د ئۇ ق رەھبەرلىرى گوللاندىيەدە «يەر شارى كىشىلىك ھوقۇق ھىمايىچىلىرى» بىلەن بىرگە خىتايغا قارشى پائالىيەتلەرنى ئۆتكۈزدى

خەۋەر مەنبەسى: ئەركىن ئاسىيا

«يەر شارى كىشىلىك ھوقۇق ھىمايىچىلىرى» ناملىق تەشكىلات د ئۇ ق بىلەن بىرلىشىپ ئۆتكۈزگەن ئاخبارات ئېلان قىلىش يىغىنىدا د ئۇ ق رەئىسى دولقۇن ئەيسا ئەپەندى گوللاندىيەدە پاناھلىنىۋاتقان لاگېر شاھىتلىرىدىن قەلبىنۇر سىدىق خانىمغا «قەھرىمان» لىق مۇكاپاتىنى تەقدىم قىلغان. 2021-يىلى 5-ئاپرېل، گوللاندىيە.

د ئۇ ق گوللاندىيەدە خىتايغا قارشى نامايىش، ئاخبارات ئېلان قىلىش يىغىنى ۋە لاگېر شاھىدلىرىنى مۇكاپاتلاش قاتارلىق پائالىيەتلەرنى ئۆتكۈزدى.

«يەر شارى كىشىلىك ھوقۇق ھىمايىچىلىرى» ناملىق تەشكىلاتنىڭ تەكلىپى بىلەن د ئۇ ق رەئىسى دولقۇن ئەيسا، قۇرۇلتاينىڭ پروگرامما يېتەكچىسى زۇمرەت ئۇيغۇر 5-ئاپرىل گوللاندىيەگە بېرىپ، د ئۇ ق نىڭ گوللاندىيەدىكى ۋەكىللىرىدىن زەينىدىن تۇرسۇن قاتارلىقلار بىلەن بىرگە گوللاندىيەنىڭ ھاگا شەھرىدە خىتاينىڭ 2022-يىللىق بېيجىڭ قىشلىق ئولىمپىك مۇسابىقىسىنى بايقۇت قىلىش، خىتاينىڭ ئۇيغۇرلار ئۈستىدىن يۈرگۈزۈۋاتقان ئىرقىي قىرغىنچىلىقلىرىغا نارازىلىق بىلدۈرۈش يۈزسىدىن خىتايغا قارشى نامايىش ئۇيۇشتۇرۇش، ئاخبارات ئېلان قىلىش يىغىنى ئۆتكۈزۈش ۋە لاگېر شاھىدلىرىنى مۇكاپاتلاش قاتارلىق بىر يۈرۈش پائالىيەتلەرنى ئېلىپ بارغان.

د ئۇ ق رەئىسى دولقۇن ئەيسا ئەپەندىنىڭ بۈگۈن ھاگا شەھرىدىن بەرگەن مەلۇماتلىرىغا قارىغاندا، «يەر شارى كىشىلىك ھوقۇق ھىمايىچىلىرى» ناملىق تەشكىلات ئالدىنقى ئايدا گوللاندىيە ھۆكۈمىتىنىڭ ئۇيغۇرلار توغرىسىدا «ئىرقىي قىرغىچىلىق» قارارىنى قوبۇل قىلىشىغا بەلگىلىك ھەسسە قاتقان تەسىرى زور خەلقئارالىق كىشىلىك ھوقۇق تەشكىلاتى ئىكەن.

تەپسىلاتى...

تور ھۇجۇمى سەۋەبلىك كېچىكتۈرۈلگەن ئۇيغۇرلار ھەققىدىكى گۇۋاھلىق بېرىش يىغىنى كېلەر ھەپتە بېلگىيە پارلامېنتىدا ئۆتكۈزۈلىدۇ

خەۋەر مەنبەسى: ئەركىن ئاسىيا

ھازىر گوللاندىيەدە ياشاۋاتقان لاگېر شاھىدلىرىدىن قەلبىنۇر سىدىق بېلگىيە ئۇيغۇر جەمئىيىتىنىڭ تەكلىپى بىلەن بېلگىيە پارلامېنتىدا ئۆتكۈزۈلمەكچى بولغان خىتاينىڭ ئۇيغۇر دىيارىدىكى جازا لاگېرلىرى توغرىسىدا گۇۋاھلىق بېرىش يىغىنىغا قاتنىشىش ئۈچۈن بارغان. ھالبۇكى، تۇيۇقسىز يۈز بەرگەن تور خاككېرلىرىنىڭ ھۇجۇمى سەۋەبلىك تور كېسىلىپ، بۇ پائالىيەت ئەمەلدىن قالغان ۋە كېلەر ھەپتىدە ئۆتكۈزۈلىدىغان بولغان.

