خىتاينىڭ كېيىنكى 6 ئايلىق پىلانى

د ئۇ ق تەشۋىقات مەركىزى
2010-يىلى 7-ئاينىڭ28-كۈنى

شەرقىي تۈركىستاننىڭ نۆۋەتتىكى ئومۇمىي سىياسىي ۋەزىيىتىگە باققىنىمىزدا، خىتاي ھاكىمىيىتىنىڭ پۈتۈن كۈچىنى ئۇيغۇر مىللىي مائارىپىنى خىتايلاشتۇرۇش سىياسىتىگە مەركەزلەشتۈرگەنلىكىنى ۋە بۇ جەھەتتە كىشىنى چۆچۈتىدىغان دەرىجىدە زور ئىلگىرىلەش ھاسىل قىلغانلىقىنى كۆرۈۋېلىش مۇمكىن.

” تىيانشان تورى” نىڭ 7 – ئاينىڭ 27 – كۈنى خەۋەر قىلىشىچە، ” ئاپتونوم رايونلۇق پارتكوم ” نىڭ مۇئاۋىن سېكرېتارى ۋە ئاپتونوم رايونلۇق خەلق ھۆكۈمىتىنىڭ بىرىنچى مۇئاۋىن رەئىسى ياڭ گاڭ، شۇ كۈنى چاقىرىلغان ” ئاپتونوم رايونلۇق 11 – نۆۋەتلىك خەلق قۇرۇلتىيى دائىمىي كومىتېتىنىڭ 19 – قېتىملىق ئومۇمىي يىغىنى ” دا بەرگەن ھۆكۈمەت خىزمىتىدىن دوكلاتىدا، ” ئاپتونوم رايونلۇق خەلق ھۆكۈمىتى ” نىڭ كېيىنكى يېرىم يىل ئىچىدە شەرقىي تۈركىستاندا ” قوش تىللىق يەسلى ” دەپ ئاتالغان ۋە مەخسۇس ئۇيغۇر ئۆسمۈرلىرى ئۈچۈن تەسىس قىلىنغان  خىتايچە يەسلىدىن 1016 نى قۇرۇپ چىقىدىغانلىقىنى ۋە 20 مىللىي مەكتەپنى خىتاي مەكتىپىگە قوشۇۋېتىدىغانلىقىنى  بايان قىلغان.

تەپسىلاتى...

د ئۇ ق ئاخباراتى : خىتاينىڭ ساختا قىياپىتى يەنە قايتا ئوتتۇرىغا چىقتى

د ئۇ ق تەشۋىقات مەركىزى
2010-يىلى 7-ئاينىڭ 27-كۈنى

5 – ئىيۇل ئۈرۈمچى قىرغىنچىلىقى سەۋەبى بىلەن ئۆتكەندە بېيجىڭدا چاقىرىلغان ” شىنجاڭ خىزمەت يىغىنى ” دىن كېيىن، خىتاي ھاكىمىيىتى ئىچكى ۋە تاشقى جەھەتتە كەڭ كۆلەمدە تەشۋىقات دولقۇنى قوزغاپ، گويا يەرلىك خەلقنىڭ تۇرمۇش سەۋىيىسىدە بىر كېچىدىلا ” ئالەمشۇمۇل تەرەققىيات  ” لارنى  بارلىققا كەلتۈرىدىغاندەك بىر مەنزىرىنى يارىتىشقا تىرىشقان ۋە خىتاينىڭ كۆپلىگەن ئۆلكىلىرى تەرىپىدىن تەشكىل قىلىنغان  ئاتالمىش ” شىنجاڭغا ياردەم بېرىش ئۆمەكلىرى  ” خۇددى  كەلكۈندەك شەرقىي تۈركىستانغا  ئېقىپ كىرىشكە باشلىغان ئىدى.

دەرىجىدىن تاشقىرى نامراتلىق ۋە يوقسۇللۇق ئىچىدە جان تالىشىۋاتقان مىليونلىغان ئۇيغۇرلار، بولۇپمۇ ” تۆۋەن كاپالەتلىك ئائىلىلەر ” دەپ ئاتالغان نامرات دېھقانلار خىتاينىڭ بۇ خىل تەشۋىقاتىغا ئىشىنىپ قالغان ۋە يۇقىرىدىن كېلىدىغان ياردەمنى تەقەززالىق بىلەن كۈتۈشكەن ئىدى.

