كانادانىڭ تورونتو، كالگېرى، ۋانكوۋېر شەھەرلىرىدە ئۇيغۇر مەسىلىسى ئاڭلىتىلغان

خەۋەر مەنبەسى: ئەركىن ئاسىيا

ئامېرىكادىكى «ئۇيغۇر ھەرىكىتى» تەشكىلاتىنىڭ باشلىقى روشەن ئابباس خانىم كانادادىكى IDRF، يەنى «مۇسۇلمانلار خەيرى-ساخاۋەت جەمئىيىتى» نىڭ ئورۇنلاشتۇرۇشى بىلەن كانادانىڭ تورونتو، كالگېرى قاتارلىق شەھەرلىرىدە دوكلات بەرگەن.

ئۇ مەزكۇر دوكلات بېرىش يىغىنلىرىدا ئۇيغۇر پائالىيەتچىلىرىنىڭ خىتاي ھۆكۈمىتىنىڭ ئۇيغۇرلارغا قاراتقان سىياسىي باستۇرۇشى ھەققىدە سۆز قىلغانلىقىنى، يىغىن ئەھلىنىڭ بۇ دوكلاتلارغا قارىتا ئىنكاسىنىڭ كۈچلۈك بولغانلىقىنى ۋە يىغىنغا قاتناشقان سىياسىي ئەربابلارنىڭ ئۇيغۇرلار ئۈچۈن قانداق ياردەم بېرىش مەسىلىسىنى بىردەك ئوتتۇرىغا قۇيغانلىقىنى بىلدۈردى.

دۇنيا ئۇيغۇر قۇرۇلتىيىنىڭ باش تەپتىشى ئابلىكىم ئىدرىس ئەپەندى بۇ قېتىم كانادانىڭ تورونتو، كالگېرى، ۋانكوۋېر شەھەرلىرىدە ئېلىپ بېرىلغان پائالىيەتلەرنىڭ ئەمىلى ئۈنۈمىنىڭ يۇقىرى بولغانلىقىنى تەكىتلەپ ئۆتتى.

تەپسىلاتى...

گېرمانىيە پارلامېنت ئەزاسى گۇدە يېنسېننىڭ ئۇيغۇرلار توغرىسىدىكى نۇتقى تاراتقۇلارنىڭ دىققىتىنى تارتتى

خەۋەر مەنبەسى: ئەركىن ئاسىيا

گېرمانىيە پارلامېنتىنىڭ ئەزاسى گۇيدې يېنسېننىڭ ئۇيغۇرلارنى قوللاپ نامايىشقا قاتنىشىشى ھەرقايسى مەتبۇئاتلارنىڭ دىققىتىنى قوزغىدى.

12-يانۋار ۋە 18-يانۋار گېرمانىيەنىڭ ھامبۇرگ شەھىرىدە خىتاينىڭ جازا لاگېرلىرى سىياسىتىگە، ئۇيغۇرلار ئۈستىدىن يۈرگۈزۈۋاتقان زۇلۇملىرىغا قارشى زور كۆلەملىك نامايىشلار ئېلىپ بېرىلغان ئىدى. 19-يانۋار كۈنى گېرمانىيە پايتەختى بېرلىندا يەنە بىر قېتىم كۆلىمى زور بولغان بىر نامايىش ئېلىپ بېرىلغان. بۇ نامايىشنى دۇنيا ئۇيغۇر قۇرۇلتىيى گېرمانىيەدىكى خوڭكوڭ، تەيۋەن، تىبەت تەشكىلاتلىرى بىرلىكتە تەشكىللىگەن. نامايىشقا بېرلىندىكى مىڭلىغان تۈركلەر ۋە بىر قىسىم يەرلىك گېرمانلارمۇ ئىشتىراك قىلدى.