4-ماي كۈنى بېلگىيە ھۆكۈمەت تورىنى تەمىنلىگۈچى شىركەت كەڭ دائىرىلىك DDoS (تارقاق شەكىللىك تور مۇلازىمىتىنى رەت قىلىش) ھۇجۇمىغا ئۇچرىغانلىقى سەۋەبلىك خىتاينىڭ ئۇيغۇرلار ئۈستىدىن يۈرگۈزىۋاتقان سىياسەتلىرىنى «ئىرقىي قىرغىنچىلىق» دەپ بېكىتىش توغرىلىق ئۆتكۈزۈلمەكچى بولغان گۇۋاھلىق بېرىش يىغىنى، شۇنداقلا باشقا بارلىق يىغىنلارنىڭ بىكار قىلىنغانلىقى خەۋەر قىلىنغان.

تەپسىلاتى...

يېڭى زېلاندىيە پارلامېنتى خىتاينىڭ ئۇيغۇرلارغا تۇتقان مۇئامىلىسىنى «ئېغىر كىشىلىك ھوقۇق دەپسەندىچىلىكى» دەپ قارىدى

خەۋەر مەنبەسى: ئەركىن ئاسىيا

يېڭى زېلاندىيە پارلامېنتى 4- ۋە 5-ماي كۈنلىرى خىتاينىڭ ئۇيغۇرلارغا تۇتقان مۇئامىلىسىنى «ئىرقىي قىرغىنچىلىق» دەپ ئېتىراپ قىلىش توغرىسىدىكى بىر قارار لايىھەسىنى ئىككى كۈن مۇنازىرە قىلىپ، ئاخىرى بىردەك ئاۋاز بىلەن خىتاينىڭ قىلمىشىنى «ئېغىر كىشىلىك ھوقۇق دەپسەندىچىلىكى» دەپ ئېلان قىلغان.

5-ماي يېڭى زېلاندىيە پارلامېنتىدىكى ھاكىمىيەت بېشىدىكى «ئەمگەكچىلەر» پارتىيەسىنى ئۆز ئىچىگە ئالغان بارلىق پارتىيەلەرنىڭ بىردەك قوللىشى بىلەن ماقۇللانغان قارار لايىھىسى خىتايدا ئۇيغۇرلارغا قارشى «ئېغىر كىشىلىك ھوقۇق دەپسەندىچىلىكى» يۈز بېرىۋاتقانلىقىنى ئېلان قىلىپلا قالماي، «ھۆكۈمەتنى ئالاقىدار خەلقئارا قانۇنلاردىكى قوراللارنى ئىشقا سېلىپ، بۇ دەپسەندىچىلىككە خاتىمە بېرىشكە» چاقىرغان.

تەپسىلاتى...

خىتاي دائىرىلىرى ئۇيغۇر رايونىدىكى مەجبۇرىي ئەمگەك ۋە بالىلارنىڭ خورلىنىشىغا قارىتا ئۆزىنى ئاقلاش تەشۋىقاتىنى كۈچەيتكەن

خەۋەر مەنبەسى: ئەركىن ئاسىيا

بۇ يىل كىرگەندىن بۇيان خەلقئارادا خىتاينىڭ ئۇيغۇرلارغا قارىتا ئىرقىي قىرغىنچىلىق يۈرگۈزۈۋاتقانلىقى ھەققىدىكى ئەيىبلەشلەر ۋە جازا تەدبىرلىرى كۈچەيدى. ئۇيغۇرلار ئۇچراۋاتقان «ئىرقىي قىرغىنچىلىق» ۋە «مەجبۇرىي ئەمگەك» كە چېتىشلىق خىتاي ئەمەلدارلىرى ۋە خىتاي شىركەتلىرىگە قارىتا تۈرلۈك جازا تەدبىرلىرى ئېلان قىلىندى.

