د ئۇ ق: ۋەتەنداشلىرىمىزنىڭ مۇبارەك قۇربان ھېيتىنى تەبرىكلەيمىز

يوللانغان ۋاقتى:2010-11-15| سەھىپە: د ئۇ ق تەرىپىدىن چىقىرىلغانلار

دۇنيا ئۇيغۇر قۇرۇلتىيى
2010-يىلى11-ئاينىڭ 15-كۈنى

د ئۇ ق رەئىسى رابىيە خانىم ۋە بارلىق د ئۇ ق رەھبەرلىرى، ۋەتەنداشلىرىمىزنىڭ مۇبارەك قۇربان ھېيتىنى قىزغىن تەبرىكلەيدۇ.

مۇبارەك قۇربان ھەيئىتى ئەزىز مىللىتىمىزنىڭ مىڭ يىلدىن ئارتۇق ۋاقىتتىن بۇيان قۇتلۇقلاپ كەلگەن دىننى ۋە مىللىي بايرىمى.

ئەركىن دۇنيا ئەللىرىدە ياشاۋاتقان مۇسۇلمانلار شادلىق ۋە بەختىيارلىق تۇيغۇسى ئىچىدە مۇبارەك قۇربان ھېيتىنى قۇتلۇقلاپ تەن – تەنە قىلىۋاتقان بۈگۈنكى كۈندە، شەرقىي تۈركىستان خەلقى، دۇنيا مۇسۇلمانلىرىنىڭ بايرام شاتلىقىغا ئورتاق بولۇشتىن مەھرۇم ھالدا مۇسىبەت ئىچىدە ئاھۇ – پەرياد چەكمەكتە !

دۇنيادا زۇلۇم، مۇستەبىتلىك مەڭگۈلۈك بولغان ئەمەس، شەرقىي تۈركىستان خەلقى چوقۇم بىر كۈن كۆك بايراق ئاستىدا ئەركىن-ئازادە ھېيت تەنتەنىسى قىلىشىدۇ.

بۇ مۇبارەك ھېيتىمىزدا، جانابى ئاللادىن ئۆز ۋەتىنىمىزدە، كۆك بايراق ئاستىدا ئەركىن-ئازادە ھاياتلىقىمىزنى، بايراملىرىمىزنى ئۆتكۈزۈش بەختىيارلىقىغا نېسىپ قىلىشنى دۇئالىرىمىز بىلەن تىلەش بىلەن بىرگە، ھەر بىر شەرقىي تۈركىستانلىقنى مىللىي داۋايىمىز ئۈچۈن قۇلىدىن كېلىدىغان ماددىي ۋە مەنىۋى پىداكارلىقنى قىلىشقا چاقىرىمىز.

د ئۇ ق: جۇمھۇرىيەت بايرىمىمىزغا مۇبارەك بولسۇن!

يوللانغان ۋاقتى:2010-11-12| سەھىپە: د ئۇ ق تەرىپىدىن چىقىرىلغانلار

دۇنيا ئۇيغۇر قۇرۇلتىيى
2010-يىلى 11-ئاينىڭ 12-كۈنى

شەرقىي تۈركىستان خەلقى دەل بۈگۈنكى كۈندە ( 11-ئاينىڭ 12-كۈنى) يېقىن تارىخىمىزدا يەنى 1993-يىلى 11-ئاينىڭ 12-كۈنى ۋە 1944-يىلى 11-ئاينىڭ 12-كۈنى كەينى-كەينىدىن مۇستەقىل ئىككى جۇمھۇرىيەتنى ئېلان قىلىش ئارقىلىق،، شەرقى تۈركىستان خەلقىنىڭ مىللىي ئەركىنلىك ئىرادىسىنى دۇنياغا جاكارلىغان، ئۇيغۇر مىللىتىنىڭ ئۆزىنى-ئۆزى باشقۇرۇش، ھور ياشاش ئىقتىدارىغا ۋە يۈكسەك دېموكراتىك ئاڭغا ئىگە مىللەت ئىكەنلىكىنى نامايان قىلغان ئىدى.

