د ئۇ ق ئاخباراتى : خىتاينىڭ ئۇيغۇر مىللىي مائارىپىنى خىتايلاشتۇرۇش سىياسىتى , تېخىمۇ زور نارازىلىق ھەرىكەتلىرىگە سەۋەبچى بولۇشى مۇمكىن !

د ئۇ ق تەشۋىقات مەركىزى
2010-يىلى 7-ئاينىڭ 26-كۈنى

” شىنخۇا ئاخبارات ئاگېنتلىقى ” نىڭ 2010 – يىلى 7 – ئاينىڭ 27 – كۈنى خەۋەر قىلىشىچە، نۆۋەتتە شەرقىي تۈركىستاندا ” قوش تىللىق يەسلى ” دەپ ئاتالغان ۋە يەرلىك ئۆسمۈرلەر ئۈچۈن تەسىس قىلىنغان  خىتايچە يەسلىلەردە تەربىيىلىنىۋاتقان يەرلىك ئۆسمۈرلەرنىڭ ئومۇمى سانى 290 مىڭ نەپەرگە، بۇ خىل يەسلىلەرنىڭ سانى بولسا 1695 كە يەتكەن.

پەقەت 2010 – يىلى ئىچىدىلا خىتاي مەركىزى ھۆكۈمىتى تەرىپىدىن ئاتالمىش ” قوش تىللىق يەسلى ” قۇرۇلۇشى ئۈچۈن ئاجرىتىلغان مەبلەغ 1 مىليارد 390 مىليون يۈەنگە، ” ئاپتونوم رايون ” دىن ئاجرىتىلغان مەبلەغ بولسا 468 مىليون يۈەنگە يەتكەن.

خىتاي ھۆكۈمىتى، 2012 – يىلىغا قەدەر يەرلىك ئۆسمۈرلەر ئۈچۈن تەسىس قىلىنغان  خىتايچە يەسلىلەرنىڭ ئومۇملىشىش نىسبىتىنى 85 پىرسەنتتىن ئاشۇرۇشنى پىلانلىغان.

خىتاي مەركىزى ھۆكۈمىتى تەرىپىدىن 2008 – يىلى، ” شىنجاڭدا ئازسانلىق مىللەتلەرگە قارىتا قوش تىللىق يەسلى بەرپا قىلىش قۇرۇلۇشى ” يولغا قويۇلغان بولۇپ، 2008 – يىلىدىن 2012 – يىلىغىچە بولغان مەزگىل ئىچىدە خىتاي ھۆكۈمىتى بۇ قۇرۇلۇش ئۈچۈن جەمئىي 4 مىليارد 200 مىليون يۈەن مەبلەغ سېلىشنى پىلانلىغان.

خىتاي ھۆكۈمىتى يەنە ئاتالمىش ” قوش تىللىق يەسلى ” لەر ئۈچۈن زۆرۈر كېرەكلىك بولغان ئوقۇتقۇچىلار قوشۇنىنى زورايتىش ئۈچۈنمۇ جىددىي ھەرىكەتكە ئۆتكەن.

تەپسىلاتى...

د ئۇ ق باياناتى : بارىن ئىنقىلابىنىڭ 20 يىللىقىنى خاتىرىلەيمىز!

2010-يىلى 4-ئاينىڭ 4-كۈنى 

بۇندىن 20 يىل مۇقەددەم، يەنى، 1990 – يىلى 4 – ئاينىڭ 5 – كۈنى، شەرقىي تۈركىستاندا،  بارىن يېزىسىدا ھەيۋەتلىك كۈرەش سىگنالى ياڭراپ، زۇلمەت قاپلىغان بۇ زېمىندا خەلقىمىزنىڭ خىتاي مۇستەملىكىچىلىرىگە قارشى نەرە سادالىرى يەر – جاھاننى تىترەتكەن ئىدى.

ئۇشبۇ مۇقەددەس كۈندە، زەينىدىن يۈسۈپ باشچىلىقىدىكى قەھرىمان ئوغۇل – قىزلىرىمىز، خىتاي مۇستەملىكىچىلىرىنىڭ زۇلۇمىغا باش ئەگىپ، قۇل بولۇپ ياشاشتىن، ئۆز خەلقىنىڭ ئەركىنلىكى ۋە ئازادلىقى ئۈچۈن جېنىنى پىدا قىلىشنى شەرەپ دەپ بىلگەن ئىدى.

