«NBC» ۋە «FOX» قاناللىرىدا ئۇيغۇر ئېلىدىكى لاگېرلارنىڭ ماھىيىتى ئاشكارىلاندى

خەۋەر مەنبەسى: ئەركىن ئاسىيا

ھۆرمەتلىك رادىيو ئاڭلىغۇچىلار، خىتاي ھۆكۈمىتىنىڭ ئۇيغۇر ئېلىدا يۈرگۈزىۋاتقان قاتتىق قوللۇق سىياسەتلىرى ۋە بولۇپمۇ ئۇنىڭ 2 مىليون ئەتراپىدا ئۇيغۇر قاتارلىق يەرلىك مىللەتلەرنى «قايتا تەربىيە مەركىزى» نامىدىكى لاگېرلارغا قاماپ، ئۇلارغا مېڭە يۇيۇش ھەرىكىتى ئېلىپ بېرىۋاتقانلىقى ئامېرىكا ھۆكۈمىتى ۋە شۇنداقلا ئامېرىكادىكى ھەرقايسى مەتبۇئاتلارنىڭ كۈچلۈك دىققىتىگە ئېرىشىپ كەلمەكتە.

يېقىندىن بۇيان ئامېرىكادىكى ھەرقايسى تېلىۋىزىيەلەرنىڭ خەۋەر پروگراممىلىرى ۋە ياكى باشقا سۆھبەت پروگراممىلىرىدا ئۇيغۇرلار مەسىلىسى ئالاھىدە تىلغا ئېلىنىدىغان، مۇزاكىرە قىلىنىدىغان بولدى. بولۇپمۇ ئۇيغۇرلار مەسىلىسىنىڭ ئادەتتە كىشىلەر ئەڭ كۆپ تېلىۋىزىيە كۆرۈدىغان «ئالتۇن ۋاقىت» لاردىكى مۇھىم پروگراممىلاردا بېرىلىۋاتقانلىقى ئالاھىدە ئەسكەرتىشكە ئەرزىيدۇ.

تەپسىلاتى...

مەدىنە ھىلالىددىن: «سىڭلىم دۆلەتنى پارچىلاش گۇمانى بىلەن سوتلىنىۋېتىپتۇ»

خەۋەر مەنبەسى: ئەركىن ئاسىيا

ھازىر تۈركىيەنىڭ ئانتاليا شەھىرىدە تۇرۇۋاتقان مەدىنە ھىلالىددىن خانىم زىيارىتىمىزنى قوبۇل قىلىپ، سىڭلىسى مەۋلۇدە ھىلالىددىننىڭ ئىككى يىلغا يېقىن جازا لاگېرىدا تۇتۇپ تۇرۇلغاندىن كېيىن قويۇپ بېرىلگەنلىكىنى، ئۇزۇن ئۆتمەيلە «دۆلەتنى پارچىلاش جىنايەتى» دېگەن گۇمان بىلەن قايتا تەكشۈرۈش ئۈچۈن تۇتۇپ كېتىلگەنلىكىنى بايان قىلدى.

بىر يىلدىن بۇيان خەلقئارا مەتبۇئاتلاردا خىتاينىڭ ئۇيغۇر دىيارىدا بىر مىليوندىن ئارتۇق ئۇيغۇر، قازاق ۋە باشقا تۈركىي مىللەت كىشىلىرىنى «تەربىيەلەش مەركىزى» دەپ ئاتىۋالغان «يىغىۋېلىش لاگېرلىرى» غا سولاپ، ئۇلارغا قارىتا مېڭە يۇيۇش، جىسمانىي، مەنىۋى ھەتتا ئېتنىك جەھەتتىن خورلاش ئېلىپ بېرىۋاتقانلىقى، كۆپ ساندا كىشىلەرنىڭ «دۆلەتنى پارچىلاشقا ئۇرۇنۇش» جىنايىتى بىلەن سوتلىنىۋاتقانلىقى توغرىسىدىكى خەۋەرلەر تارقالماقتا.

تەپسىلاتى...

