوڭئېرىق كەنتىگە نوپۇسلۇق ئىكەنلىكى ۋە نۆۋەتتە ئاتۇشتىكى يىغىۋېلىش لاگېرىدا ئىكەنلىكى دەلىللەندى.

تەپسىلاتى...

غەرب تەتقىقاتچىلىرى خىتايدىن سەنۇبەر تۇرسۇن قاتارلىق ئۇيغۇر داڭدارلىرىنى قويۇپ بېرىشنى تەلەپ قىلدى

خەۋەر مەنبەسى: ئەركىن ئاسىيا

ئۇيغۇر سەنئەتكارى سەنۇبەر تۇرسۇننىڭ تۇتقۇن قىلىنىشى سەۋەبلىك ئۇنىڭ ئىككى ھەپتىدىن كېيىن فىرانسىيەدە باشلىنىش ئالدىدا تۇرغان مەخسۇس كونسېرتى ئەمەلدىن قالدۇرۇلغان، بۇ مۇناسىۋەت بىلەن ئۇيغۇر مەدەنىيىتى ۋە سەنئىتى تەتقىقاتى بىلەن شۇغۇللىنىۋاتقان ياۋروپادىكى 40 تىن ئارتۇق تەتقىقاتچى ۋە پروفېسسور ئىمزالىق بىرلەشمە بايانات ئېلان قىلىپ، خىتايدىن سەنۇبەر تۇرسۇن قاتارلىق ئۇيغۇر سەنئەتكارى، زىيالىيلىرىنى دەرھال قويۇپ بېرىشنى تەلەپ قىلدى. تەپسىلاتىنى مۇخبىرىمىز گۈلچېھرەدىن ئاڭلاڭ.

تەپسىلاتى...

شى جىنپىڭنىڭ ئۇيغۇرلارغا قارشى ئۇرۇشى: «يېڭى چېگرا» دىكى كەچمىشلەر

خەۋەر مەنبەسى: ئەركىن ئاسىيا

ئاۋسترالىيە دۆلەتلىك ئۇنىۋېرسىتېتنىڭ مۇتەخەسسىسلىرىدىن گرېيم سىمىس ۋە لۇيىزا لىم بىرلىكتە ساھىبخانىلىق قىلىۋاتقان «شاكىچىك قىزىل پودكاست» سۇپىسىدىكى رادىئو سۆھبىتىدە نۆۋەتتە خىتاي ھەققىدىكى ئاساسىي چوڭ خەۋەرلەرنىڭ بىرى تەبىئىي ھالدا ئۇيغۇرلارغا باغلىنىپ قالىدىغانلىقى ئالغا سۈرۈلدى. بولۇپمۇ بۇ ھەقتىكى خەۋەرلەردىن ئەڭ تىپىك بولغىنى مىليونلىغان كىشىنىڭ لاگېرلارغا سولىنىشى بولۇپ، خىتاي ھۆكۈمىتى ئىزچىل بۇ خىل لاگېرلارنىڭ مەۋجۇتلۇقىنى ئىنكار قىلىپ كەلمەكتە. ئەمما رىياسەتچىلەر بىلەن سۆھبەتلەشكەن، ئۆزلىرىنىڭ يۇرتىنى بىردەك «شەرقىي تۈركىستان» دەپ تونۇشتۇرغان، شۇنداقلا ئادىلايد شەھىرىدىكى سانى بارغانسېرى ئېشىپ بېرىۋاتقان ئۇيغۇر شاھىتلار بۇ خىل لاگېرلار ھەققىدە كۆپلىگەن ئىنچىكە مەلۇماتلارنى تەمىن ئېتىپ كەلمەكتە ئىكەن.

تەپسىلاتى...

لاگېرغا تاشلانغان چەتئەل پۇقراسى: گۈلباھار جېلىلوۋا لاگېردا كۆرگەن قارا كۈنلەر (5)

خەۋەر مەنبەسى: ئەركىن ئاسىيا

قازاقىستان پۇقراسى بولغىنىغا قارىماي 2017-يىلى-5 ئايدا ئۈرۈمچىدە لاگېرغا قامالغان گۈلباھار جېلىلوۋا قاراڭغۇ كامىرىدا ياتقىنىغا 15 ئايدىن ئاشقان، ھاياتتىنمۇ ئۈمىدىنى ئۈزگەن كۈنلەرنىڭ بىرىدە كامېر ساقچىلىرى تۇيۇقسىزلا ئۇنىڭ ئىسمىنى چاقىرىدۇ. «بۇلار ئەمدى مېنى ئۆلتۈرىدىكەن-دە» دەپ ئويلىغان گۈلباھار قورقۇنچ ئىلىكىدە كامىرىدىن ئېلىپ چىقىلىپ بېشىدىكى قارا خالتا ئېلىۋېتىلگەندىمۇ، ھەتتا پۇت-قوللىرىدىكى كىشەنلەر ئېلىۋېتىلگەندىمۇ ئۆزىنىڭ ھۆرلۈككە چىققانلىقىغا ئىشەنمەيدۇ.

مۇخبىرىمىزنىڭ مەخسۇس زىيارىتىنى قوبۇل قىلغان شاھىت گۈلباھار خانىم ئۆزىنىڭ زۇلمەتلىك جازا لاگېرىدىن قۇتۇلۇپ يېڭىدىن ھاياتلىققا ئېرىشكەن ئاشۇ مىنۇتلىرىنى ئەسلەپ ئۆتتى.