بارىن قەھرىمانلىرى ئۆزلىرىنىڭ قىممەتلىك ھاياتى بەدىلىگە كۈرەشچان ئۇيغۇر خەلقىنىڭ ۋە جەڭگىۋار ئەجدادلىرىمىزنىڭ زۇلۇمغا ۋە مۇستەملىكىچىلەرگە تەز پۈكمەيدىغان كۈرەشچان روھىنى نامايان قىلغان ئىدى.

بارىن ئەزىمەتلىرى ئۇيغۇر خەلقىنىڭ ئەركىنلىككە، ھۆرلۈككە بولغان تەشنالىقى ۋە ئارزۇسىنى پۈتۈن دۇنياغا جاكارلاش بىلەن بىرگە، خەلقىمىزنىڭ دىلىغا مىللىي ئويغىنىش ۋە مىللىي كۈرەش ئۇرۇقىنى چاچقان ئىدى.

بارىن ئىنقىلابى، ئۇيغۇر پەرزەنتلىرى ئۈچۈن ئەبەدى خاتىرىلەشكە ئەرزىيدىغان بىر مۇقەددەس كۈن سۈپىتىدە تارىخ بەتلىرىدىن مەڭگۈ ئورۇن ئالدى.

تەپسىلاتى...

د ئۇ ق، ئامېرىكىنىڭ كامبودژا جازاسىنى قارشى ئالىدىغانلىقىنى بىلدۈردى

ر ف ئا خەۋىرى
2010-يىلى 4-ئاينىڭ 2-كۈنى

ئامېرىكا تۈنۈگۈن كامبودژانىڭ بۇلتۇر 12 – ئاي مەزگىلىدە 20 نەپەر ئۇيغۇرنى خىتايغا قايتۇرۇپ بەرگەنلىكىگە نارازىلىق بىلدۈرۈش ئۈچۈن، كامبودژاغا بېرىلىدىغان ھەربىي ياردەمنى توختاتقانلىقىنى ئېلان قىلغان ئىدى. بۈگۈن دۇنيا ئۇيغۇر قۇرۇلتىيى بۇ ھەقتە بايانات بېرىپ، ئامېرىكىنىڭ كامبودژاغا قاراتقان جازاسىنى قارشى ئالىدىغانلىقىنى بىلدۈردى.

بىرلەشمە ئاگېنتلىقىنىڭ خەۋەر قىلىشىچە، ئامېرىكا تاشقى ئىشلار مىنىستىرلىقىنىڭ باياناتچىسى پ ج كروۋلىي پەيشەنبە كۈنى مۇخبىرلارغا قىلغان سۆزىدە , ئامېرىكىنىڭ كامبودژانىڭ 20 نەپەر ئۇيغۇرنى خىتايغا قايتۇرۇپ بەرگەنلىكىگە نارازىلىق بىلدۈرۈش يۈزىسىدىن، كامبودژاغا بېرىۋاتقان ھەربىي ياردەم پۇلىنى توختاتقانلىقىنى ھەم بۇ قارارىنى كامبودژاغا بىلدۈرگەنلىكىنى ئېيتتى. پ ج كروۋلىي سۆزىدە” ئامېرىكىنىڭ كامبودژاغا ئەۋەتمەكچى بولغان 200 دانە ھەربىي ئاپتوموبىلىمۇ بۇ سەۋەبتىن توختىتىپ قويۇلۇشى مۇمكىن ” دېگەن.

