500 دىن ئارتۇق كىشى لوندوندىكى خىتاي ئەلچىخانىسى ئالدىدا نامايىش ئۆتكۈزگەن

خەۋەر مەنبەسى: ئەركىن ئاسىيا

ئەنگلىيەدىكى تولۇق ئوتتۇرا مەكتەپ ئوقۇغۇچىلىرى قۇرغان «بىر دۇنيا ھەرىكىتى» تەشكىلاتىنىڭ ئۇيۇشتۇرۇشى بىلەن 1-ئاينىڭ 19-كۈنى خىتاينىڭ لوندوندا تۇرۇشلۇق ئەلچىخانىسى ئالدىدا نامايىش ئۆتكۈزۈلگەن.

ئۇيغۇرلار، تىبەتلىكلەر ۋە خوڭكوڭلۇقلارنى قوللاش مۇناسىۋىتى بىلەن ئۆتكۈزۈلگەن بۇ نامايىشنىڭ مەقسىتى خىتاينىڭ تىبەتتە، ئۇيغۇر دىيارىدا ۋە خوڭكوڭدا ئېلىپ بېرىۋاتقان ۋەھشىيانە باستۇرۇش سىياسىتىنى پاش قىلىشتىن ئىبارەت ئىكەن.

نامايىشقا بۇرۇن ئۇيغۇرلار ئۈچۈن نامايىشقا قاتنىشىپ باقمىغان نۇرغۇن كىشىلەر بولۇپ، 500 ئەتراپىدا كىشى ئىشتىراك قىلغان. ئۇلار قوللىرىدا ئاي-يۇلتۇزلۇق كۆك بايراق ۋە لوزۇنكىلارنى كۆتۈرگەن ھالدا «ئۇيغۇرلارغا ئەركىنلىك، خىتاي جازا لاگېرلىرىنى تاقىسۇن، خىتايلار شەرقىي تۈركىستاندىن چىقىپ كەتسۇن، خىتاي ئۇيغۇرلارغا ئېلىپ بېرىۋاتقان ئىرقىي قىرغىنچىلىقنى توختاتسۇن!» دېگەندەك شوئارلارنى توۋلاشقان.

تەپسىلاتى...

قارامايدىكى لاگېردىن قويۇپ بېرىلگەن پولات ئىبراھىمنىڭ 10 كۈندىن كېيىن جان ئۈزگەنلىكى ئىلگىرى سۈرۈلمەكتە

خەۋەر مەنبەسى: ئەركىن ئاسىيا

ھازىر ئىستانبۇلدا ياشاۋاتقان مۇنەۋۋەر خانىم يولدىشى پولات ئىبراھىمنىڭ قارامايدىكى لاگېردىن دوختۇرخانىغا ئېلىپ چىقىلىپ 20 كۈن داۋالىتىلغانلىقى، ئاخىرىدا ئۆيىگە قويۇپ بېرىلىپ، 10 كۈندىن كېيىن تۇيۇقسىز ئۆلۈپ كەتكەنلىكىنى بىلدۈردى.

مۇنەۋۋەر خانىم يەنە ئائىلىسىدىن 3 ئىنىسى ۋە 2 سىڭلىسىنى ئۆز ئىچىگە ئالغان بىرمۇنچە تۇغقانلىرىنىڭ لاگېرغا قامالغانلىقىنى ئاشكارىلىدى.

ئەسلى قاراماي شەھىرىدىن بولغان مۇنەۋۋەر ئابلىمىت خانىم ئائىلىسىدىكىلەرنىڭ ھەممىسىنىڭ ئىشچى-خىزمەتچى ئىكەنلىكىنى، دادىسى ئابلىمىت ھاجىم بىلەن ئانىسى ئايىمنىسا خانىمنىڭ ئىلگىرى ھەج پەرزنى ئادا قىلغانلىقىنى، ئۇلارنىڭ كۈندە بەش ۋاق ناماز ئوقۇغاندىن باشقا ھېچقانداق گۇناھى يوقلۇقىنى، بىراق خىتاي دائىرىلىرىنىڭ ئۇلارنىڭ ئائىلىسى «دىنىي ئائىلە» دەپ ئانىسىدىن باشقا پۈتكۈل ئائىلە ئەزالىرىنى تۇتۇپ كەتكەنلىكىنى بىلدۈردى.