گەرچە بۇ ئىككى جۇمھۇرىيەت ئەينى چاغدىكى ئىمپېرىئالىست كۈچلەرنىڭ سىياسىي سۇيىقەستى نەتىجىسىدە ئۆزىنىڭ مەۋجۇتلۇقىنى ساقلاپ قالالمىغان بولسىمۇ، ئەمما بۇ ئىككى جۇمھۇرىيەتتىن ئۇيغۇر خەلقىگە ئىنتايىن قىممەتلىك ئەڭگۈشتەرلەر مىراس قالغان ئىدى، بۇ ئەڭگۈشتەرلەر – مىللىي مۇستەقىللىقنىڭ سىمۋولى ھېسابلانغان ئاي – يۇلتۇزلۇق كۆك بايراق، ئىستىقلال مارشى، دۆلەت گېربى ۋە بۇ ئەڭگۈشتەرلەرنى كېيىنكى ئەۋلادلىرىغا مىراس قالدۇرۇش يولىدا قۇربان بولغان سانسىزلىغان قەھرىمانلارنىڭ كۈرەش ئىرادىسى ئىدى.

“شەرقىي تۈركىستان ئۇيغۇر ئالىي كېڭىشى” نىڭ غەلىبىسى ئۈچۈن بىر كىشىلىك ھەسسە قوشۇڭ!

يوللانغان ۋاقتى:2010-10-19| سەھىپە: د ئۇ ق تەرىپىدىن چىقىرىلغانلار

“شەرقىي تۈركىستان ئۇيغۇر ئالىي كېڭىشى” تەييارلىق كومىتېتى
2010-يىلى 10-ئاينىڭ 19-كۈنى

مىللىي ھەرىكىتىمىز ئۈچۈن زور تارىخىي ئەھمىيەتكە ئىگە بولغان “شەرقىي تۈركىستان ئۇيغۇر ئالىي كېڭىشى” يىغىنى ئامېرىكىنىڭ پايتەختى ۋاشىنگتوندا چاقىرىلىش ئالدىدا تۇرىدۇ.

دۇنيانىڭ ھەرقايسى جايلىرىدىكى ھەر ساھەگە مەنسۇپ يۈزلىگەن مۇنەۋۋەر زاتلىرىمىزنىڭ قاتنىشىشىدا 2011 – يىلى 2 – ئاينىڭ 1 – كۈنىدىن 6 – كۈنىگىچە ئۆتكۈزۈلىدىغان بۇ قېتىمقى يىغىن جەريانىدا مىللىي ھەرىكىتىمىزنىڭ بۇندىن كېيىنكى يېڭى ئىستراتېگىيىسى بەلگىلەپ چىقىلىدۇ.

بۇ قېتىمقى يىغىن ئادەتتىكى بىر ئۇچۇرۇشۇش ئەمەس، بەلكى مىللىي بىرلىك، ئىتتىپاقلىق نامايان قىلىنغان  ۋە ئېزىلىۋاتقان خەلقىمىزنىڭ دەردلىرىگە ھەقىقىي يوسۇندا چارە – تەدبىر ئىزدەيدىغان زور بىر سىياسىي مۇنبەردىن ئىبارەت. بۇ يىغىن ئۇزۇن يىللاردىن بۇيان چەتئەللەردە ئېلىپ بېرىلىۋاتقان مىللىي ھەرىكىتىمىزنىڭ  مۇھىم بۇرۇلۇش نۇقتىسى بولۇپ، ئۇنىڭ مۇۋەپپەقىيەتلىك ۋە ئۈنۈملۈك ھالدا چاقىرىلىشىغا ھەسسە قوشۇش  مۇھاجىرەتتە ياشاۋاتقان پۈتۈن قېرىنداشلىرىمىزنىڭ مىللىي ۋە ۋىجدانى بۇرچىدىن ئىبارەت !

خۇددى يېغىن چاقىرىقىغا ئېيتىلغاندەك، نۆۋەتتە خەلقىمىزنىڭ مىللىي مەۋجۇتلۇقى تارىختا مىسلى كۆرۈلمىگەن دەرىجىدە زور يوقىلىش خەۋپىگە دۇچ كەلمەكتە.