ئامېرىكا قاتارلىق غەرب دۆلەتلىرىنىڭ ئەيىبلىشى ۋە جازا تەدبىرلىرىگە قارىتا خىتاي دائىرىلىرىمۇ ئۆزىنىڭ ئۇيغۇرلار ئۈستىدىن يۈرگۈزۈۋاتقان باستۇرۇشلىرىنى ئىنكار قىلىش ۋە يوشۇرۇش تەشۋىقات دولقۇنىنى قوزغاۋاتقانلىقى بىلدۈرۈلمەكتە.

بۇ ھەقتىكى خەۋەرلەر ۋە ۋەزىيەت ئانالىزچىلىرىنىڭ كۆرسىتىشىچە، بۇ دولقۇننىڭ ئاساسىي نىشانى ھازىرغا قەدەر ئاشكارىلانغان، ئۇيغۇرلارغا مۇناسىۋەتلىك پۈتكۈل پاكىتلارنى يوققا چىقىرىشنى نىشان قىلغان.

تەپسىلاتى...

G7 يىغىنىدا ئۇيغۇرلار مەسىلىسى ۋە خىتاينى ئورتاق جازالاش مۇھىم تېما بولدى

خەۋەر مەنبەسى: ئەركىن ئاسىيا

لوندوندا چاقىرىلغان G7 يىغىنىدا ئۇيغۇرلار مەسىلىسى ۋە خىتاينى ئورتاق جازالاش تېمىسى يىغىننىڭ يادرولۇق كۈنتەرتىپلىرىنىڭ بىرىگە ئايلاندى.

3-ماي ئەنگلىيە پايتەختى لوندوندا G7، يەنى «تەرەققىي قىلغان 7 دۆلەت» نىڭ تاشقى ئىشلار مىنىستىرلىرىنىڭ يىغىنى باشلانغان. بۇ 2019-يىلىدىن بۇيان 7 دۆلەت رەھبەرلىرىنىڭ تۇنجى قېتىم بىر ئارىغا كېلىپ يۈزتۇرانە سۆھبەتلىشىشى بولۇپ ھېسابلىنىدىكەن. خىتاي، رۇسىيە، سۈرىيە ۋە كورۇنا ۋىرۇسى مەسىلىسى 3 كۈن داۋاملىشىدىغان مەزكۇر يىغىننىڭ ئاساسلىق كۈنتەرتىپىنى تەشكىل قىلغان بولسىمۇ، 4-ماي كۈنىگە كەلگەندە ئۇيغۇرلار مەسىلىسى ۋە خىتاينى ئورتاق جازالاش تېمىسى يىغىننىڭ يادرولۇق كۈنتەرتىپىنى ئىگىلىگەن.

تەپسىلاتى...

ئۈرۈمچىدىكى لاگېر ۋە يېقىن ئەتراپتىكى گۇمانلىق ئورۇنلار سىستېمىلىق بىر گەۋدىمۇ؟(3)

خەۋەر مەنبەسى: ئەركىن ئاسىيا

نورۋېگىيەدىكى «ئۇيغۇر ئەدلىيە ئارخىپى» نىڭ مەسئۇلى بەختىيار ئۆمەر ئەپەندىنىڭ كۈزىتىشىچە، 燕儿窝片区 يەنى قارلىغاچلىق مەھەللە رايونى تەۋەسىدە ھەربىي گازارمىغا يانداش سېلىنغان بىرلا لاگېر بولۇپ قالماستىن بۇ رايوندا خوڭيەنچى كۆلىگە يېقىن جايدا يەنە بىر لاگېر بارلىقى مەلۇم بولغان. 2017-يىلىدىن باشلاپ 2020-يىلىنىڭ ئاخىرغىچە بولغان گوگول خەرىتىسى ۋە سۈنئىي ھەمراھ سۈرەتلىرىنى سېلىشتۇرغاندا، «خوڭيەن كىيىم-كىچەك باغچىسى» دەپ يېزىلغان بۇ جاينىڭ 2018-يىلىدا، ئەسلى بىر لاگېر تۈسىنى ئالغان ئىچ ۋە سىرتقى قورشاۋ تاملىرى بولغان، ئېگىز كۆزىتىش مۇنارلىرى بار لاگېر ئىكەنلىكىنى ئېنىق پەرق ئەتكىلى بولىدىكەن.