بۇلتۇر 12 – ئاينىڭ 19 – كۈنى كامبودژا ھۆكۈمىتى، خىتاي تاشقى ئىشلار مۇئاۋىن مىنىستىرى شى جىنپىڭ كامبودژانى زىيارەت قىلىش ھارپىسىدا، “5 – ئىيۇل ئۈرۈمچى ۋەقەسى” دىن كېيىن، خىتايدىن قېچىپ چىقىپ، پاناھلىق تىلىگەن 22 نەپەر ئۇيغۇرنىڭ 20 نەپىرىنى، خەلقئارا جەمئىيەتنىڭ قاتتىق ئەيىبلىشىگە قارىماي خىتايغا قايتۇرۇپ بەرگەن ئىدى. بۇ ئۇيغۇرلار خىتايغا قايتۇرۇلۇپ ئىككى كۈندىن كېيىن، يەنى 21 – دېكابىر كۈنى شى جىنپىڭ كامبودژا ھۆكۈمىتى بىلەن 1 مىليارد دوللارلىق ياردەم كېلىشىمى ئىمزالىغان ئىدى.

ۋەقەدىن كېيىن خەلقئارا جەمئىيەت كامبودژانى ھەم كامبودژاغا بېسىم ئىشلىتىپ بۇ 20 نەپەر ئۇيغۇرنى قايتۇرۇپ كەتكەن خىتاي ھۆكۈمىتىنى قاتتىق ئەيىبلەپ كېلىۋاتقان ۋە كامبودژا ھۆكۈمىتىگە قارىتا بەزى تەدبىرلەرنى ئالغان ئىدى. يەنى بۇ يىل فېۋرالدا ئامېرىكا مۇئاۋىن تاشقى ئىشلار مىنىستىرى سكوت مارشېل كامبودژاغا زىيارەتكە بارغاندا كامبودژا ھۆكۈمىتىنىڭ ئامېرىكىدىن ئالغان 330 مىليون دوللارلىق قەرزىنى كەچۈرۈم قىلىۋېتىش تەلىپىنى رەت قىلغان ئىدى . گەرچە ئەينى چاغدا ئامېرىكا كامبودژاغا نېمە ئۈچۈن قەرزنى كەچۈرۈم قىلمىغانلىقى ھەققىدە ئېنىق بىر نېمە دېمىگەن بولسىمۇ، لېكىن خەۋەرلەردە ئامېرىكا مۇئاۋىن باش مىنىستىرى سكوت مارشېلنىڭ كامبودژا بىلەن بولغان سۆھبەتتە ئۇلارنىڭ 20 نەپەر ئۇيغۇرنى خىتايغا قايتۇرۇپ بەرگەنلىكىنى ئەيىبلىگەنلىكى ئاشكارىلانغان  ئىدى.

تەپسىلاتى...

د ئۇ ق باياناتى: د ئۇ ق نىڭ دائىمىي كومىتېت كېڭەيتىلگەن يىغىنى غەلىبىلىك ئاياغلاشتى

2010-يىلى 3-ئاينىڭ 3-كۈنى

 2 – ئاينىڭ 26 – كۈنى گېرمانىيىنىڭ ميۇنخېن شەھىرىدە باشلانغان  دۇنيا ئۇيغۇر قۇرۇلتىيى دائىمىي كومىتېتىنىڭ كېڭەيتىلگەن يىغىنى ئۆزىنىڭ بارلىق كۈنتەرتىپلىرىنى تولۇق ئورۇنلاپ، 3 – ئاينىڭ 2– كۈنى كەچتە غەلىبىلىك ئاياغلاشتى.

 بۇ نۆۋەتلىك يىغىنغا،   د ئۇ ق رەئىسى رابىيە قادىر خانىم باشچىلىقىدا ئامېرىكا، كانادا، بېلگىيە، ئەنگلىيە، نورۋېگىيە، گوللاندىيە، شۋېتسىيە، شۋېتسارىيە، قازاقىستان، قىرغىزىستان، ياپونىيە، تۈركىيە، ئاۋسترىيە، فرانسىيە ۋە گېرمانىيە قاتارلىق 15 دۆلەتتىن كەلگەن 60 قا يېقىن ۋەكىل قاتناشقان ئىدى.

 4 كۈن داۋام قىلغان بۇ قېتىمقى يىغىندا، د ئۇ ق رەئىسى،  مۇئاۋىن رەئىسلىرىنىڭ ۋە باش كاتىپنىڭ خىزمەت دوكلاتى، شۇنداقلا د ئۇ ق فوندىنىڭ مالىيە دوكلاتى، ھەرقايسى كومىتېت، مەركەزلەرنىڭ تولۇقلىما دوكلاتلىرى ۋە تەپتىش ھەيئىتىنىڭ دوكلاتى ئوتتۇرىغا قويۇلۇپ، نەتىجىلەر مۇئەييەنلەشتۈرۈلدى، تەجرىبە – ساۋاقلار يەكۈنلەندى.