بۇ نامايىشقا د ئۇ ق نىڭ تەكلىپى بىلەن گېرمانىيە پارلامېنتىنىڭ ئەزاسى، پارلامېنت «كىشىلىك ھوقۇق ۋە ئىنسانپەرۋەرلىك ياردىمى كومىتېتى» نىڭ رەئىسى گۇدە يېنسېن خانىممۇ قاتناشقان بولۇپ، ئۇ ئۇيغۇر دىيارىدىكى جازا لاگېرلىرىغا ھەمدە خىتاينىڭ خوڭكوڭدىكى بېسىم سىياسىتىگە قارشى نۇتۇق سۆزلىگەن، تەيۋەننى قوللاشنى تەكىتلىگەن. ئۇنىڭ ئۇيغۇرلار، تەيۋەنلىكلەر ۋە خوڭكوڭلۇقلارنىڭ بىرلەشمە نامايىشىنى قوللىشى ھەمدە نامايىش مەيدانىدا نۇتۇق سۆزلەپ خىتاينىڭ زۇلۇم سىياسىتىنى ئەيىبلىشى گېرمانىيە مەتبۇئاتلىرىنىڭ دىققىتىنى جەلپ قىلغان.

تەپسىلاتى...

گېرمانىيە پايتەختى بېرلىندا خىتايغا قارشى بىرلەشمە نامايىش ئېلىپ بېرىلدى

خەۋەر مەنبەسى: ئەركىن ئاسىيا

بېرلىندا ئۇيغۇرلار، تۈركلەر، تىبەتلىكلەر، تەيۋەنلىكلەر ۋە خوڭكوڭلۇقلارنىڭ خىتايغا قارشى بىرلەشمە نامايىشى ئۆتكۈزۈلدى.

12-يانۋار ۋە 18-يانۋار كۈنلىرى گېرمانىيەنىڭ ھامبۇرگ شەھىرىدىكى تۈركلەر، تۈركمەنلەر، ئەزەربەيجانلىقلار، ئەرەبلەر ۋە گېرمانلار بىرلىشىپ خىتاينىڭ ئۇيغۇر دىيارىدا تەسىس قىلغان جازا لاگېرلىرى تۈزۈمىگە، ئۇيغۇرلار ئۈستىدىن يۈرگۈزۈۋاتقان ئېتنىك ۋە مەدەنىيەت قىرغىنچىلىقلىرىغا قارشى قانچە مىڭ كىشىلىك زور نامايىش ئېلىپ بارغان ئىدى. 19-يانۋار كۈنى، د ئۇ ق نىڭ باش بولۇپ تەشكىللىشى بىلەن گېرمانىيە پايتەختى بېرلىندا ئۇيغۇرلار، تۈركلەر، تىبەتلىكلەر، تەيۋەنلىكلەر، خوڭكوڭلۇقلارنىڭ قوشۇلۇشى ئاستىدا خىتايغا قارشى كۆلىمى زور بولغان بىرلەشمە نامايىش ئۆتكۈزۈلگەن.

تەپسىلاتى...