كۇچالىق دوختۇر تاھىر ھەسەن چەتئەلدىكى «خەتەرلىك كىشىلەر» بىلەن تېلېفونلاشقانلىقى ئۈچۈن تۇتۇلغان

خەۋەر مەنبەسى: ئەركىن ئاسىيا

پائالىيەتچى ئابدۇۋەلى ئايۇپ تەرىپىدىن تۈزۈلگەن «تۇتقۇندىكى زىيالىيلار تىزىملىكى» دە كۇچا ناھىيەلىك دوختۇرخانىنىڭ دوختۇرى تاھىر ھەسەننىڭمۇ تۇتقۇندا ئىكەنلىكى يېزىلغان. مۇخبىرىمىزنىڭ بۇ ھەقتە ئېلىپ بارغان ئېنىقلاشلىرى داۋامىدا مەزكۇر ئۇچۇرنىڭ توغرىلىقى دەلىللەندى ۋە ئۇنىڭ چەتئەلدىكى ئاتالمىش «خەتەرلىك كىشىلەر» بىلەن تېلېفونلاشقانلىقى ئۈچۈن تۇتۇلغانلىقى ئايدىڭلاشتى.

ھۆرمەتلىك رادىئو ئاڭلىغۇچىلار، مەزكۇر «تۇتقۇندىكى زىيالىيلار تىزىملىكى» دە كۇچا ناھىيەلىك دوختۇرخانىنىڭ دوختۇرى تاھىر ھەسەننىڭ لاگېردا ئىكەنلىكى يېزىلغان. ئەمما ئۇنىڭ قاچان ۋە نېمە ئۈچۈن تۇتۇلغانلىقى بايان قىلىنمىغان. تېلېفونىمىزنى قوبۇل قىلغان كۇچا ناھىيەلىك دوختۇرخانا خادىملىرى تاھىر ھەسەننىڭ دوختۇرخانىدا بار-يوقلۇقى ھەققىدىكى سوئالىمىزغا جاۋاب بەرمىدى. تېلېفونىمىزنى قوبۇل قىلغان يەنە بىر خادىم دوختۇر تاھىر ھەسەننىڭ قاچان تۇتۇلغانلىقى ھەققىدىكى سوئالىمىزغا ئۆزىنىڭ ئالدىراشلىقىنى سەۋەب قىلىپ كۆرسىتىپ، جاۋاب بەرمىدى. ئەمما خىزمەتدىشى تاھىر ھەسەننىڭ تۇتقۇندا ئىكەنلىكىنى رەت قىلمىدى.

تەپسىلاتى...

كورلادىكى «جاھان» پۇل مۇئامىلە پاي چېكى شىركىتى ۋە «606 تىل مەكتىپى» نىڭ ساھىبى ھەسەنجان ئىسمائىل لاگېردا

خەۋەر مەنبەسى: ئەركىن ئاسىيا

خىتاينىڭ ئۇيغۇر رايونىدىكى ئاتالمىش كەسپىي تەربىيە مەكتەپلىرىگە سولىۋېلىنغان مىليونلارچە تۇتقۇنلار ئارىسىدا ئۆز كەسپىدە مۇتەخەسسىس بولۇپ ئۇتۇق قازانغان زور بىر تۈركۈم ئىختىساس ئىگىلىرىنىڭ بارلىقى مىڭلارچە پاكىتلار بىلەن دەلىللەنمەكتە. بۈگۈن دەلىللەنگىنى كورلا شەھىرىدە «606 تىل مەكتىپى» نامىدا مەكتەپ ئاچقان ۋە ئارقىدىن «جاھان» پۇل مۇئامىلە پاي چېكى شىركىتى قۇرغان 41 ياشلىق كارخانىچى ھەسەنجان ئىسمائىلنىڭ خوتۇنسۇمبۇل ناھىيەسىدىكى بىر لاگېردا بىر يىلدىن بۇيان تۇتقۇندا ئىكەنلىكىدۇر.

مەلۇم بولۇشىچە، داليەن پەن-تېخنىكا ئۇنىۋېرسىتېتىنىڭ سودا-سانائەت كەسپىنى پۈتتۈرگەن ھەسەنجان ئىسمائىل نۆۋەتتە بېلگىيەدە ياشاۋاتقان سابىق شېرىكى ئېلىجان ئەمەت بىلەن بىرلىكتە كورلادا تۇنجى بولۇپ «606 تىل مەكتىپى» نى تەسىس قىلغان. خۇسۇسى ئىگىلىكتىكى بۇ مەكتەپ ئارقىلىق بەلگىلىك دەرىجىدە ھەم ئىجتىمائىي ھەم ئىقتىسادىي ئۈنۈمگە ئېرىشكەن بۇ ئىككى شېرىك كورلادا يەنە تۇنجى بولۇپ «جاھان» پۇل مۇئامىلە پاي چېكى شىركىتىنى تەسىس قىلغان.