مۇنەۋۋەر خانىمنىڭ بىر قىز، بىر ئوغۇل ئىككى پەرزەنتى بولۇپ، ئۇ پەرزەنتلىرىنى تۈركىيەدە ئوقۇتۇش ئۈچۈن 2015-يىلى 7-ئاينىڭ 11-كۈنى ئىستانبۇلغا كېلىپ ئورۇنلاشقان ئىكەن. مۇنەۋۋەر خانىم بالىلىرىنى ئىستانبۇلدا مەكتەپكە ئورۇنلاشتۇرۇپ قويۇپ ئىككى ئايدىن كېيىن قارامايغا قايتىپ كەتكەن. ئۇ قارامايغا قايتىپ بارغاندىن كېيىن ساقچىلار تەرىپىدىن بىر قانچە قېتىم سوراققا تارتىلغان. ۋەزىيەتتە ئۆزگىرىش بولۇپ، ھۆكۈمەت ئۇيغۇرلارنىڭ پاسپورتلىرىنى يىغىۋېلىشقا باشلىغاندا مۇنەۋۋەر خانىم 2016-يىلى 2-ئاينىڭ 19-كۈنى تۈركىيەگە قايتا كېلىۋالغان.

تەپسىلاتى...

«خىزمەت گۇرۇپپىسى» دىكى بىر خادىم: «ياشلارنى مىللەتلەر ئارا تويلىشىشقا رىغبەتلەندۈرىۋاتىمىز»

خەۋەر مەنبەسى: ئەركىن ئاسىيا

يېقىندا ئاڭلىغۇچىلىرىمىزدىن بىرى رادىيومىزغا ئۇچۇر يوللاپ، ئۆتكەن يىلىنىڭ ئوتتۇرىلىرى قاراقاش ناھىيەسىدە بىر سېستىرا قىزنىڭ بىر خىتاي بىلەن توي قىلىشقا مەجبۇرلانغانلىقى ۋە توينىڭ ئالدىدىكى ئۇچرىشىشتا خىتاي ئەركەكنى تىغلىق ئەسۋاپ بىلەن يارىلاندۇرۇپ نومۇسىنى قوغدىغانلىقىنى مەلۇم قىلغان ئىدى. مۇخبىرىمىزنىڭ بۇ ھەقتە ئېلىپ بارغان ئېنىقلاشلىرى داۋامىدا مەزكۇر ۋەقەنىڭ يۈز بەرگەن ياكى بەرمىگەنلىكىنى دەلىللەنمىدى، ئەمما قەشقەردىكى بىر يېزىدا «خىزمەت گۇرۇپپىسى» تەركىبىدە خىزمەت قىلىۋاتقان بىر خادىم ئۆزلىرىنىڭ كۈندىلىك خىزمەتلىرى داۋامىدا ئۇيغۇر ياشلىرىنى خىتايلار بىلەن توي قىلىشقا ئاشكارغا رىغبەتلەندۈرىۋاتقانلىقىنى ئاشكارىلىدى.

ھۆرمەتلىك رادىيو ئاڭلىغۇچىلار، يېقىندا ئۆزىنى ئاشكارىلاشنى خالىمىغان ۋە خوتەننىڭ قاراقاش ناھىيەسىدىن ئىكەنلىكىنى ئىلگىرى سۈرگەن بىر مۇھاجىر يۇرتدىكى تونۇشلىرىدىن ئاڭلىغانلىرىغا ئاساسەن قاراقاشتىكى بىر ئۇيغۇر سېستىرا قىز بىر خىتاي كادىر بىلەن توي قىلىشقا مەجبۇرلانغانلىقى ۋە توي قىلىشنىڭ ئالدىدىكى ئۇچرىشىشتا خىتاي ئەركەك ئۇنىڭغا ھېسسىيات جەھەتتىن زوراۋانلىق قىلغانلىقى ئۈچۈن تىغلىق ئەسۋاب تىقىپ يارىلاندۇرغانلىقىنى مەلۇم قىلغان ئىدى. ئۇ يەنە مەزكۇر كادىرنىڭ دوختۇرخانىدا داۋالاش ئۈنۈم بەرمەي جان ئۈزگەنلىكى ھەققىدىمۇ ئۇچۇرلار بارلىقىنى ئەسكەرتكەن ئىدى.