ئەمما 2020-يىلى ئاۋغۇستتىن كېيىن بۇ لاگېرنىڭ تاملىرى ئۈستىدىكى تىكەنلىك سىم-توسۇقلار ئېلىۋېتىلىپ، قورشاۋ تام ئوتتۇرىسىدىكى 5 قەۋەتلىك بىناغا «خوڭيەن كىيىم-كىچەك باغچىسى» لوزۇنكىسى ئېسىلغانلىقى ئېنىق كۆرۈنگەن. ئۇنىڭ ئېيتىشىچە بۇ لاگېرنىڭ مەجبۇرىي ئەمگەك ئورنى قىلىپ ئۆزگەرتىلگەن بولۇش ئېھتىماللىقى چوڭ ئىكەن.

تەپسىلاتى...

سۈبھى مەمەت: «كىشەنلەنگەن كىشى مېنىڭ دادام»

خەۋەر مەنبەسى: ئەركىن ئاسىيا

«ئىككى يۈزلىمىچى» لەرگە زەربە بېرىش دولقۇنىدا تۇتقۇن قىلىنغان ئورمانچىلىق نازارىتىنىڭ سابىق نازىرى مەمەت ئابدۇللا سوتلانماقتا. 2019-يىلى. ئۈرۈمچى.

خىتاي ھۆكۈمىتى ئۇيغۇر ئېلىدا 2017-يىلىدىن بېرى «ئىككى يۈزلىمىچىلەرگە قارشى تۇرۇش» دېگەن نام ئاستىدا نۇرغۇن ئۇيغۇر ئەمەلدارلىرىنى تۇتقۇن قىلغان ئىدى. ئۇيغۇر ئاپتونوم رايونلۇق ئورمانچىلىق نازارىتىنىڭ سابىق نازىرى مەمەت ئابدۇللا بۇ دولقۇندا تۇتقۇن قىلىنغانلىقى دەلىللەنگەن يۇقىرى دەرىجىلىك ئۇيغۇر ئەمەلدارلارنىڭ بىرى.

مەمەت ئابدۇللانىڭ ئامېرىكادا تۇرۇشلۇق قىزى سۈبھىنىڭ بىلدۈرۈشىچە، دادىسى مەمەت ئابدۇللا 2017-يىلى 29-ئاپرېل ئامېرىكاغا كېلىش سەپىرىنىڭ ئالدىدا خىتاي دۆلەت خەۋپسىزلىكى ئىدارىسىنىڭ خادىملىرى تەرىپىدىن تۇتۇپ كېتىلگەن. شۇنىڭدىن كېيىن ئۇ دادىسنىڭ ئەھۋالدىن ھېچقانداق خەۋەر ئالالمىغان بولۇپ، يېقىندا ئاپىسى ۋە ھەدىسى پەقەت تېلېفون ئارقىلىق كۆرۈشتۈرۈلگەن.

سۈبھى مەمەت بۇ ھەقتە رادىيومىزنىڭ زىيارىتىنى قوبۇل قىلىپ مۇنداق دېدى: «گەرچە ئاپام ماڭا ‹دادىڭىزنىڭ ئاۋازىنى ئاڭلىدىم، دادىڭىز ھاياتكەن، › دېگەن بولسىمۇ، ئەمما ئىشەنگۈم كەلمىدى.»

تەپسىلاتى...

بېرلىننىڭ مەخپىي ھۆججىتىدە «بىر بەلۋاغ، بىر يول» قۇرۇلۇشىغا قارشى تۇرۇش ئوتتۇرىغا قويۇلغان

خەۋەر مەنبەسى: ئەركىن ئاسىيا

گېرمانىيە تاشقىي ئىشلار مىنىستېرلىكىنىڭ مەخپىي ھۆججىتىدە ياۋروپا ئىتتىپاقىنىڭ «بىر بەلۋاغ، بىر يول» قۇرۇلۇشىغا ئورتاق قارشى تۇرۇشى لازىملىقى جىددىي تەشەببۇس قىلىنغان.