ئامېرىكىدا ” شەرقىي تۈركىستان ئۇيغۇر ئالىي كېڭىشى ” يىغىنىنى چاقىرىش ھەققىدە مۇراجىئەت

يوللانغان ۋاقتى:2010-10-02| سەھىپە: د ئۇ ق تەرىپىدىن چىقىرىلغانلار پائالىيەتلەر

2010-يىلى 10-ئاينىڭ 2-كۈنى

شەرقىي تۈركىستان ئۇيغۇر ئالىي كېڭىشى تەييارلىق كومىتېتى

2011-يىلى 2-ئاينىڭ 1-كۈنىدىن 6-كۈنىگىچە ئامېرىكىنىڭ ۋاشىنگتون شەھىرىدە ئېچىلماقچى بولغان شەرقىي تۈركىستان ئۇيغۇر ئالىي كېڭىشى ئۇيغۇرلارنىڭ كەلگۈسىدىكى سىياسىي ھەرىكىتىگە ئىستراتېگىيە بەلگىلەش بويىچە دۇنيانىڭ ھەرقايسى جايلىرىدىكى تۈرلۈك ئوخشىمىغان سىياسىي قاراشلارغا ئىگە ئۇيغۇرلارنىڭ باش قوشۇشى بىلەن ئېچىلىدىغان بىر خەلقئارالىق كېڭەشتۇر.

ھەممىمىزگە مەلۇم بولغىنىدەك، نۆۋەتتە خەلقىمىزنىڭ مىللىي مەۋجۇتلۇقى تارىختا مىسلى كۆرۈلمىگەن دەرىجىدە زور يوقىلىش خەۋپىگە دۇچ كەلمەكتە.

خىتاي مۇستەملىكىچىلىرىنىڭ تىنىمسىز كۆچمەن يۆتكەش سىياسىتى تۈپەيلىدىن خەلقىمىز ھازىر ئوز ۋەتىنىدە ئازسانلىق ئورۇنغا چۈشۈپ قالدى ؛ مىللىي مائارىپىمىز پۈتۈنلەي ۋەيران قىلىنىپ ، خەلقىمىز زور ئاسسىمىلياتسىيە خەۋپىگە دۇچ كەلمەكتە ؛ خىتاينىڭ ئىچكى ئۆلكىلىرىگە مەجبۇرى سۈرگۈن قىلىنغان مىليونلىغان قىز – يىگىتلىرىمىز خورلۇق ۋە زۇلۇم ئىچىدە جان تالاشماقتا ؛ خىتاي ھاكىمىيىتىنىڭ دىنسىزلاشتۇرۇش سىياسىتى تۈپەيلىدىن ياش ئەۋلادلىرىمىز ئىمانىدىن ئايرىلىپ قېلىش خەتىرىگە دۇچ كېلىۋاتىدۇ ؛ بۇ دۇنياغا كۆز ئېچىش ئالدىدا تۇرغان مىليونلىغان بوۋاقلىرىمىز ئانىسىنىڭ قورسىقىدا ئۆلتۈرۈلۈۋاتىدۇ ؛ سانسىزلىغان بىگۇناھ ئىنسانلىرىمىز قاراڭغۇ زىندانلارغا تاشلىنىۋاتىدۇ ؛ تەبىئىي بايلىقلىرىمىز ئېغىر دەرىجىدە تالان – تاراج قىلىنىپ ، خەلقىمىز ئاچلىق ۋە نامراتچىلىق ئىچىدە جان تالىشىۋاتىدۇ ؛ خىتاينىڭ دۆلەت تېررورلۇق سىياسىتى تۈپەيلىدىن ، ھازىر خەلقىمىز ئەركىن پىكىر قىلىش ھوقۇقىدىن ، ھەتتا بىر – بىرى بىلەن ئەركىن ئۇچرىشىشتىنمۇ مەھرۇم قالدى .

د ئۇ ق: تەشكىلاتلارنى “ماتەم كۈنى”دە نارازىلىق پائالىيەتلىرى ئۆتكۈزۈشكە چاقىرىدۇ

يوللانغان ۋاقتى:2010-09-20| سەھىپە: د ئۇ ق تەرىپىدىن چىقىرىلغانلار

دۇنيا ئۇيغۇر قۇرۇلتىيى
2010-يىلى 9-ئاينىڭ 20-كۈنى

خىتاي خەلق جۇمھۇرىيىتى قۇرۇلغان 1 – ئۆكتەبىر، شەرقىي تۈركىستان خەلقى ئۈچۈن بىر ماتەم كۈنى، يېڭى بىر زۇلۇمنىڭ، قاراڭغۇ ۋە زۇلمەتلىك بىر دەۋرنىڭ باشلىنىشىدىن ئىبارەت.