ئۈچ تەشكىلاتنىڭ ۋەكىللىرى ئەنقەرەدە مۇھىم ئۇچرىشىشلار ئېلىپ باردى

خەۋەر مەنبەسى: ئەركىن ئاسىيا

دۇنيا ئۇيغۇر قۇرۇلتىيى، ئۇيغۇر ئاكادېمىيەسى ۋە ئەنقەرەدىكى ئۇيغۇر ئىنىستىتۇتى مەسئۇللىرىدىن تەركىپ تاپقان ھەيئەت تۈركىيەدە ھاكىمىيەت بېشىدىكى ئادالەت ۋە تەرەققىيات پارتىيەسى مۇئاۋىن باشلىقى جەۋدەت يىلماز، ئۆكتىچى پارتىيەلەردىن بىرى بولغان سائادەت پارتىيەسى رەئىسى تەمەل قاراموللائوغلۇ ئەپەندىلەر بىلەن ئۇچرىشىپ، ئۇيغۇرلارنىڭ ئېغىر ۋەزىيىتى بايان قىلىنغان «شەرقىي تۈركىستاندا ئىرقىي قىرغىنچىلىق»، «شەرقىي تۈركىستاندا ئىنسان ھەقلىرى دەپسەندىچىلىكى» ناملىق دوكلاتلىرىنى ۋە تۈركىيەدىكى ئۇيغۇرلارنىڭ قىيىنچىلىقى بايان قىلىنغان تەلەپ خېتىنى سۇندى. بىر سائەت داۋاملاشقان ئۇچرىشىشتىن كېيىن مىكروفونىمىزنى سائادەت پارتىيەسى باشلىقى تەمەل قاراموللائوغلىغا ئۇزاتتۇق. ئۇ، مۇنداق دېدى: «سىلەرنىڭ بىزگە مەلۇمات بەرگەنلىكىڭلارغا سۆيۈندۈم. ئاللاھ سىلەرگە يار بولسۇن. ھەقىقەتەن خىتاي ئېلىپ بېرىۋاتقان زۇلۇمنى ئەيىبلىمەي تۇرالمايمىز. بۇلارنى نەزەردە تۇتۇپ تۇرۇپ ھازىر تۈركىيەدە ئىقامەت بىلەن تۇرۇۋاتقان 20 مىڭ ئۇيغۇرغا تۈركىيە ۋەتەنداشلىق بېرىشى كېرەكلىكىنى تەكىتلەيمىز. ئىككىنچى بىر مەسىلە مۇسۇلمان دۆلەتلەرنىڭ ۋە غەرىپ ئەللىرىنىڭ شەرقىي تۈركىستان مەسىلىسىدە خىتايغا بېسىم ئىشلىتىشى كېرەك.»

ئۇ، خىتاينىڭ شەرقىي تۈركىستاندىكى مۇسۇلمانلارغا قارىتا ئەقىلغا سىغمايدىغان بېسىم سىياسىتى ئېلىپ بېرىلىۋاتقانلىقىغا ئىشىنىدىغانلىقىنى بايان قىلىپ مۇنداق دېدى: «خىتاينىڭ شەرقىي تۈركىستاندىكى مۇسۇلمانلارغا قارىتا ئېقىلغا سىغمايدىغان بېسىم سىياسىتى ئېلىپ بېرىلىۋاتقانلىقىغا ئىشىنىمىز. بىز خىتاينىڭ بۇ زۇلۇمىنى توختىتىش ئۈچۈن تۈركىيەدە ۋە پۈتۈن ئىسلام دۇنياسىدا خىتاي ماللىرىنى بايقۇت قىلىش كېرەك دەپ ئويلايمىز. گەپ ئاڭلىمايۋاتقان خىتايغا بۇ يول ئارقىلىق گەپ ئاڭلاتقىلى بولۇشى مۇمكىن. مەن پۈتۈن دۇنيادىكى ئۇيغۇرلارنىڭ بالدۇرراق بۇ دەرتتىن قۇتۇلۇشىنى ئۈمىد قىلىمەن.»

تەپسىلاتى...

دولقۇن ئەيسا: «خىتاي مېنىڭ دادامنىڭ قاچان ۋە قانداق ئۆلگەنلىكىنى ئاشكارىلىسۇن»