تەپسىلاتى...

شىۋېتسىيەدە جازا لاگېرلىرى توغرىلىق «نەق مەيدان گۇۋاھلىقى يىغىش» پائالىيىتى ئۆتكۈزۈلدى

خەۋەر مەنبەسى: ئەركىن ئاسىيا

مۇھاجىرەتتىكى ئۇيغۇرلار 2017-يىلىدىن ئېتىبارەن ئىجتىمائىي تاراتقۇلاردا خىتاينىڭ ئۇيغۇر دىيارىدا تەسىس قىلغان جازا لاگېرلىرىغا قامالغان ئاتا-ئانا، قەۋمى-قېرىنداشلىرى ۋە دوست-بۇرادەرلىرى توغرىلىق گۇۋاھلىق بېرىش پائالىيىتىنى باشلىغاندىن كېيىن 2018-2019-يىللىرى بۇ پائالىيەت يۇقىرى دولقۇن ھاسىل قىلغان ئىدى. 2020-يىلىنىڭ مۇقەددىمىسىدىمۇ گۇۋاھلىق بېرىش ھەرىكەتلىرى كەڭ قانات يېيىشقا باشلىدى.

جازا لاگېرلىرىدىكى تۇتقۇنلارنىڭ ئارخىپىنى تۇرغۇزۇش خىزمىتى بىلەن مەشغۇل بولۇپ كېلىۋاتقان مەركىزى نورۋېگىيەنىڭ ئوسلو شەھىرىدىكى «ئۇيغۇر ئەدلىيە ئارخىپى ئامبىرى» ھازىرغا قەدەر 5 مىڭدىن ئارتۇق ئۇيغۇرنىڭ ئارخىپىنى خاتىرىلەپ چىققان بولۇپ، يېقىندىن بۇيان بۇ ئورگان سىن كۆرۈنۈشلىرى ئارقىلىق گۇۋاھلىق بېرىش پائالىيىتىنى يولغا قويۇپ، توپلىغان گۇۋاھلىق كۆرۈنۈشلىرىنى ئىنگىلىزچە تىللارغا تەرجىمە قىلىپ ئېلان قىلماقتا ئىدى.

تەپسىلاتى...