يىغىندا، د ئۇ ق نىڭ تەشكىلى مەسىلىلىرى، رەھبەرلىرىنىڭ كونكرېت ۋەزىپە تەقسىماتى، دۇنيا ۋەزىيىتى ۋە نۆۋەتتە مىللىي ھەرىكىتىمىزدە مەۋجۇت بولۇۋاتقان جىددىي مەسىلىلەر، د ئۇ ق نىڭ 2010 – يىللىق خىزمەت پىلانى،  د ئۇ ق نىڭ بۇندىن كېيىنكى سىياسىي مەيدانى، 5 – ئىيۇل ئۈرۈمچى قىرغىنچىلىقىنىڭ 1 – يىللىقىنى خاتىرىلەش پائالىيىتى ھەققىدىكى پىلانلار، د ئۇ ق فوندىنى يەنىمۇ كۈچلەندۈرۈش مەسىلىسى، د ئۇ ق تەركىبىدىكى تەشكىلاتلاردا ساقلىنىۋاتقان مەسىلىلەر ۋە ئۇنى ھەل قىلىشنىڭ كونكرېتنى چارىلىرى، شۇنداقلا ئىنتېرنېت تور بەتلىرىدە ئوتتۇرىغا قويۇلغان ۋە د ئۇ ق گە بىۋاسىتە ئاممىدىن كەلگەن ئىنكاسلار… قاتارلىق مەسىلىلەر ھەققىدە چوڭقۇر ۋە ئەتراپلىق مۇھاكىمە ئېلىپ بېرىلدى. 

تەپسىلاتى...

د ئۇ ق نىڭ دائىمىي كومىتېت يىغىنى ميۇنخېندا چاقىرىلىدۇ

2010-يىلى 2-ئاينىڭ 24-كۈنى

5 – ئىيۇل ئۈرۈمچى قىرغىنچىلىقىدىن بۇيان، ۋەتەن ئىچىدىكى خەلقىمىزنىڭ ۋەزىيىتى كۈندىن – كۈنگە ئېغىرلاشماقتا، تارىختا مىسلى كۆرۈلمىگەن بۇ قىرغىنچىلىقنىڭ زەنجىرسىمان ئىنكاسى ھازىرمۇ پۈتۈن شەرقىي تۈركىستان مىقياسى بويىچە ئۈزلۈكسىز داۋام قىلىپ كەلمەكتە.

خىتاي ھاكىمىيىتىنىڭ بۇ ۋەقەنى باھانە قىلىپ ئۇيغۇرلارغا قارىتا ئېلىپ بارغان كەڭ كۆلەملىك قاتتىق زەربە بېرىش ھەرىكىتى جەريانىدا 10 مىڭلىغان بىگۇناھ قېرىنداشلىرىمىز يولسىزلارچە تۇتقۇن قىلىنىپ قاراڭغۇ زىندانلارغا مەھكۇم بولدى، قىسقىغىنە بىرقانچە ئاي ئىچىدە پەقەت ئۈرۈمچى ۋەقەسى مۇناسىۋىتى بىلەن 30 دىن ئارتۇق قېرىندىشىمىز ئۆلۈمگە ھۆكۈم قىلىندى، يۈزلىگەن قېرىندىشىمىز تۈرمىلەردە ۋەھشىيلەرچە ئۇرۇپ ئۆلتۈرۈلدى.


ئۈرۈمچى ۋەقەسىدىن كېيىن، ۋەتەن سىرتىدا ئېلىپ بېرىلىۋاتقان مىللىي ھەرىكىتىمىزمۇ زور تارىخىي سىناققا دۇچ كەلدى، ۋەتەن ئىچىدىكى خەلقىمىز بىزدىن ئۆزلىرى چېكىۋاتقان بۇ كۈلپەتلەرنى دۇنيا جامائەتچىلىكىگە تېخىمۇ جانلىق ۋە ئۈنۈملۈك شەكىلدە تۇيغۇزۇپ، خەلقئارا جامائەتچىلىكىنىڭ كۈچى بىلەن خىتايغا جىددىي بېسىم پەيدا قىلىشىمىزنى، بۇ ئارقىلىق ئۆزلىرى چېكىۋاتقان چىدىغۇسىز زۇلۇملارنى بىرئاز بولسىمۇ يەڭگىللىتىشىمىزنى تەقەززالىق بىلەن كۈتۈشمەكتە.