ۋەتىنىمىز شەرقىي تۈركىستان، خىتاي كوممۇنىست ھاكىمىيىتىنىڭ مۇستەملىكىسىگە دۇچار بولغان 61 يىلدىن بۇيان، خەلقىنىڭ ئەركىنلىك ۋە ھۆرلۈككە بولغان ئىنتىلىشلىرى رەھىمسىزلەرچە قانلىق باستۇرۇلدى، بۇ 61 يىل مابەينىدە يۈز مىڭلىغان قەھرىمان ئوغۇل-قىزلىرىمىز شېھىت بولدى، سان-ساناقسىز بىگۇناھ ئىنسانىمىز خىتاي دۆلەت تېررورىنىڭ قۇربانىغا ئايلىنىپ، قاراڭغۇ زىندانلارغا مەھكۇم قىلىندى، تەبىئىي بايلىقلىرىمىز تالان – تاراج قىلىنىپ، بۇ گۆھەر زېمىننىڭ ئىگىلىرى ھېسابلانغان خەلقىمىز ئاچ – يالىڭاچلىق ئىچىدە ياساشقا مەجبۇر قىلىندى،  مىليونلىغان بوۋاقلىرىمىز يورۇق دۇنياغا كۆز ئاچماستىن، ئانا قارنىدا ئۆلۈمگە ھۆكۈم قىلىندى، خىتاينىڭ ئىچكى ئۆلكىلىرىگە سۈرگۈن قىلىنغان يۈزمىڭلىغان قىزلىرىمىز ئېغىر دەرىجىدە ئاياق-ئاستى قىلىنىشقا ئۇچرىدى، خەلقىمىز ئۆزلىرىنىڭ دىنىي ئېتىقادىدىن ۋە مىللىي مەدەنىيەتلىرىدىن ۋاز كېچىشكە قىستالدى، خىتاي ھاكىمىيىتىنىڭ ئۈزلۈكسىز كۆچمەن يۆتكەش سىياسىتى تۈپەيلىدىن بۈگۈن ئۇيغۇر خەلقى ئۆز ۋەتىنىدە ئازسانلىق ئورۇنغا چۈشۈپ قالدى، توختىماي داۋام قىلغان ئاتوم سىناقلىرى تۈپەيلىدىن گۈزەل ۋەتىنىمىز خارابىگە ئايلىنىپ، مىليونلىغان ئىنسانىمىز ھاياتىدىن ئايرىلدى ۋە مېيىپ – مەجرۇھلارغا ئايلاندى …

61 يىل تىنىمسىز داۋام قىلغان زۇلۇم ۋە بېسىم تۈپەيلىدىن بۈگۈن ئۇيغۇر خەلقىنىڭ مىللىي مەۋجۇتلۇقى تارىختا مىسلى كۆرۈلۈپ باقمىغان دەرىجىدە زور خەۋپ ۋە تەھدىتكە دۇچ كەلمەكتە.

يەنە بىر جەھەتتىن 5 – ئىيۇل ئۈرۈمچى قىرغىنچىلىقى، خىتاي ھاكىمىيىتىنىڭ ئۇيغۇرلارغا قارشى يۈرگۈزۈپ كەلگەن 60 يىللىق زۇلۇم، بېسىم ۋە قىرغىنچىلىق سىياسىتىنىڭ داۋامى ۋە يۇقىرى پەللىسىدىن ئىبارەت.

پۈتۈن قېرىنداشلىرىمىزنىڭ روزى ھېيتىغا مۇبارەك بولسۇن !

يوللانغان ۋاقتى:2010-09-08| سەھىپە: د ئۇ ق تەرىپىدىن چىقىرىلغانلار

دۇنيا ئۇيغۇر قۇرۇلتىيى
2010-يىلى 9-ئاينىڭ 8-كۈنى

ئەسسالامۇئەلەيكۇم ئەزىز يۇرتداشلار،

دۇنيا ئۇيغۇر قۇرۇلتىيى بولۇش سۈپىتىمىز بىلەن، ۋەتەن ئىچى ۋە سىرتىدا ياشاۋاتقان شەرقىي تۈركىستاننىڭ پۈتۈن قېرىنداشلىرىمىزنىڭ روزا ھېيتىنى مۇبارەكلەيمىز ۋە خەلقىمىزگە جانابى ئاللادىن ئەركىنلىك، ھۆرلۈك، ئامانلىق، بەخت – سائادەت تىلەيمىز !