خەۋەر مەنبەسى: ئەركىن ئاسىيا

10-يانۋار كۈنى خىتاينىڭ ھۆكۈمەت گېزىتى بولغان «يەرشارى ۋاقتى گېزىتى» تەرىپىدىن «شىنجاڭ بۆلگۈنچىلىرىنىڭ تۇغقانلىرى ئۇلارنىڭ يالغانچىلىقىنى ئەيىبلىدى» ماۋزۇلۇق ماقالىسىدە ئۇيغۇر رەھبەرلىرىدىن «خەلقئارا ئۇيغۇر كىشىلىك ھوقۇق-دېموكراتىيە فوندى» نىڭ رەئىسى رابىيە قادىر خانىم ۋە دۇنيا ئۇيغۇر قۇرۇلتىيى رەئىسى دولقۇن ئەيسا ئەپەندىلەرگە ھۇجۇم قىلغان. ئۇنىڭدا ئىلگىرى سۈرۈلۈشىچە، 10-يانۋار يەكشەنبە كۈنى شىنجاڭ ئۇيغۇر ئاپتونوم رايونلۇق ئۇچۇر-ئاخبارات ئىشخانىسىنىڭ باياناتچىسى گۈلى ئابلىم ئاخباراتچىلارنى كۈتۈۋېلىش يىغىنى ئۆتكۈزگەن ۋە مۇخبىرلارغا دولقۇن ئەيسا ۋە رابىيە قادىرلارنىڭ تۇغقانلىرى بىلەن ئۆتكۈزۈلگەن زىيارەت خاتىرىسىنى كۆرسىتىش ئارقىلىق، ئۇلارنىڭ يالغانچىلىق قىلىۋاتقانلىقىنى ئىلگىرى سۈرگەن.

«يەرشارى ۋاقتى گېزىتى» خەۋىرىدە، دولقۇن ئەيسا ئەپەندىنىڭ ئاچىسى ئارزۇگۈل ئىنىسىنى ئەيىبلەپ: «بىزنىڭ ئاتا-ئانىمىز قېرىلىقتىن ۋە كېسەللىكتىن ئۆلۈپ كەتكەن، بىراق مېنىڭ ئىنىم ئۇنى چەتئەلدە تۇرۇپ شىنجاڭنى قارىلاش ئۈچۈن قوللىنىپتۇ» دېگەنلىكىنى ئىلگىرى سۈرگەن.

تەپسىلاتى...

رابىيە قادىر: «خىتاينىڭ دېگىنى راست بولسا قالغان بالىلىرىمنى ۋە تۇغقانلىرىمنى كۆرسەتسۇن»

خەۋەر مەنبەسى: ئەركىن ئاسىيا

10-يانۋار كۈنى خىتاينىڭ ھۆكۈمەت گېزىتى بولغان «يەرشارى ۋاقتى گېزىتى» تەرىپىدىن «شىنجاڭ بۆلگۈنچىلىرىنىڭ تۇغقانلىرى ئۇلارنىڭ يالغانچىلىقىنى ئەيىبلىدى» ماۋزۇلۇق بىر پارچە ماقالە ئېلان قىلىندى. ئۇلارنىڭ بۇ قېتىملىق نىشانى ئۇيغۇر رەھبەرلىرىدىن «خەلقئارا ئۇيغۇر كىشىلىك ھوقۇق-دېموكراتىيە فوندى» نىڭ رەئىسى رابىيە قادىر خانىم ۋە دۇنيا ئۇيغۇر قۇرۇلتىيى رەئىسى دولقۇن ئەيسا ئەپەندىلەر ئىدى. خەۋەر تۆۋەندىكى جۈملىلەر بىلەن باشلانغان: «شىنجاڭ ئۇيغۇر ئاپتونوم رايونىنىڭ بىر نەپەر خادىمى دولقۇن ئەيسا ۋە رابىيە قادىردىن ئىبارەت ئىككى بۆلگۈنچىنىڭ تۇغقانلىرى بىلەن ئۆتكۈزۈلگەن زىيارەت خاتىرىسىنىڭ ۋىدىيوسىنى جۈمە كۈنىدىكى ئاخبارات ئېلان قىلىش يىغىنىدا كۆرسىتىپ، ئۇلارنىڭ يالغانچىلىقلىرىنى ئاشكارىلىدى».