تەپسىلاتى...

رابىيە قادىر خانىم مەرھۇم گېنېرال مەمەت رىزا بېكىن ۋاپاتىغا تەزىيە بىلدۈردى

ر ف ئا خەۋىرى
2010-يىلى 2-ئاينىڭ 17-كۈنى

تۈركىيىدە گېنېرال مايور مەرتىۋىسىگە ئېرىشكەن مەمەت رىزا بېكىننىڭ ۋاپاتى، پۈتكۈل ئۇيغۇر خەلقىنى ئېغىر مۇسىبەتكە مۇپتىلا قىلدى. ئۆمرىنى ۋەتىنى , مىللىتى خەلقى ئۈچۈن ساداقەت ۋە پىداكارلىق بىلەن ئۆتكۈزگەن مەرھۇم مەمەت رىزا بېكىن يالغۇز ئۇيغۇر خەلقىنىڭ يۈكسەك ھۆرمىتىگە سازاۋەر بولۇپلا قالماستىن، تۈرك خەلقىنىڭ ئالىي ئېھتىرامىغا ئېرىشكەن مۆتىۋەر ئىدى.

ئۇيغۇر مىللىي ھەرىكىتىنىڭ رەھبىرى رابىيە قادىر خانىم مەرھۇمنىڭ ۋاپاتىغا چوڭقۇر تەزىيە بىلدۈردى. پېشقەدەم ئۇيغۇر پاالىيەتچى، جامائەت ئەربابى غۇلامىدىن پاختا ئەپەندىمۇ رادىومىز ئارقىلىق، يېقىن ئاكا – ئۇكا مۇناسىۋىتىدە بولغان مەمەت رىزا بېكىن ئۈچۈن قايغۇردى.

يۇقىرىدىكى ئاۋاز ئۇلىنىشىدىن، بۇ ھەقتىكى مەلۇماتىمىزنىڭ تەپسىلاتىنى ئاڭلايسىلەر.

تەپسىلاتى...

د ئۇ ق : مىللىي ئۇستازىمىز گەنىرال مۇھاممەت رىزا بېكىن ئەپەندىمگە قايغۇلۇق تەزىيە !

شەرقىي تۈركىستان  خەلقىنىڭ مۇنەۋۋەر ئوغلانى، مىللىي ئۇستازىمىز ۋە ئىنقىلابچىمىز، دۇق نىڭ پەخرى رەيىسى، تۈركىيىدىكى  شەرقىي تۈركىستان ۋەخپىنىڭ رەيىسى گەنىرال مۇھەممەت رىزا بېكىن ئەپەندىم كېسەللىك سەۋەبىدىن داۋالاش ئۈنۈم بەرمەي، 2010 – يىلى 2 – ئاينىڭ 16 – كۈنى، تۈركىيە ساەتى 20.35دە تۈركىيىنىڭ ئەنقەرە شەھىرىدە 85 يېشىدا بىز بىلەن مەڭگۈ ۋىدالاشتى.

جانابى ئاللاھ مىللىي ئۇستازىمىزنىڭ ياتقان يېرىنى جەننەت قىلغاي !

پۈتۈن شەرقىي تۈركىستان خەلقىنىڭ بەشى ساق بولسۇن !

بۇ مۇناسىۋەت بىلەن، مەرھۇمنىڭ ئايىلىسىدىكىلەردىن، ئۇرۇق – تۇغقان، دوست – يارەنلىرىدىن، شۇنداقلا تۈركىيىدە ياشاۋاتقان بارلىق قېرىنداشلىرىمىزدىن سەمىمىي ھال سورايمىز !

تەپسىلاتى...