مۇشۇ پۇرسەتتىن پايدىلىنىپ، شەرقىي تۈركىي تۈركىستان خەلقىنىڭ ھۆرلۈكى ۋە ئازادلىقىنى قولغا كەلتۈرۈش يولىدا قىممەتلىك ھاياتلىرىنى تەقدىم قىلغان ئەزىز شېھىتلىرىمىزگە بولغان ئالىي ھۆرمىتىمىزنى ۋە چەكسىز سېغىنىشىمىزنى قايتا – قايتا ئىزھار قىلىمىز، ئەزىز قۇربانلىرىمىزنىڭ ئايىلە – تاۋاباتلىرىغا بەخت ۋە خاتىرجەملىك تىلەيمىز !

ھەممىگە قادىر ياراتقان ئىگىمىز شەرقىي تۈركىستان مۇسۇلمانلىرىنىڭمۇ خۇددى ئەركىن دۇنيادا ياشاۋاتقان مۇسۇلمان قېرىنداشلىرىمىزدەك بېسىم ۋە زۇلۇمدىن خالى ھالدا 12 ئاينىڭ سۇلتانى ھېسابلانغان مۇبارەك رامزان ئېيىنى پۈتۈن دىنىي مەجبۇرىيەتلىرىنى چەكلىمىسىز ھالدا ئادا قىلىپ بەختىيارلىق تۇيغۇسى ئىچىدە ئۆتكۈزۈشكە نېسىپ قىلغاي !

ئەزىز قېرىنداشلار، بۈگۈن پۈتۈن دۇنيا مۇسۇلمانلىرى مۇبارەك رامزان ئېيىنى ئاخىرلاشتۇرۇپ، بەختىيارلىق ۋە شادلىق تۇيغۇسى ئىچىدە روزى ھېيتىنى تەن – تەنە بىلەن كۈتۈۋېلىشتى.

ئەپسۇسكى، مانا مۇشۇنداق مۇبارەك ۋە ئەزىز بىر كۈندە بىز مۇھاجىرەتتە ياشاۋاتقان شەرقىي تۈركىستانلىقلارنىڭ يۈرىكى مەيۈسلۈك، ئازاب، سېغىنىش ۋە تەلپۈنۈش تۇيغۇلىرى ئىچىدە ئۆرتەنمەكتە، بىز بۇ خىل ئازاب تۇيغۇسىنى ۋەتىنىمىز شەرقىي تۈركىستان خىتاي كوممۇنىستلىرىنىڭ ئىشغالىغا ئۇچرىغان 1949 – يىلىدىن بۇيان ئىزچىل تۈردە چېكىپ كېلىۋاتىمىز.

د ئۇ ق، ياۋروپا پارلامېنتى ۋە ب د ت دا مەخسۇس ۋەكىل تۇرغۇزدى

يوللانغان ۋاقتى:2010-09-05| سەھىپە: د ئۇ ق تەرىپىدىن چىقىرىلغانلار

دۇنيا ئۇيغۇر قۇرۇلتىيى

2010-يىلى 9-ئاينىڭ 5-كۈنى

د ئۇ ق رەھبەرلىك ئورگىنى تەرىپىدىن ب د ت نىڭ جەنۋەدىكى ۋە ياۋروپا پارلامېنتىنىڭ بريۇسىلدىكى مەركەزلىرىگە ۋەكىللىككە تەيىنلىگەن ئىككى نەپەر ئالاھىدە خادىم ئارقا – ئارقىدىن ئىش باشلىدى، بۇ، د ئۇ ق پائالىيەتلىرىنى يەنىمۇ جانلاندۇرۇش ۋە شەرقىي تۈركىستان مەسىلىسىنىڭ خەلقئارالىشىش قەدىمىنى تېزلىتىشتە زور ئەھمىيەتكە ئىگە.