ئۇلار كۈتكەن خەۋەر ئاخىرى يېتىپ كەلدى.

” شىنخۇا ئاخبارات ئاگېنتلىقى ” نىڭ خەۋەر قىلىشىچە، 7 – ئاينىڭ 26 – كۈنى ” ئاپتونوم رايونلۇق خەلق ھۆكۈمىتى ” ئۈرۈمچىدە ئاخبارات ئېلان قىلىش يىغىنى چاقىرىپ، شەرقىي تۈركىستاندا ھازىر مەۋجۇت بولۇپ تۇرغان 1 مىليون 299 مىڭ نەپەر ” تۆۋەن كاپالەتلىك كىشى ” نىڭ ھەر بىرىگە  ئايدا 10 يۈەن قوشۇپ بېرىدىغانلىقىنى تەنتەنە بىلەن جاكارلىغان.

ئادەتتە خىتاينىڭ ئۆلچىمى بويىچە، يىللىق كىشى بېشىغا توغرا  كېلىدىغان كىرىمى 700 يۈەندىن تۆۋەن بولغان ئائىلىلەر، ” تۆۋەن كاپالەتلىك ئائىلىلەر ” دەپ ئاتىلىدۇ، بۇلارنىڭ ھەممىسىلا شەرقىي تۈركىستاننىڭ جەنۇبى رايونلىرىدىكى ئۇيغۇر دېھقانلىرىدىن ئىبارەت.

ئۇندىن بۇرۇن، ” تۆۋەن كاپالەتلىك دېھقان ” لارغا ئايدا بېرىلىدىغان ياردەم 65 يۈەن ئىدى، 10 يۈەننىڭ قوشۇلۇشى بىلەن ئەمدى 75 يۈەنگە چىققان.

خىتاي ھاكىمىيىتى قىلچە ئار – نومۇس قىلماستىن، نامرات ئۇيغۇر دېھقانغا  ئايدا قوشۇپ بېرىلگەن 10 يۈەنلىك ياردەمنى گويا مەركىزى ھۆكۈمەتنىڭ ئۇيغۇرلارغا قىلغان زور ئىلتىپاتى قىلىپ كۆرسىتىشكە تىرىشقان.

تەپسىلاتى...

گېرمانىيىنىڭ ئەڭ نوپۇزلۇق گېزىتىدە ئۇيغۇرلار تونۇشتۇرۇلدى

د ئۇ ق تەشۋىقات مەركىزى
2010-يىلى 7-ئاينىڭ 25-كۈنى

گېرمانىيىنىڭ ئەڭ چوڭ ۋە ئەڭ نوپۇزلۇق گېزىتى ھېسابلانغان  ” جەنۇبى گېرمانىيە گېزىتى ” نىڭ 2010 – يىلى 7 – ئاينىڭ 19 – كۈنىدىكى سانىدا ئۇيغۇرلار ھەققىدە چوڭ ھەجىملىك ماقالە ئېلان قىلىندى.

” يېڭى ھايات ئۈچۈن ئۇزۇن سەپەر ” دېگەن تەمىدىكى بۇ ماقالىدا، د ئۇ ق نىڭ ئەھۋالى، شەرقىي تۈركىستان ۋە ئۇيغۇرلارنىڭ ۋەزىيىتى، 2009 – يىلى يۈز بەرگەن ئۈرۈمچى قىرغىنچىلىقى،گېرمانىيىدە ياشاۋاتقان ئۇيغۇرلارنىڭ ئىجتىمائىي ھاياتى، چەتئەللەردىكى ئۇيغۇرلارنىڭ ئەھۋالى … قاتارلىق ناھايىتى كەڭ مەزمۇنلاردا ئەتراپلىق مەلۇمات بېرىپ ئۆتۈلدى.