شۋېتسارىيە ھۆكۈمىتىگە ۋە خەلقئارالىق كىشىلىك ھوقۇق تەشكىلاتلىرىغا رەھمەت ئېيتىمىز

2010-يىلى 2-ئاينىڭ 3-كۈنى

بۈگۈن شۋېتسارىيە ھۆكۈمىتىنىڭ، 7 يىلدىن كۆپرەك ۋاقىتتىن بۇيان گۇنتانامو تۈرمىسىدە ناھەق تۇتۇلۇپ تۇرۇۋاتقان ئەركىن مەخمۇت، بەختىيار مەخمۇت ئىسىملىك ئىككى نەپەر قېرىندىشىمىزنى قوبۇل قىلىش ھەققىدە رەسمىي قارار ئالغانلىقى پۈتۈن ئۇيغۇرلارنى چەكسىز سۆيۈندۈردى.

بۇ مۇناسىۋەت بىلەن بىز، خىتاينىڭ شۇنچە بېسىمى ۋە تەھدىتىگە پىسەنت قىلماي، دېموكراتىيە ۋە كىشىلىك ھوقۇق پرىنسىپلىرىنى ھەممىدىن ئەلا بىلىپ، ئىككى نەپەر قېرىندىشىمىزغا يېڭى ھاياتلىق يولى بەخش ئەتكەن شۋېتسارىيە ھۆكۈمىتىگە ۋە شۋېتسارىيە خەلقىگە پۈتۈن ئۇيغۇر خەلقى نامىدىن رەھمەت ئېيتىمىز !

شۋېتسارىيە ھۆكۈمىتىنىڭ بۇ جەسۇر ۋە مەدىنى قارارى، خىتايدىن ئالىدىغان ئىقتىسادى مەنپەئەتلەر بەدىلىگە ئۇيغۇر خەلقىنىڭ كىشىلىك ھەق – ھوقۇقلىرىنىڭ ئېغىر دەرىجىدە دەپسەندىچىلىككە ئۇچراۋاتقانلىقىغا كۆز يۇمۇپ كەلگەن بەزى ئەللەرگە ئۈلگە ۋە مەدەت بولغۇسى !

بىز يەنە گۇنتانامودىكى ئىككى قېرىندىشىمىزنىڭ قايتا نىجاتلىققا ئېرىشكەنلىكى مۇناسىۋىتى بىلەن، ئۇزۇن يىللاردىن بۇيان ئۇيغۇرلارنىڭ كىشىلىك ھوقۇق مەسىلىسىگە ۋە كەلگۈسى تەقدىرىگە يېقىندىن كۆڭۈل بۆلۈپ كەلگەن، شۇنداقلا گۇنتانامودا ناھەق تۇتۇپ تۇرۇلۇۋاتقان قېرىنداشلىرىمىزنى ئاقلاش ۋە خىتاي ھاكىمىيىتىنىڭ خەلقىمىزگە سېلىۋاتقان زۇلۇم ۋە بېسىملىرىنى دۇنيا جامائەتچىلىكىگە پاش قىلىش يولىدا زور كۈچ سەرپ قىلغان خەلقئارا كەچۈرۈم تەشكىلاتى، خەتەر ئاستىدىكى مىللەتلەرنى قوغداش تەشكىلاتى، ئىنسان ھەقلىرىنى كۆزىتىش تەشكىلاتى … قاتارلىق بارلىق خەلقئارالىق تەشكىلاتلارغا، يىللاردىن بۇيان گۇنتانامودىكى ئۇيغۇرلارنىڭ ئەركىنلىكى ئۈچۈن كېچە-كۈندۈز كۈرەش قىلغان ئادۋوكاتلارغا، تەرجىمانلارغا ۋە ھېسداشلىق قىلغان بارلىق ئۇيغۇر ۋەتەنداشلىرىمىزغا، د ئۇ ق تەركىبىدىكى بارلىق تەشكىلاتلارغا، شۇنداقلا شۋېتسارىيە جامائەتچىلىكىگە ئەمىلى پائالىيەتلىرى، ھەرىكەتلىرى بىلەن ئىجابىي تەسىر قالدۇرغان شۋېتسارىيە شەرقىي تۈركىستان تەشكىلاتى ۋە ئۇيغۇر قېرىنداشلىرىمىزغا چوڭقۇر مىننەتدارلىقىمىزنى بىلدۈرىمىز.