ئېلىجان ئەمەتنىڭ بايان قىلىشىچە، ئىنگلىزچە، تۈركچە ۋە خىتايچە تىللارنى ئۆگىتىشتىن باشقا ئوقۇغۇچىلىرىنىڭ چەتئەلدە ئوقۇش ئىمكانلىرى ئۈچۈن رەسمىيەت مۇلازىمىتى بىلەن شۇغۇللىنىپ ئىزچىل روناق تېپىۋاتقان بۇ مەكتەپ ۋە شىركەتنىڭ مەبلىغى 3 مىليون يۈەندىن ئاشقان بىر مەزگىلدە ئۇيغۇر رايونىدا چىققان سىياسىي جۇدۇننىڭ زەربىسىگە ئۇچرىغان. شىركەتنىڭ كورلادىكى ساھىبى ھەسەنجان ئىسمائىل ئۆتكەن يىلنىڭ ئوتتۇرىلىرى ئۇشتۇمتۇت غايىب بولغان.

تېلېفونىمىزنى قوبۇل قىلغان كورلا شەھەرلىك مائارىپ ئىدارىسىنىڭ خادىملىرى دەسلەپتە بۇنداق بىر مەكتەپ ۋە ھەسەنجان ئىسمائىل ئىسىملىك بىر كارخانىچىنىڭ بارلىقىدىن خەۋەرسىزلىكىنى ئېيتتى.

مەزكۇر مەكتەپ ۋە شىركەتنىڭ ئەھۋالى ھەققىدە تەپسىلىي مەلۇمات بەرگەن ئېلىجان ئەمەت ھەسەنجان ئىسمائىلنىڭ تۇتۇلۇش سەۋەبى ھەققىدە بىر ئېھتىماللىقنى بايان قىلدى.

تەپسىلاتى...

ئامېرىكادىكى خەلقئارالىق ئورگانلار ئۇيغۇر پروفېسسور تاشپولات تېيىپنى قۇتقۇزۇپ قېلىشقا ھەرىكەت قىلماقتا

خەۋەر مەنبەسى: ئەركىن ئاسىيا

خەلقئارا كەچۈرۈم تەشكىلاتى يېقىندا جىددىي بايانات ئېلان قىلىپ، شىنجاڭ ئۇنىۋېرسىتېتىنىڭ سابىق مۇدىرى ۋە پروفېسسورى تاشپولات تېيىپقا بېرىلگەن ئىككى يىل كېچىكتۈرۈپ ئىجرا قىلىنىدىغان ئۆلۈم جازاسىنىڭ مۇشۇ يىل 9-ئاي ئىچىدە ئىجرا قىلىنىش ئېھتىماللىقى بارلىقىنى ئېلان قىلغاندىن كېيىن بۇ مەسىلە ئۇيغۇرلارنىڭ ۋەزىيىتىنى يېقىندىن كۆزىتىپ كېلىۋاتقان ھەرقايسى ئورگان ۋە شەخسلەرنىڭ كۈچلۈك دىققىتىنى قوزغىدى.

ئۇلار تاشپولات تېيىپقا ئوخشاش قىممەتلىك بىر بىلىم ئادىمىنىڭ خىتاي ھۆكۈمىتىنىڭ دەلىل-ئىسپاتسىز قارىلاشلىرى ئاستىدا ئۆلۈمگە ھۆكۈم قىلىنىشىنىڭ ئالدىنى ئېلىش ئۈچۈن خىتاي ھۆكۈمىتى ۋە خىتاي دۆلەت رەئىسى شى جىنپىڭگە چاقىرىق قىلدى.

19-سېنتەبىر كۈنى مەركىزى ئامېرىكادىكى خەلقئارالىق ئورگانلاردىن «ئالىملارغا غەمخورلۇق كومىتېتى» خىتاي دۆلەت رەئىسى شى جىنپىڭغا ئوچۇق خەت يېزىش ئارقىلىق تاشپولات تېيىپنىڭ ئاقىۋىتىنى سۈرۈشتە قىلدى. مەزكۇر ئورگان ئوچۇق خېتىدە تاشپولات تېيىپنىڭ مول-ھوسۇللۇق بىر بىلىم ئادىمى ۋە تالانتلىق يېتەكچى ئىكەنلىكىنى تەكىتلىگەن.