خەۋەردىن مەلۇم بولۇشىچە، 10-يانۋار جۈمە كۈنى ئۇيغۇر ئاپتونوم رايونلۇق ئاخبارات-ئۇچۇر ئىشخانىسىنىڭ باياناتچىسى گۈلى ئابلىم مەخسۇس ئاخبارات ئېلان قىلىش يىغىنى ئۆتكۈزۈش ئارقىلىق رابىيە قادىر خانىم ۋە دولقۇن ئەيسالارنىڭ ئائىلىلىرى سۆزلىتىلگەن ۋىدىيونى كۆرسەتكەن. ئەمما «يەرشارى ۋاقتى گېزىتى» شۇ كۈنى ئىسپات سۈپىتىدە پەقەتلا رابىيە قادىر خانىمنىڭ ئائىلىسى سۆزلىتىلگەن ۋىدىيونى تىۋىتتىر ئارقىلىق خەلقئاراغا تارقاتقان. مەزكۇر ۋىدىيودا رابىيە قادىر خانىمنىڭ چوڭ ئوغلى قاھار ئابدۇرېھىم ۋە ئىككى نەۋرە قىزى سۆزلىتىلگەن، شۇنداقلا ئۇلارنىڭ ئۆيىدە ئۇسۇل ئويناۋاتقان كۆرۈنۈشلىرى كۆرسىتىلگەن.

تەپسىلاتى...

قورچاق رەئىس شۆھرەت زاكىرنىڭ ميۇنخېندىكى بىر تۇغقان قېرىنداشلىرى د ئۇ ق رەئىسى دولقۇن ئەيساغا ھۇجۇم قىلدى

خەۋەر مەنبەسى: ئەركىن ئاسىيا

12-يانۋار شۆھرەت زاكىرنىڭ گېرمانىيەدىكى ئەۋلادلىرى د ئۇ ق رەئىسى دولقۇن ئەيساغا بىۋاسىتە ھۇجۇم قىلغان.

ئاخىرقى ئايلاردىن بۇيان خىتاي ھۆكۈمىتى «يەر شارى ۋاقتى گېزىتى» قاتارلىق تەشۋىقات قوراللىرى ئارقىلىق ئۆزلىرىنىڭ جازا لاگېرلىرى سىياسىتىنى ئاقلاش، مۇھاجىرەتتىكى ئۇيغۇرلارنىڭ گۇۋاھلىق ۋە قارشىلىق ھەرىكەتلىرىنى قارىلاشنى كۈچەيتمەكتە ئىدى. بولۇپمۇ جازا لاگېرلىرىغا قارشى جىددىي ھەرىكەت ئېلىپ بېرىۋاتقان د ئۇ ق ۋە ئۇنىڭ رەئىسى دولقۇن ئەيسا ئەپەندىنى ھۇجۇم نىشانىغا ئايلاندۇرۇپ، بۇ ھەقتە ئارقا-ئارقىدىن ماقالىلەر ئېلان قىلىپ كەلگەن ئىدى. 12-يانۋار كۈنى ئۇيغۇر ئاپتونوم رايونلۇق ھۆكۈمەتنىڭ قورچاق رەئىسى شۆھرەت زاكىرنىڭ ميۇنخېندىكى بىۋاسىتە تۇغقانلىرى جامائەت سورۇنىدا د ئۇ ق رەئىسىگە بىۋاسىتە ھۇجۇم قىلغان.

ئىگىلىشىمىزچە، 12-يانۋار كۈنى د ئۇ ق رەئىسى دولقۇن ئەيسا باشلىق ميۇنخېندىكى ئۇيغۇر جامائىتى نۇرمەمەت ئىسىملىك بىر كىشىنىڭ غۇلجادا قازا قىلغان ئاپىسىنىڭ روھىغا قۇرئان تىلاۋەت قىلىش ئۈچۈن ئۇنىڭ ئۆيىگە جەم بولغان. بۇ سورۇنغا چاقىرىلمىغان مېھمانلاردىن ئۇيغۇر ئاپتونوم رايونىنىڭ قورچاق رەئىسى شۆھرەت زاكىرنىڭ ميۇنخېندا ياشاۋاتقان سىڭلىسى مېھرىبان زاكىر ۋە ئۇنىڭ يولدىشى غالىپمۇ داخىل بولغان.