«گېرمانىيە دولقۇنلىرى» رادىيوسىنىڭ 3-مايدىكى «ياۋروپا، كۆزۈڭنى يوغان ئاچ!» ناملىق خەۋىرىدە بايان قىلىنىشىچە، گېرمانىيەدە نەشىردىن چىقىدىغان «سودا گېزىتى» گېرمانىيە تاشقىي ئىشلار مىنىستېرلىكىنىڭ بىر مەخپىي ھۆججىتىنى قولغا چۈشۈرگەن. ھۆججەت بۇ يىل 4-ئاينىڭ 21-كۈنى ھازىرلانغان. ھۆججەتتە بېرلىننىڭ ياۋروپادىكى تەسىر كۈچى كۈنسېرى زورىيىۋاتقان خىتايدىن ئەمدى ئەندىشىگە چۈشكەنلىكى، خىتاينىڭ «بىر بەلۋاغ، بىر يول» قۇرۇلۇشىدىن ياۋروپا كارخانىلىرىنىڭ ھىېچقانداق مەنپەئەتكە ئېرىشەلمەيدىغانلىقى، ياۋروپا ئىتتىپاقىنىڭ جىددىي ھەرىكەتكە ئۆتۈپ، خىتاينىڭ «بىر بەلۋاغ، بىر يول» قۇرۇلۇشىغا قارشى بىرلىككە كەلگەن ئىستراتېگىيەلىك تەدبىر ئېلىشى لازىملىقى تەشەببۇس قىلىنغان.

تەپسىلاتى...

ئۇيغۇر ئېلىدە ياشىغان كانادالىق ئائىلە: 2017-يىلىدىن باشلاپ ھەممە يەرنى ۋەھىمە قاپلىدى

خەۋەر مەنبەسى: ئەركىن ئاسىيا

كانادا كىشىلىك ھوقۇق مۇزېيى بىلەن بىرلىكتە «خىتايدىكى ئۇيغۇر ئىرقىي قىرغىنچىلىقى» ماۋزۇلۇق يىغىن تەشكىللىگەن كانادالىق ئەر-ئايال ئاندىرىيا(Andrea) ۋە گەررىي دىيك(Gary Dyck).

يېقىندا كانادالىق ئەر-ئايال ئاندىرىيا ۋە گەررىي دىيك كانادا كىشىلىك ھوقۇق مۇزېيى بىلەن بىرلىكتە «خىتايدىكى ئۇيغۇر ئىرقىي قىرغىنچىلىقى» ماۋزۇلۇق بىر يىغىن تەشكىللىگەن ئىدى. بۇ يىغىندا ئۇلار تەتقىقاتچى ئادرىيان زېنز ۋە ئۇيغۇر پائالىيەتچى مەمەت توختى ئەپەندىلەر بىلەن بىرلىكتە ئۇيغۇرلارغا قارىتىلىۋاتقان ئىرقىي قىرغىنچىلىق ھەققىدە دوكلات سۇنغان.

بىز ئۇيغۇر ئېلىدە 2008-يىلىدىن 2018-يىلىغىچە 10 يىل ياشىغان ۋە ئۆزلىرىنىڭ سۆزى بويىچە ئىرقىي قىرغىنچىلىقنىڭ دەسلەپكى يىللىرىغا شاھىت بولغان بۇ كانادالىق ئائىلىنى زىيارەت قىلدۇق. گەررىي ۋە ئاندىرىيا دىيك ئائىلىسى دەسلەپكى 5 يىلدا ئۈرۈمچى كەسپىي ئۇنۋېرسىتىتىدا ئۇيغۇرچە ۋە خىتايچە ئۆگەنگەن. 2014-يىلى تۇرپانغا كۆچۈپ بېرىپ ئورگانىك ئوغۇت تىجارىتى بىلەن شۇغۇللانغان. ئۇلار ئۇيغۇر دېھقانلار بىلەن بىرلىشىپ ئورگانىك ئوغۇت ياساپ، ئۈزۈم سورتىنى ياخشىلاپ مول ھوسۇل ئالغان. ئەمما رايوندىكى چېكىدىن ئاشقان بىخەتەرلىك تەدبىرلىرى، چەكلىمىلەر، كەڭ كۆلەملىك تۇتقۇن ئۇيغۇرلارغا بولغىنىدەك ئۇلارنىڭمۇ ھاياتىنى قېيىنلاشتۇرغانلىقتىن، 2018-يىلى كاناداغا قايتىپ كەلگەن.