تەپسىلاتى...

لاگېر شاھىتى زۇمرەت داۋۇتنىڭ لاگېردا كۆرگەن-بىلگەنلىرى (3)

خەۋەر مەنبەسى: ئەركىن ئاسىيا

2017-يىلىدىن ئېتىبارەن خىتاي ھۆكۈمىتى «قايتا تەربىيىلەش» نامىدا ئۇيغۇر ۋە باشقا مۇسۇلمان مىللەتلەرنى كەڭ كۆلەمدە تۇتقۇن قىلىپ، ئىككى مىليوندىن ئارتۇق كىشىنى يىغىۋېلىش لاگېرلارغا قامىغانلىقى مەلۇم بولماقتا. بۈگۈنگىچە تۈرمە شەكلىدە باشقۇرۇلۇۋاتقان بۇ سىرلىق لاگېرلاردىن قۇتۇلۇپ چىققان ئۇيغۇرلار ئىنتايىن ئاز. ئۇنىڭ ئۈستىگە بۇ لاگېرلارنىڭ ئىچكى سىرلىرى ھەمدە ئۆزىنىڭ تارتقان زۇلۇملىرى ھەققىدە گۇۋاھلىق بەرگەن كىشىلەرمۇ ساناقلىق. لاگېرلاردىن قۇتۇلۇپ چىققان ساناقلىق تۇتقۇنلارنىڭ كۆپىنچىسى ئىككىنچى بىر دۆلەتنىڭ پۇقراسى بولغانلىقى ۋە ياكى باشقا دۆلەت پۇقراسى بىلەن توي قىلغانلىقىدەك ئامىللار تۈپەيلىدىن قويۇپ بېرىلگەن كىشىلەردۇر.

لاگېر شاھىتى زۇمرەت داۋۇتمۇ دەل شۇنداق كىشىلەرنىڭ بىرى. ئۇمۇ پاكىستانلىق ئەر بىلەن توي قىلغانلىقى سەۋەبلىك پاكىستان دائىرىلىرىنىڭ ئارىلىشىشى بىلەن خىتاي لاگېرلىرىدىن قۇتۇلۇپ چىققان ئۇيغۇرلارنىڭ بىرىدۇر. ئەمما ئۇ 2 ئايدىن ئارتۇق لاگېر ھاياتىدا بېشىدىن كەچۈرگەن كەچمىشلىرىنىڭ پسىخىكىلىق تەسىرلىرىدىن باشقا كۈندە مەجبۇرىي ئىچكۈزۈلگەن دورا، ھەپتىدە بىر مەجبۇرىي ئۇرۇلغان نامەلۇم ئوكۇللارنىڭ ۋۇجۇدىدا پەيدا قىلغان ئەكس تەسىرلىرىدىن قۇتۇلالماي كەلمەكتە. زۇمرەت گەرچە بۇ دورا ۋە ئوكۇللارنىڭ نېمىلىكىنى بىلمىسىمۇ، ھازىرغىچە ئۆزىدە پەيدا قىلىۋاتقان تەسىرلىرىنى ھېس قىلىپ ياشىماقتا ئىكەن. ھەتتا ئۇ بۇنى لاگېردا ئۆزىگە بىر قانچە قېتىم مەجبۇرىي ئۇرۇلغان ئوكۇلنىڭ خۇمار قىلىش كۈچىدىن بولۇشى مۇمكىن دەپ گۇمان قىلىدىكەن.

تەپسىلاتى...

لاگېر شاھىتى زۇمرەت داۋۇتنىڭ لاگېردا كۆرگەن-بىلگەنلىرى (2)