ھەممىگە مەلۇم بولغىنىدەك، ھازىرغا قەدەر ئۇيغۇر مىللىي ھەرىكىتىنىڭ رەھبىرى رابىيە خانىم رىياسەتچىلىكىدىكى د ئۇ ق، شەرقىي تۈركىستان مەسىلىسىنى ھەرقايسى دۆلەتلەر، بولۇپمۇ دېموكراتىك ئەللەرنىڭ ھۆكۈمەت ۋە پارلامېنتلىرىغا لايىقىدا ئاڭلىتىش بىلەن بىرگە، ب د ت ۋە ياۋروپا پارلامېنتىغا ئوخشاش خەلقئارالىق ئورگانلارنىڭ كۈنتەرتىپىگە كىرگۈزۈشنى ئۆزىنىڭ مۇھىم خىزمەت پروگراممىلىرىدىن بىرى قىلىپ، بۇ جەھەتتە كۆپلىگەن خىزمەتلەرنى ئېلىپ بارغان ئىدى، نەتىجىدە ب د ت كىشىلىك ھوقۇق كېڭىيىشىنىڭ يىغىنلىرىدا ئۇيغۇر كىشىلىك ھوقۇق مەسىلىسى بىر قانچىلىغان دۆلەتلەر ۋە خەلقئارا كىشىلىك ھوقۇق تەشكىلاتلىرى تەرىپىدىن ئوتتۇرىغا قۇيۇلدى، ياۋروپا پارلامېنتىدا ئۇيغۇرلار ھەققىدە مەخسۇس قارارلار قوبۇل قىلىندى ۋە مەخسۇس يىغىنلار ئۆتكۈزۈلدى.

د ئۇ ق ئاخباراتى : خىتاينىڭ ئۇيغۇر مىللىي مائارىپىنى خىتايلاشتۇرۇش سىياسىتى , تېخىمۇ زور نارازىلىق ھەرىكەتلىرىگە سەۋەبچى بولۇشى مۇمكىن !

يوللانغان ۋاقتى:2010-07-26| سەھىپە: د ئۇ ق تەرىپىدىن چىقىرىلغانلار

د ئۇ ق تەشۋىقات مەركىزى
2010-يىلى 7-ئاينىڭ 26-كۈنى

” شىنخۇا ئاخبارات ئاگېنتلىقى ” نىڭ 2010 – يىلى 7 – ئاينىڭ 27 – كۈنى خەۋەر قىلىشىچە، نۆۋەتتە شەرقىي تۈركىستاندا ” قوش تىللىق يەسلى ” دەپ ئاتالغان ۋە يەرلىك ئۆسمۈرلەر ئۈچۈن تەسىس قىلىنغان  خىتايچە يەسلىلەردە تەربىيىلىنىۋاتقان يەرلىك ئۆسمۈرلەرنىڭ ئومۇمى سانى 290 مىڭ نەپەرگە، بۇ خىل يەسلىلەرنىڭ سانى بولسا 1695 كە يەتكەن.

پەقەت 2010 – يىلى ئىچىدىلا خىتاي مەركىزى ھۆكۈمىتى تەرىپىدىن ئاتالمىش ” قوش تىللىق يەسلى ” قۇرۇلۇشى ئۈچۈن ئاجرىتىلغان مەبلەغ 1 مىليارد 390 مىليون يۈەنگە، ” ئاپتونوم رايون ” دىن ئاجرىتىلغان مەبلەغ بولسا 468 مىليون يۈەنگە يەتكەن.

خىتاي ھۆكۈمىتى، 2012 – يىلىغا قەدەر يەرلىك ئۆسمۈرلەر ئۈچۈن تەسىس قىلىنغان  خىتايچە يەسلىلەرنىڭ ئومۇملىشىش نىسبىتىنى 85 پىرسەنتتىن ئاشۇرۇشنى پىلانلىغان.

خىتاي مەركىزى ھۆكۈمىتى تەرىپىدىن 2008 – يىلى، ” شىنجاڭدا ئازسانلىق مىللەتلەرگە قارىتا قوش تىللىق يەسلى بەرپا قىلىش قۇرۇلۇشى ” يولغا قويۇلغان بولۇپ، 2008 – يىلىدىن 2012 – يىلىغىچە بولغان مەزگىل ئىچىدە خىتاي ھۆكۈمىتى بۇ قۇرۇلۇش ئۈچۈن جەمئىي 4 مىليارد 200 مىليون يۈەن مەبلەغ سېلىشنى پىلانلىغان.