يۇقىرىدىكى ئاۋاز ئۇلىنىشىدىن پروگراممىنىڭ تەپسىلاتىنى ئاڭلىغايسىز.

https://www.rfa.org/uyghur/xewerler/siyaset/gulbahar-jelilowa-01242019170748.html

تەپسىلاتى...

تاشپولات تېيىپنىڭ قىسمىتى: ئۆمۈرلۈك خىزمەت بەدىلىگە بېرىلگەن ئۆلۈم جازاسى

خەۋەر مەنبەسى: ئەركىن ئاسىيا

2017-يىلىدىن باشلاپ ئۇيغۇر جەمئىيىتىدە ئەڭ كۆزگە كۆرۈنگەن بىرنەچچە يۈز ئۇيغۇر زىيالىيسىنىڭ ئارقىمۇ-ئارقىدىن تۇتقۇن قىلىنىشى پۈتكۈل ئۇيغۇر جەمئىيىتىنى ۋەھىمىگە سالغان بولسا، 2018-يىلىنىڭ ئاخىرىدا تۇتقۇندىكى بۇ زىيالىيلارنىڭ ئالدىنقى رېتىدىن ئورۇن ئالغان تاشپولات تېيىپقا كېچىكتۈرمە ئۆلۈم جازاسى بېرىلىشى پۈتۈن دۇنيانى ھەيران قالدۇردى. چۈنكى ئۆلۈمگە ھۆكۈم قىلىنغان بۇ كىشى شىنجاڭ ئۇنىۋېرسىتېتىنىڭ مۇدىرى ئىدى. ئۇنىڭ پۈتكۈل ئۆمرى ئىلىم-پەندە چوڭقۇرلاپ ئىزدىنىش ھەمدە ئۇنىۋېرسىتېتنىڭ ئوقۇتۇش ئىشلىرىنى ياخشىلاش بىلەن ئۆتكەن بولۇپ، «ئۆلۈم جازاسى» دېگەن ئاتالغۇ بۇنداق بىر شەخسكە پەقەتلا جىپسىلاشمايتتى.

دەرۋەقە، دۇنيانىڭ تاشپولات تېيىپقا بېرىلگەن ئۆلۈم جازاسىغا ھەيران قېلىشى تاسادىپىيلىق ئەمەس ئىدى.

تەپسىلاتى...

«مىراج» شىركىتى ئىگىلىرىنىڭ بەزى ئائىلە ئەزالىرىغا قاماق جازاسى بېرىلگەن

خەۋەر مەنبەسى: ئەركىن ئاسىيا

خىتاي ھۆكۈمىتى ئۆتكەن يىلى «مىراج» شىركىتىنىڭ شېرىكلىرىدىن ئابدۇرېشىت ھاجى بىلەن ۋەلى ھاجى ۋە ئۇلارنىڭ ئائىلە ئەزالىرىنى ھەم بىر قىسىم ئۇرۇق-تۇغقان، قۇدا-باجىلىرىنى تۇتقۇن قىلىپ، تۈرمە ۋە يىغىۋېلىش لاگېرلىرىغا قامىغانلىقى مەلۇم بولغان ئىدى.

نۆۋەتتە دائىرىلەرنىڭ مەزكۇر شىركەتنىڭ ئىگىلىرىنىڭ بىر قىسىم ئائىلە ئەزالىرىنى، ئۇرۇق-تۇغقان ۋە قۇدا-باجىلىرىنى مەخپىي سوتلاپ، قاماق جازالىرىغا ھۆكۈم قىلغان ئىلگىرى سۈرۈلمەكتە. قاماق جازاسىغا ھۆكۈم قىلىنغانلارنىڭ ئارىسىدا «مىراج» شىركىتىنىڭ شېرىكى ئابدۇرېشىت ھاجىمنىڭ ئوغلى رىزائىدىن، سىڭلىسى مۇيەسسەر، ئىنىسى ئەمەتجان، قۇدىسى (يەنى رىزائىدىن بىلەن ئەمەتجاننىڭ قېيىنىئاتىسى) ئاتۇشنىڭ تىجەن يېزىسىدا ئولتۇرۇشلۇق دىنىي زات دادىخان ھاجىم شۇنداقلا ئابدۇرېشىت ھاجىمنىڭ يەنە بىر قۇدىسى، ئاتاقلىق ئۆي مۈلۈك سودىگىرى ئىمىنجان ھاجىم قاتارلىقلار بار ئىكەن.

خىتاي ھۆكۈمىتى ئۆتكەن يىلى «مىراج» شىركىتىنىڭ ئىگىلىرىدىن ئابدۇرېشىت ھاجىم بىلەن ۋەلى ھاجىمنى تۇتقۇن قىلىپ، مەزكۇر شىركەتنىڭ ئۈرۈمچىدىكى «مىراج» ناملىق ئىككى رېستورانىنى پېچەتلىگەن. مەزكۇر شىركەتنىڭ بەزى شېرىكلىرىنىڭ چەتئەلگە چىقىپ كېتىشكە مەجبۇر بولغانلىقى مەلۇم بولغان ئىدى. خىتاي دائىرىلىرىنىڭ مەزكۇر رېستورانىنى تاقاشتا مەزكۇر رېستوراننىڭ قويۇق ئۇيغۇر مىللىي ئۇسلۇبتىكى بېزەك ۋە نەقىشلىرىنىڭ «بۆلگۈنچىلىك» ۋە «ئاشقۇنلۇق» ئىدىيەلىرىنى ئويغىتىش ۋە تەرغىب قىلىش رولى بار دېگەننى باھانە قىلغانلىقى ئىلگىرى سۈرۈلگەن ئىدى.

تەپسىلاتى...