تەپسىلاتى...

د ئۇ ق: «تەيۋەن خەلقىنىڭ سەي يىڭۋېننى قايتا پرېزىدېنتلىققا سايلاپ، تەيۋەننىڭ ئىگىلىك ھوقۇقىنى قوغدىغانلىقىدىن ئىلھاملاندۇق»

خەۋەر مەنبەسى: ئەركىن ئاسىيا

دۇنيا ئۇيغۇر قۇرۇلتىيى 13‏-يانۋار بايانات ئېلان قىلىپ، تەيۋەن پرېزىدېنتى سەي يىڭۋېننىڭ قايتا پرېزىدېنتلىققا سايلانغانلىقىنى تەبرىكلىدى، شۇنداقلا تەيۋەن خەلقى ۋە ھۆكۈمىتىنى قوللايدىغانلىقىنى بىلدۈردى.

باياناتتا قەيت قىلىنىشىچە، د ئۇ ق تەيۋەن خەلقىنىڭ خىتاينىڭ بېسىمىغا قارىماي سەي يىڭۋېننى قايتا پرېزىدېنتلىققا سايلاپ، تەيۋەننىڭ ئىگىلىك ھوقۇقىنى قوغدىغانلىقىدىن ئىلھاملانماقتىكەن.

باياناتتا، سەي يىڭۋېننىڭ قايتا پرېزىدېنتلىققا سايلىنىشىنىڭ سىمۋوللۇق ئەھمىيىتى بارلىقى تەكىتلىنىپ: «بۇ تەيۋەننىڭ بېيجىڭنىڭ بېسىمىدىن قورقۇپ قالمايدىغانلىقىنى كۆرسەتتى» دېيىلگەن. سەي يىڭۋېن 11‏-يانۋار كۈنى ئۆتكۈزۈلگەن پرېزىدېنت سايلىمىدا 57. 2 پىرسەنت بېلەتكە ئېرىشىپ، رەقىبى خىتاي مىللەتچى پارتىيەسى(گومىنداڭ)نىڭ پرېزىدېنت نامزاتى خەن گويۈنى مەغلۇپ قىلغان. خەن گويۈ سايلامدا 38. 6 % بېلەتكە ئېرىشكەن ئىدى. كۆزەتكۈچىلەر، سەي يىڭۋېننىڭ قايتا پرېزىدېنتلىققا سايلىنىشىنى بېيجىڭغا بېرىلگەن كۈچلۈك سىگنال، دەپ قارىماقتا.

تەپسىلاتى...

د ئۇ ق 2020-يىلىنى «خەلقئارا ئۇيغۇر مەدەنىيەت فېستىۋالى يىلى» قىلىپ بېكىتكەنلىكىنى ئېلان قىلدى

خەۋەر مەنبەسى: ئەركىن ئاسىيا

د ئۇ ق رەئىسى دولقۇن ئەيسا ئەپەندى 7-يانۋار كۈنى قۇرۇلتاينىڭ تور تېلېۋىزىيەسىدە نۇتۇق سۆزلەپ، د ئۇ ق نىڭ 2020-يىلىنى مۇھاجىرەتتىكى ئۇيغۇرلارنىڭ «خەلقئارا ئۇيغۇر مەدەنىيەت فېستىۋالى يىلى» قىلىپ بېكىتكەنلىكىنى ئېلان قىلدى.