مەزكۇر ماقالىدا، 2004 – يىلى قۇرۇلغان دۇنيا ئۇيغۇر قۇرۇلتىيىنىڭ مۇھاجىرەتتىكى ئۇيغۇرلارنىڭ ۋەكىللىك ئورگىنى ئىكەنلىكى تەكىتلىنىش بىلەن بىرگە، نۆۋەتتە چەتئەللەردە 600 مىڭ ئەتراپىدا ئۇيغۇر ياشاۋاتقانلىقى، بۇ ئۇيغۇرلارنىڭ كۆپىنچىسىنىڭ كوممۇنىست خىتاي شەرقىي تۈركىستاننى ئىشغال قىلغان 1949 – يىلىدىن كېيىن ئوتتۇرا ئاسىياغا ھىجرەت قىلىپ چىقىشقا مەجبۇر بولغانلىقى،ياۋروپا ئەللىرىدىكى ئۇيغۇرلارنىڭ سانىنىڭ 4000 ئەتراپىدا ئىكەنلىكى، بۇ ئۇيغۇرلارنىڭ ئىككىنچى بىر ھاياتلىق ئۈچۈن ئۇزۇن سەپەر قىلىپ ياۋروپا ئەللىرىگە ھىجرەت قىلىپ چىققانلىقى، 5 – ئىيۇل ئۈرۈمچى قىرغىنچىلىقىدىن كېيىن، خىتاي ھاكىمىيىتىنىڭ چەكلىمىسى تۈپەيلىدىن  چەتئەللەردىكى ئۇيغۇرلارنىڭ ھەتتا ۋەتىنىدىكى ئاتا – ئانىلىرىغا تېلېفون قىلىشتىنمۇ مەھرۇم قالغانلىقى بايان قىلىندى.

تەپسىلاتى...

غەيرەت نىياز ئۈستىدىن يېپىق سوت ئېچىلدى

ر ف ئا خەۋىرى
2010-يىلى 07-ئاينىڭ 23-كۈنى

ئۇيغۇربىز تورىنىڭ خەۋەر قىلىشىچە، ئۇيغۇر ئاپتونوم رايونلۇق قانۇن ئورگانلىرى، بۈگۈن 23 – ئىيۇل كۈنى ئۈرۈمچى ۋاقتى چۈشتىن بۇرۇن، بۇلتۇر 1 – ئۆكتەبىر كۈنى “دۆلەت بىخەتەرلىكىگە زىيان يەتكۈزگەن” دېگەن جىنايەت بىلەن قولغا ئېلىنغان،  شىنجاڭ ئىقتىساد گېزىتىنىڭ مۇخبىرى غەيرەت نىياز دېلوسى ئۈستىدىن يېپىق سوت ئېچىپ، ئۇنىڭغا 15 يىللىق قاماق جازاسى ھۆكۈم قىلغان.

ئۇيغۇربىز تورىنىڭ ساھىبى مۇستەقىل تەتقىقاتچى ئىلھام توختى ئەپەندى بۈگۈن ئەتىگەن زىيارىتىمىزنى قوبۇل قىلىپ، سوتنىڭ بۈگۈن ئەتىگەن يېپىق ھالەتتە ئېچىلغانلىقىنى، سوتقا پەقەت غەيرەت نىيازنىڭ ئايالى ۋە بىۋاسىتە ئۇرۇق – تۇغقانلىرىلا قاتناشتۇرۇلغانلىقىنى بىلدۈردى. مۇخبىر ئۇنىڭدىن غەيرەت نىيازنىڭ ئايالى رىسالەت خانىم ۋە غەيرەت نىيازنىڭ باشقا ئۇرۇق – تۇغقانلىرىنى زىيارەت قىلىش ئىمكانىيىتى بار – يوقلۇقىنى سورىغىنىدا، ئىلھام توختى ئەپەندى ھازىر رىسالەت خانىمنىڭ ھەم غەيرەت نىيازنىڭ ياشىنىپ قالغان ئانىسىنىڭ كەيپىياتىنىڭ تولىمۇ تۆۋەنلىكىنى، شۇڭا مۇخبىرلارنىڭ زىيارىتىنى قوبۇل قىلىشنى خالىمايدىغانلىقىنى بىلدۈردى.