خەۋەر مەنبەسى: ئەركىن ئاسىيا

لاگېر شاھىتى زۇمرەت داۋۇت يۈرۈشلۈك سۆھبىتىمىزنىڭ 1-سانىدا ئۆزىنىڭ 2018-يىلى 3-ئاينىڭ 31-كۈنى ئۈرۈمچى يۇقىرى پەن-تېخنىكا تەرەققىيات رايونى مەھەللە كومىتېتى تەرىپىدىن چاقىرتىلغانلىقىنى، شۇ كەتكەنچە بېشىغا قارا خالتا كىيدۈرۈلۈپ مەلۇم دوختۇرخانىغا ئېلىپ بېرىلغانلىقىنى، بۇ يەردە پۈتۈن بەدەن تەكشۈرۈشىدىن ئۆتكەندىن كېيىن بېشىغا يەنە قارا خالتا كىيدۈرۈلۈپ ئۈرۈمچى يۇقىرى پەن-تېخنىكا تەرەققىيات رايونىدىكى ئاتالمىش «تەربىيىلەش مەركىزى»، يەنى بېيزەن (شىمالىي ۋوگزال) تۈرمىسىگە ئېلىپ كېلىنگەنلىكىنى بايان قىلغان ئىدى.

لاگېردىكى زۇلۇم ۋە خورلۇقلارنىڭ مۇقەددىمىسى ئۇنىڭ 3 نەپەر ئەر ساقچى ئالدىدا تۈرمە كىيىمىنى يۆتكەشكە مەجبۇرلىنىشى بىلەن باشلانغان بولسا ئۇنىڭ ئىچىدىكى ھەقىقىي زۇلۇم گۇندىپايلارنىڭ ئۇنىڭ پۇتىغا 5 كىلوگرام ئېغىرلىقتىكى كىشەن سېلىپ، قاراڭغۇ كامېرغا ئىتتىرىپ كىرگۈزگەن شۇ كېچىدىن باشلىنىدۇ.

تەپسىلاتى...

لاگېردىن قۇتۇلۇپ چىققان يەنە بىر شاھىت زۇمرەت داۋۇت گۇۋاھلىق بەردى

خەۋەر مەنبەسى: ئەركىن ئاسىيا

بانكا ھېسابى سەۋەبلىك لاگېرغا قامىلىش

زۇمرەت داۋۇت ئۈرۈمچىدە تۇغۇلۇپ ئۆسكەن ئۇيغۇر ئايال بولۇپ، ئۇ ئۈرۈمچى-پاكىستان ئارىسىدا يەككە تىجارەت بىلەن شۇغۇللىنىدىغان پاكىستانلىق سودىگەر ئىمران مۇھەممەد بىلەن 2005-يىلى توي قىلغان ئىكەن. ئۇ بۇ يىل 37 ياشقا كىرگەن بولۇپ 3 بالىنىڭ ئانىسىدۇر. زۇمرەت داۋۇت 2018-يىلى 3-ئاينىڭ 31-كۈنى ئۈرۈمچىدىكى پەن-تېخنىكا تەرەققىيات رايونى مەھەللە كومىتېتى تەرىپىدىن چاقىرتىلىپ كېتىلىپ، ئۈرۈمچىدىكى يەرلىكلەر بېيزەن تۈرمىسى دەپ ئاتايدىغان، ئەمما خىتاي دائىرىلىرى «ئۈرۈمچى يۇقىرى پەن-تېخنىكا تەرەققىيات رايونى قايتا تەربىيىلەش مەركىزى» دەپ ئاتايدىغان لاگېرغا قامالغان.

«31-مارت ئىنتايىن نورمال بىر شەنبە كۈنى ئىدى، مەھەللە كومىتېتىدىن تېلېفون كەلدى. ئۇلارنىڭ جىددىي كېلىپ كەت دېگەن بۇيرۇقى بويىچە باردىم. ئويلىمىغان يەردىن. . . .» دەپ ئەسلىمىسىنى باشلىدى زۇمرەت.

تەپسىلاتى...

يېڭىشەھەر ئەرمۇدۇندا ئىدرىس قۇددۇس ۋە ھېزىم قۇددۇس ئاكا-ئۇكىلارنىڭ لاگېردا ئۆلگەنلىكى دەلىللەندى

خەۋەر مەنبەسى: ئەركىن ئاسىيا

جەمئىيەت خەۋەرلىرىدە بايان قىلىشىچە، ئۇيغۇر رايونىدىكى يىغىۋېلىش لاگېرلىرىدا ئېلىپ بېرىلىۋاتقان قېيىن-قىستاقتىن باشقا ناچار ياتاق، ناچار تاماق ۋە ناچار داۋالاش شارائىتلىرىمۇ ھەر كۈنى دېگۈدەك كۆپ ساندا كىشىنىڭ ئۆلۈمىگە سەۋەب بولماقتا. ئەمما دائىرىلەر تا ھازىرغا قەدەر، خۇددى لاگېردا يېتىۋاتقانلارنىڭ ئومۇمى سانى ھەققىدە ھېچقاچان مەلۇمات بېرىپ باقمىغاندەك لاگېردا ئۆلگەنلەرنىڭ سانى ھەققىدىمۇ مەلۇمات بەرمىدى. شۇڭا بىز يېقىنقى ئاياللاردىكى لاگېرلار توغرۇلۇق ئېنىقلاشلىرىمىزدا، لاگېردىكى ئۆلۈم-يېتىم ۋەقەلىرىنى ئاساسلىق دىققەت مەركىزى قىلدۇق.