تەپسىلاتى...

د ئۇ ق باياناتى: د ئۇ ق ۋەتەنداشلىرىمىزنى بىرلىك-ئىتتىپاقلىقا چاقىرىدۇ!

 2010-يىلى 1-ئاينىڭ 11-كۈنى

دۇنيا ئۇيغۇر قۇرۇلتىيى (دۇق)، كامبودژا ھۆكۈمىتىنىڭ خەلقئارا قانۇن ۋە توختاملارغا خىلاپلىق قىلىپ، 20 نەپەر ئۇيغۇر سىياسىي ئىلتىجاچىنى خىتايغا قايتۇرۇپ بېرىش پاجىەسىدىن كىيىن، ئىنتېرنېت تور بەتلىرىدە ئوتتۇرىغا چىققان ھەر خىل ئىجابىي ۋە سەلبىي تالاش-تارتىشلارغا،  تەنقىد، تەكلىپ ۋە ھۇجۇملارغا دىققەت قىلىپ كەلدى.

ئەلۋەتتىكى، قۇرۇلتىيىمىز ئاممىنىڭ باشقا پرىنسىپال جىددىي مەسىلىلەر ھەققىدىكى تەنقىد – پىكىرلىرىنىمۇ نەزەردىن ساقىت قىلىۋەتكىنى يوق.

بۇ مۇناسىۋەت بىلەن، 2010 – يىلى 1 – ئاينىڭ 9 – كۈنى دۇق دايىمى كومۇتەتى كېڭەيتىلگەن تېلېفون يىغىنى چاقىرىلىپ، نۆۋەتتە دۇچ كېلىۋاتقان جىددىي مەسىلىلەر ھەققىدە ئەستايىدىل مۇھاكىمە ئېلىپ باردى.

 دۇق ئالدى بىلەن ۋەتەنداشلىرىمىزنىڭ ئۆزىنىڭ دېموكراتىك ھوقۇقىنى تولۇق جارى قىلدۇرۇپ، دۇق ۋە ئۇنىڭ رەھبەرلىرىگە ئىگە چىققانلىقىنى مۇەييەنلەشتۇرىدۇ ۋە تەشكىلاتىمىزنىڭ بۇندىن كېيىنكى پائالىيەتلىرى ئۈچۈن بېرىلگەن سەمىمىي تەكلىپ، تەنقىدلەرنى پايدىلىق بىر ئىجابىي ئامىل دەپ باھالايدۇ. گەرچە كۆپلىگەن قېرىنداشلىرىمىزنىڭ دۇق گە بەرگەن تەكلىپ، تەڭقىت ۋە پىكىرلىرى سەمىمىي بولغان بولسىمۇ، ئامما يەنىلا ئاز ساندىكى بىر قىسىم كىشىلەر مەۋجۇت ۋەزىيەتنى سۇيىستىمال قىلىپ، نورمال تەڭقىت ۋە تەكلىپ چىگىرىسىدىن

تەپسىلاتى...

د ئۇق باياناتى : خەلقىمىزنىڭ يېڭى يىلى قۇتلۇق بولسۇن!

2010-يىلى 1-ئاينىڭ 1-كۈنى
پۈتۈن دۇنيا خەلقى، زور سىياسى داۋالغۇچلار، ئىقتىسادى كىرىزلەر، رايون خارەكتېرلىك توقۇنۇشلار ۋە تېرور ھۇجۇملىرى  بىلەن تولغان 2009 – يىلىنى ئاخىرلاشتۇرۇپ، يېڭى ئۈمىد ۋە گۈزەل تىلەكلەر بىلەن 2010 – يىلىغا قەدەم قويدى!
بۇ مۇناسىۋەت بىلەن بىز، شەرقىي تۈركىستانلىق بارلىق قېرىنداشلىرىمىزنىڭ يېڭى يىلىنى قۇتلۇقلايمىز ۋە خەلقىمىزگە بۇ يېڭى يىلىدا  ئامانلىق، خاتىرجەملىك، بەخت – سائادەت تىلەيمىز!
تەپسىلاتى...