خىتاي ھۆكۈمىتى يەنە ئاتالمىش ” قوش تىللىق يەسلى ” لەر ئۈچۈن زۆرۈر كېرەكلىك بولغان ئوقۇتقۇچىلار قوشۇنىنى زورايتىش ئۈچۈنمۇ جىددىي ھەرىكەتكە ئۆتكەن.

د ئۇ ق باياناتى : بارىن ئىنقىلابىنىڭ 20 يىللىقىنى خاتىرىلەيمىز!

يوللانغان ۋاقتى:2010-04-04| سەھىپە: د ئۇ ق تەرىپىدىن چىقىرىلغانلار

2010-يىلى 4-ئاينىڭ 4-كۈنى 

بۇندىن 20 يىل مۇقەددەم، يەنى، 1990 – يىلى 4 – ئاينىڭ 5 – كۈنى، شەرقىي تۈركىستاندا،  بارىن يېزىسىدا ھەيۋەتلىك كۈرەش سىگنالى ياڭراپ، زۇلمەت قاپلىغان بۇ زېمىندا خەلقىمىزنىڭ خىتاي مۇستەملىكىچىلىرىگە قارشى نەرە سادالىرى يەر – جاھاننى تىترەتكەن ئىدى.

ئۇشبۇ مۇقەددەس كۈندە، زەينىدىن يۈسۈپ باشچىلىقىدىكى قەھرىمان ئوغۇل – قىزلىرىمىز، خىتاي مۇستەملىكىچىلىرىنىڭ زۇلۇمىغا باش ئەگىپ، قۇل بولۇپ ياشاشتىن، ئۆز خەلقىنىڭ ئەركىنلىكى ۋە ئازادلىقى ئۈچۈن جېنىنى پىدا قىلىشنى شەرەپ دەپ بىلگەن ئىدى.

بارىن قەھرىمانلىرى ئۆزلىرىنىڭ قىممەتلىك ھاياتى بەدىلىگە كۈرەشچان ئۇيغۇر خەلقىنىڭ ۋە جەڭگىۋار ئەجدادلىرىمىزنىڭ زۇلۇمغا ۋە مۇستەملىكىچىلەرگە تەز پۈكمەيدىغان كۈرەشچان روھىنى نامايان قىلغان ئىدى.

بارىن ئەزىمەتلىرى ئۇيغۇر خەلقىنىڭ ئەركىنلىككە، ھۆرلۈككە بولغان تەشنالىقى ۋە ئارزۇسىنى پۈتۈن دۇنياغا جاكارلاش بىلەن بىرگە، خەلقىمىزنىڭ دىلىغا مىللىي ئويغىنىش ۋە مىللىي كۈرەش ئۇرۇقىنى چاچقان ئىدى.

بارىن ئىنقىلابى، ئۇيغۇر پەرزەنتلىرى ئۈچۈن ئەبەدى خاتىرىلەشكە ئەرزىيدىغان بىر مۇقەددەس كۈن سۈپىتىدە تارىخ بەتلىرىدىن مەڭگۈ ئورۇن ئالدى.

د ئۇ ق، ئامېرىكىنىڭ كامبودژا جازاسىنى قارشى ئالىدىغانلىقىنى بىلدۈردى

يوللانغان ۋاقتى:2010-04-02| سەھىپە: د ئۇ ق تەرىپىدىن چىقىرىلغانلار د ئۇ ق غا ئالاقىدار خەۋەرلەر

ر ف ئا خەۋىرى
2010-يىلى 4-ئاينىڭ 2-كۈنى

ئامېرىكا تۈنۈگۈن كامبودژانىڭ بۇلتۇر 12 – ئاي مەزگىلىدە 20 نەپەر ئۇيغۇرنى خىتايغا قايتۇرۇپ بەرگەنلىكىگە نارازىلىق بىلدۈرۈش ئۈچۈن، كامبودژاغا بېرىلىدىغان ھەربىي ياردەمنى توختاتقانلىقىنى ئېلان قىلغان ئىدى. بۈگۈن دۇنيا ئۇيغۇر قۇرۇلتىيى بۇ ھەقتە بايانات بېرىپ، ئامېرىكىنىڭ كامبودژاغا قاراتقان جازاسىنى قارشى ئالىدىغانلىقىنى بىلدۈردى.