ئۈچ تەشكىلاتنىڭ ۋەكىللىرى ئەنقەرەدە مۇھىم ئۇچرىشىشلار ئېلىپ باردى

خەۋەر مەنبەسى: ئەركىن ئاسىيا

دۇنيا ئۇيغۇر قۇرۇلتىيى، ئۇيغۇر ئاكادېمىيەسى ۋە ئەنقەرەدىكى ئۇيغۇر ئىنىستىتۇتى مەسئۇللىرىدىن تەركىپ تاپقان ھەيئەت تۈركىيەدە ھاكىمىيەت بېشىدىكى ئادالەت ۋە تەرەققىيات پارتىيەسى مۇئاۋىن باشلىقى جەۋدەت يىلماز، ئۆكتىچى پارتىيەلەردىن بىرى بولغان سائادەت پارتىيەسى رەئىسى تەمەل قاراموللائوغلۇ ئەپەندىلەر بىلەن ئۇچرىشىپ، ئۇيغۇرلارنىڭ ئېغىر ۋەزىيىتى بايان قىلىنغان «شەرقىي تۈركىستاندا ئىرقىي قىرغىنچىلىق»، «شەرقىي تۈركىستاندا ئىنسان ھەقلىرى دەپسەندىچىلىكى» ناملىق دوكلاتلىرىنى ۋە تۈركىيەدىكى ئۇيغۇرلارنىڭ قىيىنچىلىقى بايان قىلىنغان تەلەپ خېتىنى سۇندى. بىر سائەت داۋاملاشقان ئۇچرىشىشتىن كېيىن مىكروفونىمىزنى سائادەت پارتىيەسى باشلىقى تەمەل قاراموللائوغلىغا ئۇزاتتۇق. ئۇ، مۇنداق دېدى: «سىلەرنىڭ بىزگە مەلۇمات بەرگەنلىكىڭلارغا سۆيۈندۈم. ئاللاھ سىلەرگە يار بولسۇن. ھەقىقەتەن خىتاي ئېلىپ بېرىۋاتقان زۇلۇمنى ئەيىبلىمەي تۇرالمايمىز. بۇلارنى نەزەردە تۇتۇپ تۇرۇپ ھازىر تۈركىيەدە ئىقامەت بىلەن تۇرۇۋاتقان 20 مىڭ ئۇيغۇرغا تۈركىيە ۋەتەنداشلىق بېرىشى كېرەكلىكىنى تەكىتلەيمىز. ئىككىنچى بىر مەسىلە مۇسۇلمان دۆلەتلەرنىڭ ۋە غەرىپ ئەللىرىنىڭ شەرقىي تۈركىستان مەسىلىسىدە خىتايغا بېسىم ئىشلىتىشى كېرەك.»

ئۇ، خىتاينىڭ شەرقىي تۈركىستاندىكى مۇسۇلمانلارغا قارىتا ئەقىلغا سىغمايدىغان بېسىم سىياسىتى ئېلىپ بېرىلىۋاتقانلىقىغا ئىشىنىدىغانلىقىنى بايان قىلىپ مۇنداق دېدى: «خىتاينىڭ شەرقىي تۈركىستاندىكى مۇسۇلمانلارغا قارىتا ئېقىلغا سىغمايدىغان بېسىم سىياسىتى ئېلىپ بېرىلىۋاتقانلىقىغا ئىشىنىمىز. بىز خىتاينىڭ بۇ زۇلۇمىنى توختىتىش ئۈچۈن تۈركىيەدە ۋە پۈتۈن ئىسلام دۇنياسىدا خىتاي ماللىرىنى بايقۇت قىلىش كېرەك دەپ ئويلايمىز. گەپ ئاڭلىمايۋاتقان خىتايغا بۇ يول ئارقىلىق گەپ ئاڭلاتقىلى بولۇشى مۇمكىن. مەن پۈتۈن دۇنيادىكى ئۇيغۇرلارنىڭ بالدۇرراق بۇ دەرتتىن قۇتۇلۇشىنى ئۈمىد قىلىمەن.»

تەپسىلاتى...

نورۋېگىيە ئۇيغۇر كومىتېتى جازا لاگېرلىرىغا قارشى پائالىيەتلىرىنى كۈچەيتمەكتە

خەۋەر مەنبەسى: ئەركىن ئاسىيا

15-يانۋار نورۋېگىيە ئۇيغۇر كومىتېتى نورۋېگىيە پارلامېنتىنى زىيارەت قىلدى ھەمدە تۈرك تەشكىلاتلىرى رەھبەرلىرى بىلەن ئۇچرىشىش ئۆتكۈزدى.

نورۋېگىيە پايتەختى ئوسلودىن كەلگەن مەلۇماتلارغا قارىغاندا، 15-يانۋار كۈنى نورۋېگىيە ئۇيغۇر كومىتېتىنىڭ رەئىسى بەختىيار ئۆمەر، نورۋېگىيە تىبەت كومىتېتىنىڭ رەئىسى سوما سىۋېنىنسېن، دالاي لامانىڭ شىمالىي ياۋروپادىكى ۋەكىلى سونام فراسى، نورۋېگىيە خوڭكوڭ كومىتېتىنىڭ مۇئاۋىن رەئىسى ستېۋېن قاتارلىقلار بىرلىكتە نورۋېگىيە پارلامېنتىدا زىيارەتتە بولۇپ پارلامېنت ئەزاسى، مەشھۇر كىشىلىك ھوقۇق پائالىيەتچىسى گۇرى مېلبى بىلەن سۆھبەت ئېلىپ بارغان.