بىز ئۈرۈمچىدىكى غەيرەت نىيازنى نىسبەتەن ياخشى بىلىدىغان كىشىلەرگە تېلېفون قىلغان بولساقمۇ، ئەمما ئۇلار ئۆزلىرىنىڭ غەيرەت نىياز دېلوسى ئۈستىدىن بۈگۈن ئەتىگەن سوت ئېچىلغانلىقى ھەققىدە ئۆزلىرىنىڭ خەۋەرسىز ئىكەنلىكىنى بىلدۈرۈشتى.

تەپسىلاتى...

رابىيە خانىم خىتاينىڭ “شىنجاڭنى دۇنيا تەشۋىق قىلىش” دېگەن ھەرىكىتى ھەققىدە توختالدى

ر ف ئا خەۋىرى
2010-يىلى 7-ئاينىڭ 22-كۈنى

دۇنيا ئۇيغۇر قۇرۇلتىيىنىڭ رەئىسى رابىيە خانىم بۈگۈن، خىتاينىڭ ھازىر چەتەللەردە ئېلىپ بېرىۋاتقان شىنجاڭنى دۇنياغا تەشۋىق قىلىش دېگەن ھەرىكىتى ھەققىدە توختالدى.

خىتاي ئۇچۇر ۋاسىتىلىرىنىڭ ئاشكارىلىشىچە، خىتاي مەركىزى كومىتېتى يېڭىدىن بەلگىلىگەن ئۇيغۇر ئاپتونوم رايون سېكرېتارى جاڭ چۈنشەن 7 – ئاينىڭ 20 – كۈنى ئۈرۈمچىدە، خىتاينىڭ تاشقى ئىشلار مىنىستىرى ياڭ جېچى بىلەن كۆرۈشكەندە، خىتاي تاشقى ئىشلار مىنىستىرلىقىنىڭ شىنجاڭنى دۇنياغا تەشۋىق قىلىش دېگەن ھەرىكەتتە قوللانغان  يېڭى تەدبىرلىرىنى مەدھىيىلىگەن؛ خىتاينىڭ تاشقى ئىشلار مىنىستىرى ياڭ جېچى مەركەزنىڭ شىنجاڭ ئىستراتېگىيىسى دېگەننى ئەمەلىيلەشتۈرۈش ئۈچۈن چېگرىدىن چىقىپ چەتەللەردە قوللانغان  يېڭى تەدبىر، تەجرىبىلىرىنى تونۇشتۇرغان ئىدى.

تەپسىلاتى...

تەيۋەن ۋە خىتاي مەتبۇئاتلىرىنىڭ راھىلە خانىمنىڭ تەيۋەن زىيارىتى ھەققىدىكى ئىنكاسلىرى

ر ف ئا خەۋىرى
2010-يىلى 7-ئاينىڭ 22-كۈنى

دۇنيا ئۇيغۇر قۇرۇلتىيىنىڭ رەئىسى رابىيە قادىر خانىمنىڭ قىزى راھىلە ئابدۇرېھىم تەيۋەننى زىيارەت قىلىپ، رابىيە خانىم ھەققىدىكى ھۆججەتلىك فىلىم “مۇھەببەتنىڭ 10 شەرتى”نىڭ دۋد سىنى تارقىتىش مۇناسىۋىتى بىلەن ئۇيۇشتۇرۇلغان بەزى پاالىيەتلەرگە قاتناشقان ئىدى. خىتاي مەتبۇاتلىرىدا پەيشەنبە كۈنى باش ماقالە ئېلان قىلىنىپ، راھىلەنىڭ زىيارىتى تەنقىد قىلىنغان.  لېكىن رابىيە خانىم ياكى راھىلەنىڭ زىيارىتىنى قوللايدىغان تەيۋەنلىك پاالىيەتچى ۋە بەزى خىتاي ئۆكتىچى زىيالىيلار تەيۋەندىكى ما يىڭجيۇ ھۆكۈمىتىنىڭ پوزىتسىيىسى ۋە بېيجىڭ ئاخبارات ۋاسىتىلىرىنىڭ تەنقىدىنى ئەيىبلىدى.