بىز بۇ چەكلىمىلەردە بىر شۇملۇق بارلىقىنى ھېس قىلدۇق

ئاندرىيا: ئۇ يەردە ياشاشنىڭ بىز ۋە ئەتراپىمىزدىكىلەر ئۈچۈن قىيىنلىشىۋاتقانلىقىنى ھېس قىلدۇق. ئەتراپىمىزدىكى ئۇيغۇرلار بىر-بىرلەپ لاگېرغا تۇتۇلۇپ كېتىۋاتاتتى. ئۇيغۇرلار ھەتتا بىز بىلەن كۆرۈشكەنلىكى ئۈچۈنمۇ لاگېرغا تۇتۇلۇشى مۇمكىنتى. شۇڭا بىز ئەتراپىمىزدىكى دوستلىرىمىزغا ئاۋارىچىلىك تۇغدۇرماسلىقىمىز كېرەكلىكىنى ھېس قىلدۇق، ئۇ يەردە بولۇۋاتقانلارنى كۆرۈپ تۇرۇش بىزگىمۇ بەك قىيىنغا توختىدى، شۇڭا بالىلىرىمىز ئۈچۈن قايتىپ كېتىشنى قارار قىلدۇق.

تەپسىلاتى...

ئۈرۈمچىدىكى لاگېر ۋە يېقىن ئەتراپتىكى گۇمانلىق ئورۇنلار سىستېمىلىق بىر گەۋدىمۇ؟

خەۋەر مەنبەسى: ئەركىن ئاسىيا

نورۋېگىيەدىكى «ئۇيغۇر ئەدلىيە ئارخىپى» ناملىق تەتقىقات مەركىزىنىڭ خادىملىرى ئۈرۈمچى شەھىرىنىڭ تەڭرىتاغ رايونىغا جايلاشقان خوڭيەنچى سۇ ئېلېكتر ئىستانسىسى ۋە ئۇنىڭ يۇقىرى تەرىپىدىكى لىنىيە بويىچە دائىرىدىكى جايلاشقان گۇمانلىق ئورۇنلارنىڭ سۈنئىي ھەمراھ سۈرەتلىرىنى بىر مەزگىللىك كۆزىتىپ تەكشۈرۈش جەريانىدا، نۇرغۇن گۇمانلىق نۇقتىلارنى بايقىغان ئىكەن. مەزكۇر ئورۇننىڭ مەسئۇلى بەختىيار ئۆمەر ئەپەندىنىڭ بايان قىلىشىغا قارىغاندا، ئۈرۈمچى 310-يول قاتناش ئاپتوبۇسىنىڭ قارلىغاچلىق يولى ئاخىرقى بېكىتىگە جايلاشقان ھەربىي گازارمىغا يانداش، قورشاۋغا ئېلىنغان بىر لاگېر بايقالغان. ئۇنىڭ ئىچىدىكى رەت-رەت بىنالار ۋە قورشاۋ تام، كۆزىتىش مۇنارلىرى، مەيدان قاتارلىق نۇقتىلار ۋە سۈنئىي ھەمراھ سۈرەتلەردە ئىپادىلەنگەن نۇرغۇن نۇقتىلار، ھەربىي گازارمىغا يانداش سېلىنغان بۇ قۇرۇلۇشلارنىڭ لاگېر ئىكەنلىكىنى ئېنىق كۆرسىتىپ بېرىدىكەن.

لاگېردىن باشقا نۇرغۇن گۇمانلىق ئورۇنلار بىر دائىرىگە ئورۇنلاشقان

تەڭرىتاغ رايونىدىكى بۇ لاگېرنىڭ 3 كىلومېتىر ئەتراپىدىكى دائىرىدە سۈنئىي ھەمراھ سۈرەتلىرىدىن بايقالغان مۇھىم نۇقتىلارنى ساناپ ئۆتكەن بەختىيار ئەپەندىنىڭ چۈشەندۈرۈشىچە، بىر قۇرۇلۇش بۇيۇملىرى زاۋۇتى مەزكۇر لاگېرنىڭ ئورنى بىلەن ئىنتايىن يېقىن. ھەربىي گازارما، قەبرىستانلىق، قۇرۇلۇش ماتېرىياللىرى ئورنى 1 كىلومېتىر دائىرە ئىچىگە جايلاشقان. كىشىدە گۇمان قوزغايدىغىنى ئۇنىڭ 50 مېتىر نېرىسىدا يەنە ئۈرۈمچى شەھىرى جامائەت خەۋپسىزلىكى ئىدارىسىنىڭ ئەدلىيەلىك ئاناتومىيە تەجرىبىخانىسى (乌鲁木齐市公安局法医解剖室) بارلىقى مەلۇم بولغان.

تەپسىلاتى...