بۇ سۆھبەت نورۋېگىيە بىلەن خىتاي ئوتتۇرىسىدىكى مۇناسىۋەت بارغانسېرى بۇزۇلۇشقا يۈز تۇتقان بىر ۋاقىتقا ئورۇنلاشتۇرۇلغان. نورۋېگىيە ئۇيغۇر كومىتېتىنىڭ رەئىسى بەختىيار ئۆمەر ئەپەندى بۇ ھەقتە توختالغاندا كىشىلىك ھوقۇق مەسىلىسىدە نورۋېگىيەدە ئالاھىدە داڭق چىقارغان پارلامېنت ئەزاسى گۇرى مېلبى بىلەن ئۇيغۇر، تىبەت، خوڭكوڭ ۋەزىيىتى ھەققىدە ئۇزۇن پىكىر ئالماشتۇرۇش ئېلىپ بېرىلغانلىقىنى تىلغا ئالدى.

نورۋېگىيە خوڭكوڭ كومىتېتىنىڭ مۇئاۋىن رەئىسى ستېۋېن زىيارىتىمىزنى قوبۇل قىلغاندا بۇ قېتىمقى سۆھبەتتە ئاساسلىقى خىتاينىڭ ئۇيغۇرلارغا، تىبەتلەرگە ۋە خوڭكوڭلۇقلارغا سېلىۋاتقان زۇلۇمى ۋە بۇ زۇلۇمدىن قۇتۇلۇشنىڭ چارىلىرى ھەمدە ئۇيغۇر دىيارىدىكى جازا لاگېرلىرى ھەققىدە مۇزاكىرە قىلىنغانلىقىنى بايان قىلدى.

تەپسىلاتى...

كىشىلىك ھوقۇقنى كۆزىتىش تەشكىلاتى: «خىتاي ھۆكۈمىتى كىشىلىك ھوقۇققا دۇنياۋى تەھدىت»

خەۋەر مەنبەسى: ئەركىن ئاسىيا

كىشىلىك ھوقۇقنى كۆزىتىش تەشكىلاتى دۇنيانىڭ ھەرقايسى جايلىرىدىكى كىشىلىك ھوقۇق ۋەزىيىتى باھالاپ چىقىلىدىغان يىللىق دوكلاتىنى 14-يانۋار كۈنى نيۇ-يوركتىكى مەركىزىدە ئېلان قىلدى.

2020-يىللىق دوكلاتنىڭ ئىسمى بولسا «خىتاي ھۆكۈمىتى كىشىلىك ھوقۇققا دۇنياۋى تەھدىت» دەپ ئاتالغان. دوكلاتنىڭ ئىسمىدىنلا مەلۇم بولغىنىدەك كىشىلىك ھوقۇقنى كۆزىتىش تەشكىلاتى دۇنيا جامائەتچىلىكىنى ۋە ھەرقايسى ھۆكۈمەتلەرنى خىتاينىڭ دۇنيادىكى دېموكراتىيەدىن ئىبارەت بۇ ئاساسىي ئېقىمغا پەيدا قىلىۋاتقان تەھدىتى ھەققىدە ئاگاھلاندۇردى.

مەزكۇر ئورگاننىڭ دىرېكتورى كەن روس دوكلاتنىڭ ئېلان قىلىنىش مۇناسىۋىتى بىلەن مەخسۇس بايانات ئېلان قىلدى.

تەپسىلاتى...