دۇنيا ئۇيغۇر قۇرۇلتىيى رەئىسى رابىيە قادىر خانىمنىڭ قىزى راھىلەنىڭ، ئانىسىغا ۋاكالىتەن تەيۋەندىكى “ئاي تۇغدى” كىشىلىك ھوقۇق جەمئىيىتىنىڭ تەكلىپىگە بىناەن تەيۋەننى زىيارەت قىلىشى، تەيۋەندە جامائەت پىكرى قوزغاپ، تەيۋەندىكى كىشىلىك ھوقۇق تەشكىلاتلىرى ۋە ئۆكتىچى پارتىيە – گۇرۇھلار بىلەن ھاكىمىيەت بېشىدىكى گومىنداڭ ھۆكۈمىتى ھەم ئۇنىڭ قوللىغۇچىلىرى ئارىسىدا بەس – مۇنازىرە قوزغىغان.

لېكىن، بۇ مۇنازىرە ما يىڭجيۇ ھۆكۈمىتىنىڭ تەيۋەن بىخەتەرلىك مەنپەەتىنى كۆزدە تۇتۇپ، رابىيە خانىمغا 3 يىللىق تەيۋەڭە كىرىش ۋىزا چەكلىمىسى قويغانلىقىنى ئېلان قىلىشى بىلەن ئىلگىرىلىگەن ھالدا قىزىغان ئىدى. بۇ مۇنازىرىگە پەيشەنبە كۈنى خىتاي چوڭ قۇرۈقلۇقىدىكى بەزى مەتبۇاتلار قېتىلىپ، راھىلەنىڭ تەيۋەن زىيارىتىنى تەنقىد قىلغان ھەم تەيۋەن داىرىلىرىنى ئاگاھلاندۇرغان. خىتاينىڭ كانىيى ھېسابلىنىدىغان ئاخبارات ۋاسىتىلىرىدىن “جۇڭپىڭ ئاگېنتلىقى”پەيشەنبە كۈنى باش ماقالە ئېلان قىلىپ، “شىنجاڭ” مۇستەقىلچىلىرىگە تەيۋەندە سورۇن ھازىرلاپ بېرىشنىڭ ئىككى قىرغاق مۇناسىۋىتىگە كۆرسىتىدىغان تەسىرىنى خاتىرىلەتتى.

تەپسىلاتى...

ئەنگلىيە ئۇيغۇر جەمئىيىتى يېڭى رەھبەرلىك ھەيئىتىنى سايلاپ چىقتى

ئەنگلىيە ئۇيغۇر جەمئىيىتى ئىدارە ھەيئىتى

2010-يىلى 7-ئاينىڭ 22-كۈنى

2002 -يىلى بىر نەچچە كىشىنىڭ غەيرەتلىرى بىلەن قۇرۇلغان ئەنگلىيە ئۇيغۇر جەمئىيىتى تا بۈگۈنكى كۈنگە قەدەر نۇرغۇن ئەگرى-توقاي يوللارنى بېسىپ  گەرچە ئادەم سانى ئاز بولسىمۇ ئىمكانىيەتلىرى يار بەرگەن دائىرىدە  ئاز بولمىغان ئىشلارنى قىلىپ كەلگەن ئىدى.

شەرقىي تۈركىستان دەۋاسىنىڭ خەلقئارالىشىشى ۋە يۇرتداشلىرىمىزنىڭ كۈندىن كۈنگە كۆپىيىشى بۇ تەشكىلاتنىڭ تەرەققىي كېلىشى ۋە پائالىيەت دائىرىسىنىڭ كېڭىشىگە تۈرتكە بولماقتا. شۇ ۋەجىدىن بۇ يەردىكى ئۇيغۇر قېرىنداشلارنىڭ كۈچلۈك تەلىپىگە ئاساسەن، ئەنگلىيە ئۇيغۇر جەمئىيىتىنىڭ خىزمەتلىرىنى تېخىمۇ كۈچلەندۈرۈش، تەشكىلاتنى قايتىدىن تەرتىپكە سېلىش ۋە يېڭى رەھبەرلىك ئاپپاراتىنى سايلاپ چىقىشقا رىياسەتچىلىك قىلىش مەقسىتىدە د ئۇ ق  رەئىسى رابىيە خانىمنىڭ تاپشۇرۇقى بىلەن د ئۇ ق مۇئاۋىن رەئىسى ئەسقەرجان بىلەن باش كاتىپ دولقۇن ئەيسا 2010-يىلى 7-ئاينىڭ 17-18 كۈنلىرى  لوندوندا، ئەنگلىيە ئۇيغۇر جەمئىيىتىنىڭ يىغىنىغا  قاتناشتى.