بىرلەشمە ئاگېنتلىقىنىڭ خەۋەر قىلىشىچە، ئامېرىكا تاشقى ئىشلار مىنىستىرلىقىنىڭ باياناتچىسى پ ج كروۋلىي پەيشەنبە كۈنى مۇخبىرلارغا قىلغان سۆزىدە , ئامېرىكىنىڭ كامبودژانىڭ 20 نەپەر ئۇيغۇرنى خىتايغا قايتۇرۇپ بەرگەنلىكىگە نارازىلىق بىلدۈرۈش يۈزىسىدىن، كامبودژاغا بېرىۋاتقان ھەربىي ياردەم پۇلىنى توختاتقانلىقىنى ھەم بۇ قارارىنى كامبودژاغا بىلدۈرگەنلىكىنى ئېيتتى. پ ج كروۋلىي سۆزىدە” ئامېرىكىنىڭ كامبودژاغا ئەۋەتمەكچى بولغان 200 دانە ھەربىي ئاپتوموبىلىمۇ بۇ سەۋەبتىن توختىتىپ قويۇلۇشى مۇمكىن ” دېگەن.

بۇلتۇر 12 – ئاينىڭ 19 – كۈنى كامبودژا ھۆكۈمىتى، خىتاي تاشقى ئىشلار مۇئاۋىن مىنىستىرى شى جىنپىڭ كامبودژانى زىيارەت قىلىش ھارپىسىدا، “5 – ئىيۇل ئۈرۈمچى ۋەقەسى” دىن كېيىن، خىتايدىن قېچىپ چىقىپ، پاناھلىق تىلىگەن 22 نەپەر ئۇيغۇرنىڭ 20 نەپىرىنى، خەلقئارا جەمئىيەتنىڭ قاتتىق ئەيىبلىشىگە قارىماي خىتايغا قايتۇرۇپ بەرگەن ئىدى. بۇ ئۇيغۇرلار خىتايغا قايتۇرۇلۇپ ئىككى كۈندىن كېيىن، يەنى 21 – دېكابىر كۈنى شى جىنپىڭ كامبودژا ھۆكۈمىتى بىلەن 1 مىليارد دوللارلىق ياردەم كېلىشىمى ئىمزالىغان ئىدى.

ۋەقەدىن كېيىن خەلقئارا جەمئىيەت كامبودژانى ھەم كامبودژاغا بېسىم ئىشلىتىپ بۇ 20 نەپەر ئۇيغۇرنى قايتۇرۇپ كەتكەن خىتاي ھۆكۈمىتىنى قاتتىق ئەيىبلەپ كېلىۋاتقان ۋە كامبودژا ھۆكۈمىتىگە قارىتا بەزى تەدبىرلەرنى ئالغان ئىدى. يەنى بۇ يىل فېۋرالدا ئامېرىكا مۇئاۋىن تاشقى ئىشلار مىنىستىرى سكوت مارشېل كامبودژاغا زىيارەتكە بارغاندا كامبودژا ھۆكۈمىتىنىڭ ئامېرىكىدىن ئالغان 330 مىليون دوللارلىق قەرزىنى كەچۈرۈم قىلىۋېتىش تەلىپىنى رەت قىلغان ئىدى . گەرچە ئەينى چاغدا ئامېرىكا كامبودژاغا نېمە ئۈچۈن قەرزنى كەچۈرۈم قىلمىغانلىقى ھەققىدە ئېنىق بىر نېمە دېمىگەن بولسىمۇ، لېكىن خەۋەرلەردە ئامېرىكا مۇئاۋىن باش مىنىستىرى سكوت مارشېلنىڭ كامبودژا بىلەن بولغان سۆھبەتتە ئۇلارنىڭ 20 نەپەر ئۇيغۇرنى خىتايغا قايتۇرۇپ بەرگەنلىكىنى ئەيىبلىگەنلىكى ئاشكارىلانغان  ئىدى.