ئىلھام توختىنىڭ تۈرمە ھاياتىغا 6 يىل بولغاندا

خەۋەر مەنبەسى: ئەركىن ئاسىيا

2020-يىلى 15-يانۋار كۈنى ئىلھام توختىنىڭ بېيجىڭدىكى ئۆيىدىن تۇتۇپ كېتىلگەنلىكىگە توپ-توغرا 6 يىل بولغان كۈندۇر.

6 يىلدىن بۇيان خىتاي تۈرمىسىدە يېتىۋاتقان ئىلھام توختىنى قويۇپ بېرىش ھەققىدە خەلقئارالىق سادالار بارغانسېرى كۈچەيدى. بۇ جەرياندا ئىلھام توختى خەلقئارادىكى نوپۇزلۇق كىشىلىك ھوقۇق مۇكاپاتلىرىدىن «باربارا گولدسىمىس ئەركىن يېزىش مۇكاپاتى»، «مارتىن ئەننالىس كىشىلىك ھوقۇق مۇكاپاتى»، «ۋېيمار كىشىلىك ھوقۇق مۇكاپاتى»، «ساخاروف ئەركىنلىك مۇكاپاتى» قاتارلىق كۆپلىگەن مۇكاپاتلارغا ئېرىشتى. ئۇنىڭدىن باشقا ئىلھام توختى 2019-يىللىق «نوبېل تىنچلىق مۇكاپاتى» غا نامزات قىلىپ كۆرسىتىلدى.

ھالبۇكى، خىتاي ھۆكۈمىتى غەرپ دېموكراتىك دۆلەتلىرى ۋە خەلقئارا جامائەتنىڭ ئىلھام توختىنى قويۇپ بېرىش ھەققىدىكى تەلەپلىرىگە ئىزچىل تۈردە سۈكۈت قىلىپ كەلدى. بولۇپمۇ خىتاينىڭ 2017-يىلدىن بۇيان ئىلھام توختىنىڭ تۈرمىدىكى ئەھۋالى ھەققىدە تاشقىي دۇنياغا ھېچقانداق ئۇچۇر بەرمەسلىكى خەلقئارا جامائەتنى، بولۇپمۇ ئۇيغۇرلارنى قاتتىق ئەندىشىگە سالماقتا.

تەپسىلاتى...

دولقۇن ئەيسا: «خىتاي مېنىڭ دادامنىڭ قاچان ۋە قانداق ئۆلگەنلىكىنى ئاشكارىلىسۇن»

خەۋەر مەنبەسى: ئەركىن ئاسىيا

10-يانۋار كۈنى خىتاينىڭ ھۆكۈمەت گېزىتى بولغان «يەرشارى ۋاقتى گېزىتى» تەرىپىدىن «شىنجاڭ بۆلگۈنچىلىرىنىڭ تۇغقانلىرى ئۇلارنىڭ يالغانچىلىقىنى ئەيىبلىدى» ماۋزۇلۇق ماقالىسىدە ئۇيغۇر رەھبەرلىرىدىن «خەلقئارا ئۇيغۇر كىشىلىك ھوقۇق-دېموكراتىيە فوندى» نىڭ رەئىسى رابىيە قادىر خانىم ۋە دۇنيا ئۇيغۇر قۇرۇلتىيى رەئىسى دولقۇن ئەيسا ئەپەندىلەرگە ھۇجۇم قىلغان. ئۇنىڭدا ئىلگىرى سۈرۈلۈشىچە، 10-يانۋار يەكشەنبە كۈنى شىنجاڭ ئۇيغۇر ئاپتونوم رايونلۇق ئۇچۇر-ئاخبارات ئىشخانىسىنىڭ باياناتچىسى گۈلى ئابلىم ئاخباراتچىلارنى كۈتۈۋېلىش يىغىنى ئۆتكۈزگەن ۋە مۇخبىرلارغا دولقۇن ئەيسا ۋە رابىيە قادىرلارنىڭ تۇغقانلىرى بىلەن ئۆتكۈزۈلگەن زىيارەت خاتىرىسىنى كۆرسىتىش ئارقىلىق، ئۇلارنىڭ يالغانچىلىق قىلىۋاتقانلىقىنى ئىلگىرى سۈرگەن.