تەپسىلاتى...

رابىيە قادىر خانىمنىڭ قىزى راھىلە خانىم تەيۋەندە قىزغىن ئالقىشقا ئېرىشتى

ر ف ئا خەۋىرى
2010-يىلى 07-ئاينىڭ 20-كۈنى

دۇنيا ئۇيغۇر قۇرۇلتىيىنىڭ رەىسى رابىيە قادىر خانىمنىڭ قىزى راھىلە خانىم، مۇشۇ ئاينىڭ 18 – كۈنىدىن بۇيان تەيۋەندە زىيارەتتە بولماقتا. راھىلە خانىم، تەيۋەندىكى” ئاي تۇغدى” كىشىلىك ھوقۇق تەشكىلاتىنىڭ، رابىيە قادىر خانىم ھەققىدە ئىشلىگەن ” مۇھەببەتنىڭ 10 شەرتى “ناملىق ھۆججەتلىك فىلىم ۋە شۇنىڭدەك 5 – ئىيۇل نارازىلىق نامايىشىنىڭ بىر يىللىقى مۇناسىۋىتى بىلەن ئۇيۇشتۇرۇلغان پاالىيەتلەرگە قاتنىشىش ئۈچۈن ئالاھىدە تەكلىپ بىلەن تەيۋەڭە بارغان.

تەيۋەن ھۆكۆمىتى رابىيە قادىر خانىمنىڭ 3 يىلغىچە تەيۋەڭە كېلىشىنى چەكلىگەن بولۇپ، مەتبۇاتلارغا بۇ ھەقتە ئۆز قارىشىنى بىلدۈرگەن راھىلە خانىم مۇنداق دېگەن”: تەيۋەن دېموكراتىك بىر دۆلەت، ئۇنىڭ ئۈستىگە مەن تەيۋەن خەلقىنىڭ كۆپىنچىسىنىڭ ئەركىنلىكتىن ۋاز كېچىشنى خالىمايدىغان، دېموكراتىيىنى ۋە ھەقىقەتنى ياقلايدىغان بىر خەلق ئىكەنلىكىنى كۆردۈم، شۇڭا ئىشىنىمەن، دالاي لاماغا ۋە ئانامغا بىر كۈنى چوقۇم تەيۋەڭە كېلىش نېسىپ بولىدۇ”.

تەپسىلاتى...

تەيۋەنلىكىلەر رابىيە خانىمنىڭ قىزىنىڭ تەيۋەن زىيارىتى توغرىسىدا

ر ف ئا خەۋىرى
2010-يىلى 07-ئاينىڭ 20-كۈنى

تەيۋەندە تۇرۇشلۇق مۇستەقىل مۇلاھىزىچى لىن باۋخۇانىڭ خانىمى، دۇنيا ئۇيغۇر قۇرۇلتىيىنىڭ رەىسى رابىيە قادىر خانىمنىڭ قىزى راھىلەنىڭ تەيۋەن زىيارىتى ھەققىدىكى ھېسسياتىنى ۋە تەيۋەنلىكلەرنىڭ ئىنكاسىنى بايان قىلدى.

دۇنيا ئۇيغۇر قۇرۇلتىيىنىڭ رەىسى رابىيە قادىر خانىمنىڭ قىزى راھىلەنىڭ تەيۋەن زىيارىتى ھەققىدە، تەيۋەندىكى مۇستەقىل تەتقىقاتچى لىن باۋخۇانىڭ خانىمى ياڭ يۆچىڭ ئۆزىنىڭ ھېسسياتىنى ۋە تەيۋەنلىكلەرنىڭ بۇ ھەقتىكى ئىنكاسىنى بايان قىلدى.