مەلۇم بولۇشىچە، دائىرىلەر لاگېردا ئۆلگەنلەرنىڭ ئۆلۈم ئۇچۇرىنى ئۆلگۈچىنىڭ بىۋاسىتە ئۇرۇق-تۇغقانلىرىدىن باشقىلاردىن پۈتۈنلەي سىر تۇتماقتا. ھەتتا ئاساسى قاتلامدىكى ساقچى خادىملىرىمۇ، ئۆزى مەسئۇل كەنت ياكى مەھەللە سىرتىدىكى كىشىلەرنىڭ لاگېردىكى ئۆلۈم ھادىسىلىرىدىن خەۋەرسىز قالدۇرۇلماقتا. ئېنىقلاشلىرىمىزدىن يەنە مەلۇم بولۇشىچە يېزىلارغا چۈشكەن ھەر دەرىجىلىك خىزمەت گۇرۇپپىلىرى لاگېردا ئۆلگەنلەرنىڭ ئەھۋالىنى يوشۇرۇش ۋە ئۇنىڭ جەمئىيەتكە تارقىلىشىنىڭ ئالدىنى ئېلىش ئۈچۈن ۋەزىپەلەندۈرۈلمەكتە. قەشقەرنىڭ يېڭىشەھەر ناھىيەسىگە خىزمەتكە چۈشكەن بىر خادىم، ئۆزى مەسئۇل بولمىغان ئەرمۇدۇن يېزا 3-كەنت 5-مەھەللىدە لاگېردا ئۆلگەن بىرمۇ كىشى يوقلۇقىنى بايان قىلغان ئىدى. ئەمما مەزكۇر مەھەللە باشلىقى بۇ مەھەللىدىن لاگېرغا ئەكېتىلگەنلەردىن ئاكا-ئۇكا ئىدرىس قۇددۇس بىلەن ھېزىم قۇددۇسنىڭ بۇلتۇر يىلنىڭ ئاخىرى ۋە بۇ يىلنىڭ ئوتتۇرىلىرى بولۇپ، ھەر ئىككىسىنىڭ لاگېردا جان ئۈزگەنلىكىنى ئاشكارىلىدى.

تەپسىلاتى...

ئىلى ئوبلاستلىق خەلق قۇرۇلتىيىدىن پېنسىيەگە چىققان تۇرسۇن بارات ۋە ئۇنىڭ ئايالى 20 يىل كېسىلگەن

خەۋەر مەنبەسى: ئەركىن ئاسىيا

7 يىلدىن بۇيان ئىستانبۇلدا ياشاۋاتقان شەمسىيەنىڭ 70 ياش قارىسىنى ئالغان، يۈرەك ۋە ئېغىر دىئابىت كېسىلىگە گىرپتار ئاتا-ئانىسىنىڭ 20 يىللىق قاماققا ھۆكۈم قىلىنىشى ھەققىدىكى گۇۋاھلىقى، خىتاي ھۆكۈمىتىنىڭ رايوندا ئۇيغۇرلارغا، خىتاي ھۆكۈمىتىنىڭ ئۇيغۇرلارنى لاگېرلارغا قاماش ۋە تۇتقۇن قىلىشتا ئۇلارنىڭ كېسەل ياكى ياشىنىپ قالغانلىقىنىمۇ قارىماي، قارا قويۇق، قانۇنسىز ھالدا، ئىنسانپەرۋەرلىككە پۈتۈنلەي يات تەدبىرلەر ئارقىلىق بۇ خىل باستۇرۇش سىياسەتلىرىنى ئىجرا قىلىۋاتقانلىقى كۆپ تەرەپلەردىن ئىسپاتلاپ تۇرماقتا.

تەپسىلاتى...