«يەرشارى ۋاقتى گېزىتى» خەۋىرىدە، دولقۇن ئەيسا ئەپەندىنىڭ ئاچىسى ئارزۇگۈل ئىنىسىنى ئەيىبلەپ: «بىزنىڭ ئاتا-ئانىمىز قېرىلىقتىن ۋە كېسەللىكتىن ئۆلۈپ كەتكەن، بىراق مېنىڭ ئىنىم ئۇنى چەتئەلدە تۇرۇپ شىنجاڭنى قارىلاش ئۈچۈن قوللىنىپتۇ» دېگەنلىكىنى ئىلگىرى سۈرگەن.

تەپسىلاتى...

خوتەن «گۈزەل ماكان ئۆي-مۈلۈك شىركىتى» نىڭ دىرېكتورى ئەكبەر ئىمىن 25 يىللىق كېسىلگەن

خەۋەر مەنبەسى: ئەركىن ئاسىيا

ۋەزىيەتتىن خەۋەردار بىر كىشىنىڭ بايان قىلىشىچە جەمئىيەتتە «ئەكبەر دالۇ» دەپ تونۇلغان، بايلىق جەھەتتە خوتەندە ئالدىنقى قاتاردىكى كىشىلەردىن سانىلىدىغان 51 ياشلىق كارخانىچى ئەكبەر ئىمىن 2018‏-يىلنىڭ ئوتتۇرىلىرى ئۈن-تىنسىز غايىب بولغان. بىز ئەكبەر ئىمىننىڭ ئەھۋالىنى ئۇقۇش ئۈچۈن خوتەن شەھەرلىك ج خ ئىدارىسىگە تېلېفون قىلدۇق. ئالاقىدار خادىملار بۇ ھەقتە سوئالىمىزغا جاۋاب بېرىشنى رەت قىلدى. ۋەزىيەتتىن خەۋەردار كىشى، ئەكبەر ئىمىننىڭ بىرقانچە شىركىتى بارلىقى، شىركەتلىرىدىن بىرىنىڭ «گۈزەل ماكان ئۆي-مۈلۈك شىركىتى» ئىكەنلىكىنى بايان قىلغان. خىتاي تور ئارخىپلىرىنى ئاختۇرغىنىمىزدا، بۇ شىركەتنىڭ 2007-يىلى قۇرۇلغانلىقى، خوتەن شەھەر ئىتتىپاق يولىدا ئىشخانىسى بارلىقى، شىركەتنىڭ 13 مىليون 343 مىڭ يۈەن مەبلىغى بارلىقى قەيت قىلىنغان. بىز بۇ شىركەتنىڭ نۆۋەتتە مېڭىۋاتقان ياكى توختىغانلىقىنى ئېنىقلاش ئۈچۈن خوتەن ۋىلايەتلىك يەرلىك باج ئىدارىسىگە تېلېفون قىلدۇق. بۇ خادىممۇ، بۇ تۈر ئەھۋاللارغا جاۋاب بەرمەسلىك ھەققىدە ج خ تارماقلىرىنىڭ مەخسۇس ھۆججىتى بارلىقىنى ئاشكارىلىدى.

خوتەن ۋىلايىتىدە سىياسىي قانۇن ساھەسىدە خىزمەت قىلغان بىر خادىم، ئەكبەر ئىمىننىڭ خوتەن شەھەر ئىچىگە سېلىنغان 16 قەۋەتلىكتىن 30 نەچچە بىنادىن تەشكىللەنگەن «بەخت ئولتۇراق رايونى» نىڭ ساھىبى ئىكەنلىكى ۋە 2 يىلدىن بۇيان تۇتقۇندا ئىكەنلىكىنى تىلغا ئالدى. ئەمما ئۇ ئەكبەر ئىمىننىڭ تۇتۇلۇش سەۋەبىدىن ئاساسەن دېگۈدەك خەۋەرسىزلىكىنى ئېيتتى.

تەپسىلاتى...