شىنخۇا ئاگېنتلىقىنىڭ تەيۋەن زىيالىيلىرى تەيۋەننى بۆلگۈنچىلەرنىڭ ھەرىكەت مەيدانى قىلمايمىز دېدى دېگەن خەۋىرى بىر ئىغۋا

ياڭ يۆچىڭ خانىم ئالدى بىلەن، كوممۇنىست خىتاينىڭ شىنخۇا ئاگېنتلىقى بۈگۈن تەيۋەن رابىيە قادىرنىڭ زىيارىتىنى رەت قىلدى، تەيۋەن زىيالىيلىرى تەيۋەننى بۆلگۈنچىلەرنىڭ ھەرىكەت مەيدانى قىلمايمىز دېدى دەپ خەۋەر ئېلان قىلغانلىقى ھەققىدە توختالدى. ئۇنىڭ بايان قىلىشىچە، تەيۋەندە مىڭلىغان، ئونمىڭلىغان زىيالىي بار، بۇلارنىڭ كۆپىنچىسى كىشىلىك ھوقۇق، ئەركىنلىك، دېموكراتىيە ۋە ھەققانىيەتنى قوللايدىغان كىشىلەر، تەيۋەندە گومىنداڭغا بېقىنىپ، كوممۇنىست پارتىيىگە خۇشامەت قىلىپ جان باقىدىغان زىيالىيلارمۇ بار. شىنخۇا ئاگېنتلىقى بۇ گەپنى كىم دېگەنلىكىنى كۆرسىتىپ بېرەلمىدى، دېمەك بۇ خەۋەرنىڭ ئۆزى بىر ئىغۋا.

تەيۋەنلىكلەر رابىيە قادىرنى داھى دەپ قارايدۇ

تەپسىلاتى...

گېرمانىيە ئۇيغۇر ئانسامبىلى دۇنيا مەدەنىيەتلەر فېستىۋالىغا قاتناشتى

ياۋروپا شەرقىي تۈركىستان بىرلىكى تەشۋىقات بۆلۈمى
2010-يىلى 7-ئاينىڭ 20-كۈنى

د ئۇ ق تەركىبىدىكى ياۋروپا شەرقىي تۈركىستان بىرلىكى تەشكىلاتى تەرىپىدىن تەسىس قىلىنغان  گېرمانىيە ئۇيغۇر ئانسامبىلى، 7 – ئاينىڭ 18 – كۈنى ئالاھىدە تەكلىپ بىلەن گېرمانىيىنىڭ ئاۋگبۇرگ شەھىرىدە ئۆتكۈزۈلگەن دۇنيا مەدەنىيەتلەر فېستىۋالىدا ماھارەت كۆرسىتىپ،فېستىۋالغا قاتناشقان مىڭلىغان ئاممىنىڭ كۈچلۈك ئالقىشىغا سازاۋەر بولدى.

بولۇپمۇ ئۇيغۇر ئۆسمۈرلىرى تەرىپىدىن يۇقىرى ماھارەت بىلەن ئورۇنلانغان  دولان ئۇسۇلى تاماشىبىنلارنى ھەيران قالدۇردى.

بۇ قېتىمقى فېستىۋالدا ئەڭ كۆپ ئالقىشقا ئېرىشكەنلەر گېرمانىيە ئۇيغۇر ئانسامبىلىنىڭ ئارتىسلىرى بولدى ۋە ئۆسمۈرلىرىمىز فېستىۋالدا 8 قېتىم سەھنىگە چىقىپ، ئۇيغۇر خەلقىنىڭ نەپىس، گۈزەل ۋە جانلىق ئۇسۇلىنى تولۇق نامايان قىلدى ۋە ” ئۇيغۇر ” دېگەن بۇ ئىسىمنى مىڭلىغان گېرمان تاماشىبىننىڭ قەلبىگە چوڭقۇر سىڭدۈردى.

تەپسىلاتى...