د ئۇ ق رەھبەرلىرىدىن ئىگىلىشىمىزچە، 2020-يىلىنى مۇھاجىرەتتىكى ئۇيغۇرلارنىڭ «خەلقئارا ئۇيغۇر مەدەنىيەت فېستىۋالى يىلى» قىلىپ بېكىتىش مەسىلىسى 2019-يىلى 12-ئاينىڭ 7-كۈنى بېلگىيە پايتەختى بىريۇسسېلدا چاقىرىلغان د ئۇ ق ئىجرائىيە كومىتېتىنىڭ 5-نۆۋەتلىك يىغىنىدا قارار قىلىنغان.
د ئۇ ق رەئىسى دولقۇن ئەيسا ئەپەندىنىڭ بىلدۈرۈشىچە، خىتاي ھاكىمىيىتىنىڭ ئۇيغۇر دىيارىدا ئېلىپ بېرىۋاتقان جازا لاگېرلىرى سىياسىتى يالغۇز ئېتنىك قىرغىنچىلىقنىلا ئەمەس، ئۆز نۆۋىتىدە يەنە رۇشەن ھالدا مەدەنىيەت-سەن´ئەت قىرغىنچىلىقىنىمۇ ئۆز ئىچىگە ئالغان بولۇپ، مۇھاجىرەتتىكى ئۇيغۇر سەنئەتكارلىرىنى ھەرىكەتكە كەلتۈرۈپ تۇتقۇندىكى سەنەتكارلارنىڭ ئاۋازىنى دۇنياغا ئاڭلىتىش نۆۋەتتىكى مىللىي دەۋانىڭ مۇھىم بىر تەركىبى قىسمى سانىلىدىكەن.

تەپسىلاتى...

لوندوندىكى خىتاي ئەلچىخانىسى ئالدىدا نارازىلىق نامايىشى ئۆتكۈزۈلدى

خەۋەر مەنبەسى: ئەركىن ئاسىيا

ئەنگلىيە ئەمگەك پارتىيەسى قۇرغان «ئۇيغۇرلارنى قوللاش گۇرۇپپىسى» نىڭ ئۇيۇشتۇرۇشى بىلەن 1-ئاينىڭ 5-كۈنى كەچ سائەت ئالتىدىن يەتتىگىچە خىتاينىڭ لوندوندا تۇرۇشلۇق ئەلچىخانىسى ئالدىدا نامايىش ئۆتكۈزۈلگەن.

ئۈچ ئايدىن بۇيان ھەر ئاينىڭ 5-كۈنى ئۆتكۈزۈلۈۋاتقان نامايىشنىڭ تۇنجى قېتىملىقىغا ئاز ساندا كىشى قاتناشقان. ئەمما بۇ قېتىمقىسىغا ئۇيغۇر، خىتاي، تىبەت ۋە ئىنگلىزلاردىن بولۇپ، 200 ئەتراپىدا كىشى ئىشتىراك قىلغان. ئۇلار قوللىرىدا ئاي-يۇلتۇزلۇق كۆك بايراق ۋە لوزۇنكىلارنى كۆتۈرگەن ھالدا «ئۇيغۇرلارغا ئەركىنلىك، خىتاي جازا لاگېرلىرىنى تاقىسۇن، خىتايلار شەرقىي تۈركىستاندىن چىقىپ كەتسۇن، شەرقىي تۈركىستانغا مۇستەقىللىق» دېگەندەك شوئارلارنى توۋلاشقان.

بۇ ھەقتە تېلېفون زىيارىتىمىزنى قوبۇل قىلغان ئەنگلىيەدىكى ئۇيغۇر پائالىيەتچى، دۇنيا ئۇيغۇر قۇرۇلتىيىنىڭ لوندوندا تۇرۇشلۇق ۋەكىلى رەھىمە مەخمۇت خانىم 1-ئاينىڭ 5-كۈنى لوندوندىكى خىتاي ئەلچىخانىسى ئالدىدا ئۆتكۈزۈلگەن نامايىش توغرىسىدا مەلۇمات بەردى. ئۇ خىتايغا قارشى تۇنجى قېتىملىق نامايىشنىڭ 9-ئاينىڭ 5-كۈنى 30 ئەتراپىدا كىشىنىڭ قاتنىشىشى بىلەن باشلانغانلىقىنى، بۇ قېتىمقى نامايىشقا بولسا 200 ئەتراپىدا كىشىنىڭ قاتناشقانلىقىنى بايان قىلدى.

تەپسىلاتى...